އީސީގެ ކޮމްޕްލެއިންޓްސް ބިއުރޯއަށް 30 ޝަކުވާ ހުށަހަޅާފައިވޭ: ހަބީބު
ކޮރަޕްޝަނާއި ގުޅުންހުރި 2 މައްސަލަ ދަނީ ބަލަމުން
އިލެކްޝަން ކޮމިޝަންގެ ނައިބު ރައީސް އިސްމާއިލް ހަބީބު
ރިޔާސީ އިންތިޚާބާއި ގުޅިގެން އިލެކްޝަން ކޮމިޝަން (އީސީ)ގެ ކޮމްޕްލެއިންޓްސް ބިއުރޯއަށް 30 ޝަކުވާ ހުށަހަޅާފައިވާ ކަމަށް އިލެކްޝަން ކޮމިޝަންގެ ނައިބު ރައީސް އިސްމާއިލް ހަބީބު ވިދާޅުވެއްޖެއެވެ.
ހޮނިހިރު ދުވަހުގެ ރޭ އީސީން ބޭއްވި ނޫސްވެރިންގެ ބައްދަލުވުމުގައި އީސީގެ ނައިބު ރައީސް ހަބީބު ވިދާޅުވީ އިންތިޚާބާއި ގުޅިގެން ކޮމްޕްލެއިންޓްސް ބިއުރޯއަށް ޖުމްލަ 30 ޝަކުވާ ހުށަހަޅާފައިވާ ކަމަށާއި، ދެ ޝަކުވާ އަށް ޖަވާބު ދީފައިވާ ކަމަށެވެ. އަދި 28 ޝަކުވާގެ މައްސަލަ ބަލަމުންދާ ކަމަށް ހަބީބު ވިދާޅުވިއެވެ.
ހަބީބު ވިދާޅުވީ މިޝަކުވާތަކުގެ ތެރޭގައި ކޮރަޕްޝަނާއި ގުޅުންހުރި 2 މައްސަލަ، ރަޖިސްޓްރޭޝަންއާ ގުޅޭ އެއް މައްސަލަ، ވޯޓު ދިނުމުގެ ހައްގާއި ގުޅޭ 3 މައްސަލަ، އިންތިޚާބީ މުވައްޒަފުންނާއި ގުޅުންހުރި 15 މައްސަލަ، އެންޓި ކެންޕޭން ކުރުމާއި ގުޅޭ 3 މައްސަލަ، ވޯޓުގެ ސިއްރުކަމާއި ގުޅުންހުރި އެއް މައްސަލަ އަދި އެހެނިހެން 3 މައްސަލަ ހިމެނޭ ކަމަށެވެ.
ހަބީބު ވިދާޅުވީ ރިޔާސީ އިންތިޚާބުގެ ވަގުތީ ނަތީޖާއަށް ބަދަލު އަތުވެދާނެފަދަ ސީރިއަސް މައްސަލަ އައިސްފައިނުވާ ކަމަށެވެ.
މިއަހަރުގެ ރިޔާސީ އިންތިޚާބުގެ ދެވަނަ ބުރުގައި 282،804 މީހުންނަށް ވޯޓުލުމުގެ ޙައްގު ލިބުނުއިރު 86 އިންސައްތައަށް ވުރެ ގިނަ މީހުން ވޯޓުލި ކަމަށް އިލެކްޝަންސް ކޮމިޝަނުން ވަނީ ބުނެފައެވެ.
