އިނގިރޭސި ލީގު ކަޕް (ކަރަބާއޯ ކަޕް) ގެ ހަތަރު ވަނަ ބުރުން މެންޗެސްޓަރ ޔުނައިޓެޑް ޖާގަ ހޯދައިފިއެވެ.

ޔުނައިޓެޑް ލީގުކަޕްގެ ގަދަ ސޯޅައަށް ދަތުރުކުރީ 3-0 ން ކްރިސްޓަލް ޕެލަސް ބަލިކޮށްގެންނެވެ. އަމިއްލަ ދަނޑުގައި ކުޅުނު މެޗުގައި ޔުނައިޓެޑަށް ލީޑް ނަގައިދިނީ 21 ވަނަ މިނެޓުގައި ގާނާޗޯއެވެ. ދެވަނަ ލަނޑު އޭގެ ފަސް މިނެޓުފަހުން ޖެހީ ކަސެމީރޯއެވެ. ތިންވަނަ ލަނޑު ދެވަނަ ހާފް ފަށައިގެން ދިހަވަނަ މިނެޓުގައި ޖެހީ މާޝިއަލްއެވެ. މިއީ މިސީޒަންގައި އުނދަގޫ ހާލަތެއްގައި އޮތް ޔުނައިޓެޑްގެ އެންމެ ރަނގަޅު މޮޅެވެ.

މެޗަށް ޔުނައިޓެޑުން ނެރުނު އެގާރައިން ފާހަގަކުރެވުނު އެންމެ ބޮޑު ބަދަލަކީ މޭސަން މައުންޓް ފުރަތަމަ އެގާރައަށް އައުމާއި, މިސީޒަންގައި ޔުނައިޓެޑާ ގުޅުނު ސޮފްޔާން އަމްރާބަތު ފުރަތަމަ ފަހަރަށް ފުރަތަމަ އެގާރައިގައި ހިމެނުމެވެ.

މެޗުގައި ޔުނައިޓެޑްގެ ކުޅުމާމެދު ކޯޗު ޓެން ހާގް ހުރީ ހިތްހަމަޖެހިފައެވެ. އެއީ ތިން ބައްޔަށްފަހު މޮޅެއް ލިބުމާވެސް އެކުއެވެ. ޓެން ހާގް ބުނީ މެޗު ކޮންޓްރޯލްކޮށް ރަނގަޅަށް އޭނާގެ ޓީމުން ކުޅުނު ކަމަށެވެ.

4-0 ން ސަލްފޯޑް ބަލިކޮށް, ބާންލީވެސް ވަނީ ގަދަ ސޯޅައަށް ދަތުރުކޮށްފައެވެ.