އެމްޑީއޭއަށް ޝުކުރު އަދާކުރައްވާ ފައްޔާޒު ވިދާޅުވީ އެމްޑީޕީއަކީ ގަދަ ކަނޑުގައި ދަތުރުކޮށް ކުރި ހޯދާ ޕާޓީއެއްކަމަށް
ފައްޔާޒު ވިދާޅުވީ އެމްޑީޕީ އަކީ ބަލިކޮށް ނުލެވުނު ހިތްވަރެއްކަމަށާއި ގުޑުވާނުލެވުނު އަޒުމެއްކަމަށް
އެމްޑީޕީގެ ޗެއަރޕާސަން ފައްޔާޒު އިސްމާއީލު
ރިޔާސީ އިންތިޚާބުގައި އެމްޑީޕީ އާއެކު ކޯލިޝަން ހެދި މޯލްޑިވިއަން ޑިވެލޮޕްމަންޓް އެލައަންސް (އެމްޑީއޭ) އިން ރިޔާސީ އިންތިޚާބުގެ ދެވަނަ ބުރުގައި އެމްޑީޕީ އަށް ތާއީދުނުކުރަން ނިންމައި ކޯލިޝަން ރޫޅާލަން ނިންމިމުމަށް އިޙްތިރާމްކުރައްވާކަމަށް އެމްޑީޕީގެ ޗެއަރޕާސަން ފައްޔާޒު އިސްމާއީލު ވިދާޅުވެއްޖެއެވެ.
ރިޔާސީ އިންތިޚާބުގެ ފުރަތަމަ ބުރުގައި އެމްޑީޕީ ކޯލިޝަންގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ އަރިހުގައި އެމްޑީއޭގެ ރައީސް އަދި މީދޫ ދާއިރާގެ މެމްބަރ އަހުމަދު ސިޔާމް މުހައްމަދު ފެނިގެންދިޔަނަމަވެސް ފުރަތަމަބުރުގެ ނަތީޖާއަށްފަހު އެއްގޮތަކަށްވެސް ސިޔާމް ދެވަނަ ބުރުގެ ކެމްޕެއިން ތެރެއިން ފެނިފައިނުވެއެވެ. އެމްޑީއޭގެ އެހެން ބޭފުޅުން އެމްޑީޕީ އާއެކު ކެމްޕެއިންތަކުން ފެނިގެންގޮސްފައިވާއިރު ދެވަނަ ބުރުގެ ވޯޓުލާން ތިން ދުވަހަށް ވެފައިވަނިކޮށް އަންގާރަ ދުވަހުގެ ރޭ އެމްޑީއޭއިން ވަނީ ދެވަނަ ބުރުގައި އަމަލުކުރާނެ ގޮތެއް ކަނޑައެޅުމަށް ކައުންސިލު ބައްދަލުވުމެއް ބާއްވާފައެވެ.
އެބައްދަލުވުމަށް ސިޔާމް ހުށަހެޅުއްވީ އެއްވެސް ކެންޑިޑޭޓަކަށް ތާއީދުނުކުރުމަށެވެ. އެހުށަހެޅުމަށް ކައުންސިލުގެ ތާއީދުނުލިބުނުއިރު ރައީސް ޞާލިހު އާއެކު ކުރިޔަށްދާން ހުށަހެޅި ހުށަހެޅުމަށްވެސް ތާއީދުލިބިފައެއްނުވެއެވެ. އެމްޑީއޭ ކައުންސިލުގެ ތާއީދު ލިބުނީ ދެވަނަ ބުރުގައި ޕީއެންސީގެ ރިޔާސީ ކެންޑިޑޭޓް ޑރ މުހައްމަދު މުއިއްޒަށް ތާއީދުކުރުމަށެވެ.
އެމްޑީއޭގެ މިނިންމުމާއެކު ފައްޔާޒު ކުރެއްވި ޓްވީޓެއްގައި ވިދާޅުވީ އެމްޑީއޭގެ ނިންމުމަށް އިޙްތިރާމްކުރައްވާކަމަށާއި ކެމްޕެއިންގައި އެމްޑީއޭއިން ކުރި ބުރަ މަސައްކަތަށް ޝުކުރު އަދާކުރައްވާކަމަށެވެ.
އަދި އެމްޑީޕީގެ މެމްބަރުންނަށް ހިތްވަރު ދެއްވަމުން ފައްޔާޒު ވިދާޅުވީ އެމްޑީޕީ އަކީ އަބަދުވެސް ގަދަކަނޑުގައި ދަތުރުކޮށް ކުރި ހޯދާ ޕާޓީއެއްކަމަށެވެ. ބަލިކޮށް ނުލެވުނު ހިތްވަރެއްކަމަށާއި ގުޑުވާނުލެވުނު އަޒުމެއްކަމަށެވެ.
އެމްޑީއޭއިން ޑރ. މުއިއްޒަށް ތާއީދު ކުރަން ނިންމިއިރު އިންތިޚާބުގެ ފުރަތަމަ ބުރުގައި ބޭއްވި ޖަލްސާއެއްގައި ވާހަކަދައްކަވަމުން ސިޔާމް ވިދާޅުވެފައިވަނީ އެމަނިކުފާނަކީ ދެފުށްކެހެރި މީހެއް ނޫން ކަމަށާއި ރައީސް ސޯލިހު ދޫނުކޮށްލައްވާނެކަމަށެވެ.
އެމްޑީއޭއިން އެމްޑީޕީ އާއެކު ހަދާފައިވާ ކޯލިޝަން ރޫޅާލިނަމަވެސް އެމްޑީއޭގެ ބައެއް މެމްބަރުން ވަނީ އެމްޑީއޭއިން ވަކިވެ ރައީސް ޞާލިހަށް ތާއީދުކުރަން ނިންމާފައެވެ. އަދި އެކަން އަންނަނީ ސޯޝަލް މީޑިޔާގައި ހާމަކުރަމުންނެވެ.
