އިލެކްޝަންސް ކޮމިޝަނުގެ ތިޖޫރި ފަޅާލައި ގިނަ އަދަދެއްގެ ފައިސާ ވަގަށްނެގި މައްސަލައިގެ މައުލޫމާތު ހިއްސާކުރުމަށް ފުލުހުން ދެކޮޅުހަދައިފި އެވެ.
އިލެކްޝަންސް ކޮމިޝަންގެ ތިޖޫރީ ފަޅާލައި ގިނަ އަދަދެއްގެ ފައިސާ ވަގަށް ނެގި މައްސަލައިގެ މައުލޫމާތު އޮޅުން ފިލުވުމަށް އަންގާރަ ދުވަހު "ރައްޖެއެމްވީ" ފުލުހުންގެ މީޑިއާ އޮފިޝަލަށް ގުޅާލުމުން ވިދާޅުވީ "ބަލާލާފަ ގުޅާލާނަން" ކަމަށެވެ. މެންދުރުފަހު ފުލުހުންގެ މީޑިއަ އޮފިޝަލް ގުޅުއްވުމަށްފަހު ވިދާޅުވީ އެ މައްސަލައިގެ އެއްވެސް މައުލޫމާތެއް މި ވަގުތު ހިއްސާކުރެވެން ނެތް ކަމަށެވެ. މި މައްސަލާގައި އެއްވެސް މީހަކު ހައްޔަރުކޮށްފައިވޭތޯ ތަކުރަރުކޮށް ސުވާލު ކުރުމުންވެސް ވިދާޅުވީ ތަހުގީގު ކުރަމުންދާ މައްސަލައަކަށްވާތީ އެއްވެސް މައުލޫމާތެއް ހިއްސާކުރެވެން ނެތްކަމަށެވެ.
ފުލުހުން ތަހުގީގު ކުރަމުންދާ އެކިއެކި މައްސަލަތަކުގައި މީހަކު ހައްޔަރުކޮށްފައިވާނަމަ އެވަރު ބުނެލަދެއެވެ. ނަމަވެސް އިލެކްޝަންސް ކޮމިޝަންގެ ތިޖޫރީ ފަޅާލައި ގިނަ އަދަދެއްގެ ފައިސާ ވަގަށްނެގި މައްސަލާގައި އެއްވެސް މައުލޫމާތު ހިއްސާނުކުރުމަށް ފުލުހުން ނިންމި ސަބަބެއް ސާފެއް ނުވެއެވެ.
އިލެކްޝަން ކޮމިޝަންގެ ތިޖޫރި ފަޅާލައި ގިނަ އަދަދެއްގެ ފައިސާ ވަގަށްނަގަފައިވާއިރު، އިލެކްޝަންސް ކޮމިޝަންގެ މުވައްޒަފުންގެ މުސާރައާއި މެއި މަހު ބޭއްވި ލޯކަލް ކައުންސިލް އިންތިހާބާގުޅޭ ޚަރަދުތަކުގެ ގޮތުގައި ގިނަ އަދަދެއްގައި ފައިސާ ހުރުމަކީ އެކަށީގެންވާ ކަމެކެވެ. ނަމަވެސް އިލެކްޝަންސް ކޮމިޝަނުގެ ތިޖޫރީ ފަޅާލުމަށްފަހު ވަގަށް ގަނާފައިވާ ފައިސާގެ ތަފްސީލެއް ކަމާބެހޭ އެއްވެސް ފަރާތަކުން ހާމަކޮށްފައެއް ނުވެއެވެ.
ޕޯޓްސް ބިލްޑިންގެ ފަސް ވަނަ ފަންގިފިލާގައި ހުންނަ އިލެކްޝަންސް ކޮމިޝަންގެ ދޮރު ހަލާކުކޮށްލައިގެން އެތަނަށް ވަދެ ތިޖޫރިފަޅާލާއިފައިވާކަން އެނގިފައި ވަނީ އެ ކޮމިޝަންގެ މުވައްޒިފުން އާދީއްތަ ދުވަހު ހެނދުނު އޮފީހަށް ނިކުތުމުންނެވެ.
އިލެކްޝަން ކަމިޝަން ހުންނަ ޕޯޓް ބިލްޑިން އިމާރާތަކީ ސީސީޓީވީ ހަރުކޮށް މޮނިޓަ ކުރަމުންދާ އިމާރާތެކެވެ. އިމާރާތުގެ ތިރީގައި ސެކިއުރިޓީ އޮފިސަރެއް އަބަދުވެސް ހުރެ އެވެ.
