ގދ ވާދޫގައި ވޯޓުފޮށި ބަންދުކުރި ފަހުން، މީހަކު ވަދެ ވޯޓު ފޮށި ފަޅާލައިފިއެވެ.
އެކަމާ ގުޅޭ ބައެއް ފޮޓޯތައް މިހާރު ވަނީ ލިބިފައެވެ. އެގޮތުން ލިބިފައިވާ ފޮޓޯތަކަށް ބަލާއިރު، ފޮށިވެސް ވަނީ ފަޅާލާފައެވެ.
އަދި ފޮށި ބިންމައްޗަށް ވައްޓާލާފައިވާއިރު، ވޯޓު ކަރުދާސްތައްވެސް ހުރީ ބިންމަތީގައެވެ.
މައުލޫމާތު ލިބިފައިވާ ގޮތުގައި ނުހަނު އަމާންކަމާއެކު ވޯޓުލުން ނިމި، ވޯޓު ފޮށިވެސް ބަންދުކޮށްފައިވަނިކޮށް، މީހަކު އެތަނަށްވަދެ، އޭނާގެ އައިޑީކާޑު އޮތީ އެހެން މީހެއްގެ އަތުގައިކަމަށް ބުނެ، އަދި އެމީހާ މިހާރު އޮތީ ނިދާފައިކަމަށް ބުނެ، އެކަމާ ރުޅި އައިސްގެން ވަނީ ވޯޓު ފޮށި ނަގައި ބިންމައްޗަށް ވައްޓާލާފައެވެ.
އެމީހާ މިހާރު ފުލުހުންގެ ބެލުމުގެ ދަށަށް ގެންގޮސްފައިވާއިރު، އީސީގެ އެންގުމުގެ މަތިން ވޯޓު ކަރުދާސްތައް އެ ހުރި ގޮތަށް ބަހައްޓާފައި ހުރިކަމަށް މައުލޫމާތު ލިބެއެވެ.
