ކުޅުދުއްފުށި ރީޖަނަލް ހޮސްޕިޓަލުގެ ނަރުހުން އަދި ކޮމިއުނިޓީ ނަރސް ވޮލަންޓިއަރސް ގުޅިގެން 'ބޮޑުތިލަދުންމަތި ނަރސިންގ ކޮންފަރެންސް' ނަމުގައި ކުރިޔަށް ގެންދިޔަ ނާރސިންގ ކޮންފަރެންސް ކާމިޔާބުކަމާއެކު ނިންމާލައިފި އެވެ.
އަތޮޅު ތެރޭގައި ބޭއްވި ފުރަތަމަ ނާސިން ކޮންފަރެންސް 58 ބައިވެރިންނާއެކު ކުރިއަށްގެންގޮސްފައިވަނީ 28 ސެޕްޓެމްބަރު 2023 ވީ ބުރާސްފަތި ދުވަހު، ދިވެހިރާއްޖޭގެ ޤައުމީ ޔުނިވަސިޓީ ކުޅުދުއްފުށި ސިޓީ ކެމްޕަސް ހޯލްގައެވެ.
މި ކޮންފަރެންސްގެ ތީމްގެ ގޮތުގައި ކަނޑައަޅަފއިވަނީ 'ޓްރެންޑްސް އިން ނަރސިންގ ޕްރޮފެޝަން: ޗެލެންޖަސް، އިނޮވޭޝަން އެންޑް އެޑިއުކޭޝަން' އެވެ. މި ކޮންފަރެންސްގެ މަގުޞަދަކީ ނަރސިންގ ޕްރޮފެޝަނަށް އަދި ދުނިޔޭގައި މި ހިދުމަތަށް އަންނަ ބަދަލުތަކަށް މި ސަރަހައްދުގެ ނަރުހުންގެ ހޭލުންތެރިކޮށް، މި ފަދަ ޕްލެޓްފޯރމެއްގެ ތެރެއިން ހިދުމަތް ދިނުމުގައި ހުރި ގޮންޖެހުންތައް ދެނެގަނެ މަޝްވަރާކުރުންކަމަށް ކޭއާރުއެޗް މައުލޫމާތުދެ އެވެ.
މި ކޮންފަރެންސްގެ ފެސިލިޓޭޓަރުންގެ ގޮތުގައި ނެދަލެންޑްސްގެ އެމްސްޓަރޑަމް ޔުނިވަރސިޓީގެ ސާރޖަރީ ޑިޕާރޓްމަންޓްގެ ޕްރޮފެސަރ ޑަރކް އުބިންކް ވަނީ 'ހައު ޓު ޕްރެކްޓިސް އެވިޑެންސް ބޭސްޑް ޕްރެކްޓިސް ޓްމޯރޯ' ގެ ނަމުގައި ސެޝަން އެއް ނަންގަވައިދެއްވާފައެވެ. މީގެ އިތުރުން ވިލާ ކޮލެޖްގެ ނަރސިންގ ފެކަލްޓީގެ ޑީން، ޑރ. އަސްމާ އިބްރާހިމް 'ނަރސިންގ އެސް އަ ޕްރޮފެޝަން (ޓްރެންޑްސް)' ގެ ނަމުގައި ސެޝަން އެއް ކުރިއަށްގެންދެވިއެވެ.
އަދި މީގެ އިތުރުން ކޮމިއުނިޓީ ނަރސް ވޮލަންޓިއަރސްގެ (ސީ.އެން.ވީ) ފަރާތުންވެސް ވަނީ ސެޝަންތައް ކުރިއަށް ގެންގޮސްފަ އެވެ. އެގޮތުން ކޮމިއުނިޓީ ނަރސް ވޮލަންޓިއަރސްގެ (ސީ.އެން.ވީ) ގެ ރައީސާ ނަޒީރާ ނަޖީބު އަދި މީޑިއާ ކޯޑިނޭޓަރ މަރިޔަމް ނިޔާން ވަނީ ސެޝަން ނަންގަވައިދެއްވާފަ އެވެ. އަދި އިފެކްޓިވް ކޮމިއުނިކޭޝަން ގެ ނަމުގައި އުރީދޫގެ ސީނިއަރ މެނޭޖަރ ޑިސްޓްރިބިއުޝަން، އަބްދުލް މުހައިމިން އިބްރާހިމް ސެޝަންތައް ކުރިއަށް ގެންގޮސް ކަރުދާސް ހުށައަޅާފައިވެއެވެ.
މި ކޮންފަރެންސްގެ ނިންމުމުގެ ރަސްމިއްޔާތު ބާއްވާފައިވަނީ ޤައުމީ ޔުނިވަރސިޓީ ކުޅުދުއްފުށީ ކެމްޕަހުގައި ބުރާސްފަތިދުވަހުއެވެ. މި ރަސްމިއްޔާތު ޝަރަފުވެކޮށްދެއްވީ ކުޅުދުއްފުށި ރީޖަނަލް ހޮސްޕިޓަލުގެ ޗީފް އެގްޒެކްޓިވް އޮފިސަރ އަހުމަދު ދާއޫދު އެވެ. ޝަރަފުވެރި މެހެމާނުގެ އިތުރުން ރަށުގެ މުއައްސަސާތަކުގެ ވެރިން އަދި ހޮސްޕިޓަލުގެ ސީނިއަރ މެނޭޖްމަންޓް ޓީމުން ވަނީ ރަސްމިއްޔާތުގައި ބައިވެރިވެލައްވާފައެވެ.
