"ނާމްކަރަން" ދޫކޮށްލުމުގެ ވިސްނުމެއް ޒައިން އިމާމްގެ ނެތް
އެ ސީރީޒް ދޫކޮށްލުމުގެ ސަބަބެއް މެދުވެރިއެއް ނުވޭ
ސްޓާ ޕްލަސްގެ "ނާމްކަރަން"ގެ ތަރި ޒައިން އިމާމް
ސްޓާ ޕްލަސް އިން މިހާރު ދައްކަމުންދާ ޑްރާމާ ސީރީޒް "ނާމްކަރަން" ގެ މުހިއްމު ރޯލެއް ކުޅޭ ޒައިން އިމާމް (ނީލް) އެ ސީރީޒް ދޫކޮށްލުމުގެ ވިސްނުމެއް ނެތް ކަމަށް ބުނެފިއެވެ.
އޭނާ މިހެން ބުނީ "ނާމްކަރަން" ދޫކޮށްލާނެ ކަމަށް ސޯޝަލް މީޑިއާ މެދުވެރިކޮށް ބައެއް މީހުން ބުނަމުން ދާތީއެވެ.
ނީލް ބުނީ އޭނާ ބޮލީވުޑްގައި ކުޅުމަށް ހަމަޖެހިފައިވާ މަހޭޝް ބަޓްގެ ފިލްމަށްޓަކައި "ނާމްކަރަން" ދޫކޮށްލުމުގެ ވިސްނުމެއް ނެތް ކަމަށާއި އެ ދޫކޮށްލުމަށް ދިމާވި އެއްވެސް ސަބަބެއް ނެތް ކަމަށެވެ.
ނީލް ބުނީ "ނާމްކަރަން"ގެ ކުރިއަށްހުރި އެޕިސޯޑްސްތަކަކީ ވަރަށް ތަފާތު ބެލުންތެރިންނަށް ކަމުދާނެ އެޕިސޯޑް ތައް ކަމަށާއި ބެލުންތެރިންނަށް އެ ސީރީޒް މިހާރު ވެސް ކަމުދާ ކަމަށެވެ. އަދި މިހާރު "ނާމްކަރަން" އިން ފެންނަމުންދާ އެޕިސޯޑްތަކަށް ވެސް ބެލުންތެރިންގެ ސަޕޯޓެއް ލިބޭ ކަމަށް ނީލް ބުންޏެވެ.
ޒައިން އިމާމް އެންމެ ފުރަތަމަ ފެނިފައިވަނީ 2014 އިން 2015 އަށް އެމްޓީވީ އިންޑިއާއިން ދެއްކި "ކޭސޭ ޔޭ ޔާރިޔާން" އިންނެވެ. އޭނާ މަޝްހޫރު ވެގެން ދިޔައީ ޒީޓީވީން ދެއްކި ޓީވީ ސީރީޒް "ތަޝާން އީ އިޝްގު" އިންނެވެ.
