ބޭރުގެ 100 ވަރަކަށް އޮބްޒާވަރުންނަށް އީސީން ބްރީފިންގ ސެޝަނެއް ބާއްވައިފި

ބޭރުގެ 100 ވަރަކަށް އޮބްޒާވަރުންނަށް އިލެކްޝަންސް ކޮމިޝަން (އީސީ) އިން ބްރީފިންގ ސެޝަނެއް ބާއްވައިފިއެވެ.

ބުރާސްފަތި ދުވަހުގެ ރޭ މި ބްރީފިންގ ސެޝަން ބޭއްވީ ސަލްމާން މިސްކިތުގެ އޮޑިޓޯރިއަމްގައެވެ.

ރާއްޖެއެމްވީއަށް މައުލޫމާތު ދެއްވަމުން އިލެކްޝަންސް ކޮމިޝަންގެ ނާއިބުރައީސް އިސްމާއީލް ހަބީބް ވިދާޅުވީ ބްރީފިންގގައި މައިގަނޑު ގޮތެއްގައި ރާއްޖޭގެ އިންތިޚާބީ ނިޒާމު އޮންނަ ގޮތާއި ވޯޓްލާ މަރުކަޒުގައި އުސޫލު އޮންނަ ގޮތާއި ބޭރުގެ އޮބްޒާވަރުން އަމަލުކުރަން ޖެހޭ ގޮތާއި ސުލޫކީ މިންގަނޑު އޮޅުންފިލުވައިދީފައިވާނެ ކަމަށެވެ.

ވޯޓުލުން ފެށިގެން ނިމެންދެން ކަންތައްތައް ކުރިއަށްދާނެ ގޮތުގެ ވީޑިއޯ ޕްރޮޒެންޓޭޝަނެއް ވެސް ދީފައިވާނެ ކަމަށާއި ވޯޓްލުމުގެ ޕްރޮސެސް ކުރިއަށްދާގޮތް ބޭރުގެ އޮބްޒާވަރުންނަށް މިހާރު ތަސައްވަރު ކުރެވިފައިވާ ކަމަށް ހަބީބު ވިދާޅުވިއެވެ.

ބޭރުގެ އޮބްޒާވަރުން ރާއްޖޭގެ 6 ސަރަހެއްދެއްގައި މަސައްކަތް ކުރައްވާނެކަން ފާހަގަކުރައްވާ ހަބީބު ވިދާޅުވީ އެ ސަރަހައްދުތަކަކީ ހއ. އަތޮޅާއި ރ. އަތޮޅާއި ލ. އަތޮޅާއި ޏ. އަތޮޅާއި އައްޑޫސިޓީ އަދި މާލެސިޓީ ކަމަށެވެ.

ރާއްޖެ އާއި ރާއްޖޭން ބޭރުގެ އޮބްޒާވަރުންނާއި މޮނިޓަރުން ހިމެނޭގޮތަށް 8499 ފަރާތަކުން، މިމަހު ނުވަނަ ދުވަހު ބާއްވާ ރިޔާސީ އިންތިހާބުގެ ކަންކަން އޮބްޒާވް ކުރާނެ ކަމަށް އިލެކްޝަންސް ކޮމިޝަނުން ވަނީ ބުނެފައެވެ.

ހަބީބު ވިދާޅުވީ، އިންތިހާބުގެ ކަންކަން ބެލެހެއްޓުމަށްޓަކައި، އިންޓަޝޭނަލް އޮބްޒާވަރުންގެ ގޮތުގައި 143 ފަރާތް މިހާރު އެކްރެޑިޓް ކޮށްފައިވާ ކަމަށެވެ. އަދި އިންޓަނޭޝަނަލް މޮނިޓަރުންގެ ގޮތުގައި 22 ފަރާތް އެކްރެޑިޓްކޮށްފައިވާ ކަމަށެވެ.

އޮބްޒާވަރުނާއި މޮނިޓަރުންނާއި ކެނޑިޑޭޓުންގެ މަންދޫބުންގެ ގޮތުގައި ރާއްޖޭން އެކަނިވެސް 8334 މީހުން މި އިންތިހާބުގެ ކަންކަން ބަލަމުން ގެންދާނެ ކަމަށް ހަބީބް ވިދާޅުވިއެވެ. މީގެ ތެރެއިން އޮބްޒާވަރުންގެ ގޮތުގައި 3034 މީހުން އެކްރެޑިޓް ކޮށްފައިވާ ކަމަށާއި، މޮނިޓަރުންގެ ގޮތުގައި 3810 މީހުން އެކްރެޑިޓް ކޮށްފައިވާ ކަމަށް ކޮމިޝަނުން ބުނެއެވެ.

ކެންޑިޑޭޓުންގެ މަންދޫބުންގެ ގޮތުގައި 1490 ހިމެނޭކަމަށްވެސް ހަބީބު ވިދާޅުވިއެވެ. ރާއްޖޭން އެކަނި އިންތިހާބުގެ ކަންކަން ބަލާމީހުންގެ އަދަދު 8334 އަރާނެ ކަމަށް އޭނާ ވިދާޅުވިއެވެ.