އަތްލެވެން ނެތް ތަރިކައިގެ ލިސްޓުން ހަރީސާ: ޝަހީދާ ބުނަނީ އެއީ އޭނާގެ ހަށިގަނޑުގެ ބައެއް ކަމަށް!

ބަލާ ބެލުމަށް، އަނެކާގެ މަޢުލޫމާތުގެ ޚަޒާނާގެ މުއްސަނދިކަމަކީ ފަހަރެއްގައިވެސް ވަޒަން ކޮށްލެވޭނެ ކަމެއް ނޫނެވެ. ތާރީޚީ ގޮތުން އަގު ހުރި، ތަރިކައިގެ މުއްސަނދި މަޢުލޫމާތުން ތަނަވަސްވެފައިވާ އެކަކީ ފިރުދައުސް ޢަލީއެވެ. ފިރުދައުސްއަކީ އޭނާގެ އުފަން ވަޒަނަށް ޚާއްޞަ، ޘަޤާފީ ކޭމެއް ކަމަށް ވާ ހަރީސާގެ އެންމެ އެވޭލާ ރެސިޕީ ރައްކާތެރި ކަމާއެކު ޖީލުތަކަށް ފޯރުކޮށްދިނުމުގެ ބުރަ ޒިންމާ އުފުލަމުންދާ މީހެކެވެ. ބޮޑު ތޮޅި މިރުސް ބޭނުންކޮށްގެން ތައްޔާރު ކުރާ ހަރީސާއަކީ ފިރުދައުސްގެ ޢާއިލާގެ ފަޚްރެކެވެ. ތޫނިސްގެ މަމޫރާއޭ ކިއާ ސަރަޙައްދުގައި އާބާދުވެފައިވާ ފިރުދައުސްގެ ޢާއިލާއަކީ ޒަމާނުއްސުރެ ދަނޑުވެރި ޢާއިލާއެކެވެ.

އެއީ މީގެ 10 ވަރަކަށް މަސްދުވަސް ކުރިއެވެ. ތާރީޚާއި ތަރިކައާއި ބެހޭ އދގެ އިދާރާ (ޔުނެސްކޯ)އިން ޘަޤާފީ ތަރިކައިގެ ގޮތުގައި ހިމެނޭ އަތް ނުލެވޭ ތަރިކައިގެ ލިސްޓުގައި ހަރީސާ ހިމެނީ ޑިސެމްބަރު 2022 ގައެވެ. ޔުނެސްކޯއިން ސިފަ ކުރާ ގޮތުގައި ހަރީސާއަކީ ދޭސީ ކޭންތަކުގެ އަސާސެކެވެ. އަދި ތޫނިސްގެ މުޖުތަމަޢަށް ބަލާއިރު އާދަވެގެން ކޮންމެ ދުވަހެއްގެ ކޭމުގެ ޘަޤާފަތުގައި ހިމެނޭ ބައެކެވެ.

ޔުނެސްކޯއިން އެކުލަވާލާފައި އޮންނަ އަތް ނުލެވޭ ތަރިކައިގެ ލިސްޓުގައި ހަރީސާ ހިމެނުމުގައި، ފިރުދައުސްއާއި، އޭނާގެ މަންމައާއި ދައްތަގެ ދައުރު ބޮޑެވެ. އެމީހުން ހިއްސާ ކުރާ ދަނޑުތަކަށް ޖަމާވެ، ރަތްކޮށް ހުންނަ ތޮޅި މިރުސްތައް ބިނދެ، އެ ހިއްކާ، މުގުރާ، ޕޭސްޓުގަނޑަކަށް ހަދައެވެ. ކޭމުގެ ރަހަ ހެޔޮ ވަރު ކޮށްލުމަށް، ތޫނިސްގެ ކޮންމެ ގެއެއްގައިވެސް ބޭނުން ކުރަނީ ހަރީސާއެވެ.

އެންމެ އިހުގައި ހަރީސާ ތައްޔާރު ކުރުމަށްޓަކައި މިރުސް މުގުރަނީ ވަށްކޮށް އޮންނަ ދެ ހިލަގަނޑެއް ބޭނުން ކޮށްގެންނެވެ. ދެ ހިލަގަނޑު އޮންނާނީ އެކަތި މައްޗަށް އަނެކަތި އަރުވާފައެވެ. ދެ ހިލަނގަނޑުގެ މެދަށް މިރުސްތައް އެޅުމަށްފަހު، ވަށްބުރު ހަމަވާނެހެން ހިލަގަނޑު އަނބުރަމުން ދާނީ އެކަން ކުރަން ހުންނަ މީހެއްގެ އަމިއްލަ އަތުންނެވެ. މިއަދު މިހުންނަ ގްރައިންޑަރުތަކުންވެސް މި ކުރަނީ ހަމަ އެކަމެވެ.

ހިއްކި މިރުސްތައް މުގުރާ ނިމުމުން، އޭގެ ތެރެއަށް ޒައިތޫނި ތެޔޮ އަޅާ، ބިއްލޫރި ފުޅިފުޅިގައި ބަންދުކޮށް، ތޫނިސްގެ އެކި ހިސާބުތަކަށް ވިއްކަން ފޮނުވައެވެ.

ޝަހީދާ ބޫފިޔާޟްއަކީ ނަބީއުލްގައި ހަރީސާ ފިހާރައެއް ހިންގާ މީހެކެވެ. ޝަހީދާ ސިފަ ކުރި ގޮތުގައި ހަރީސާއަކީ އޭނާގެ 4 ވަނަ ދަރިފުޅެވެ.

ތޫނިސްގައި ތޮޅި މިރުހުގެ މޫސުން ފެށެނީ އޭޕްރިލް މަހުއެވެ. ނަބީއުލްއޭ ކިއާ ސަރަޙައްދަކީ، އެކި ކަހަލަ ތޮޅި މިރުސްތަކަށް ޚާއްޞަ ސަރަޙައްދަކަށް ވާ އިރު، ހަރީސާ އުފެއްދުމުގެ މައި މަންޒިލަކީވެސް އެއީއެވެ. ކުޅިކަން ގަދަ ތޮޅި މިރުސްތައް، ހޫނު މޫސުމުގެ ދުވަސްވަރު ހިއްކާ އިރު، މުޅި އަހަރުގެ ބާކީ އޮތް ބައިގައިވެސް ސަޕްލައި ލިބެން ހުރެއެވެ.

ކޮންމެ އަހަރެއްގެވެސް އޮކްޓޯބަރ މަސް ނިމޭ އަތަށް އަޅާލުމުން، ނަބީއުލްގައި "ހަރީސާ ފެސްޓިވަލް" ބާއްވައެވެ. ހަރީސާއަށް ލޯބިކުރާ އެތައް ބަޔަކު އެ ސަރަޙައްދަށް ޖަމާވެއެވެ. ހަރީސާ އުފައްދާ މީހުން، އެމީހުންގެ އުފެއްދުންތައް ވިއްކުމުގައި އަވަދިނެތި އުޅޭއިރު، ކައްކާއިންގެ ކަމަކަށް ވެފައި އޮންނަނީ، ހަރީސާ ބޭނުން ކޮށްގެން، އެމީހުންގެ ކޭންތައް އިތުރަށް ފުރިހަމަ ކޮށްލެވިދާނެ ގޮތްތައް ދައްކާލުމެވެ.