ކ.މާފުށިން ދިރިއުޅުމަށް ބަންޑާރަ ގޯތި ދޫކުރުމަށް ހުޅުވާލުމާއި ގުޅިގެން ފޯމު ހުށަހެޅި ފަރާތްތަކުގެ ތެރެއިން ގޯތި ލިބޭ ފަރާތްތަކުގެ ދާއިމީ ލިސްޓު މާފުށީ ކައުންސިލުން އާންމުކޮށްފިއެވެ.
މާފުށީ ކައުންސިލުން ކޮށްފައިވާ އިއުލާނެއްގައި ބުނެފައިވަނީ ގޯތި ލިބޭ ފަރާތްތަކުގެ ވަގުތީ ލިސްޓު ތިންވަނަ ފަހަރަށް ޢާއްމުކޮށް ޝަކުވާ ހުށަހެޅުމަށް ހުޅުވާލުމަށްކުރި އިޢުލާނާއި ގުޅިގެން ކ. މާފުށިން ބަންޑާރަ ގޯއްޗަށް އެދި ފޯމު ހުށަހެޅި ފަރާތްތަކަށް ޕޮއިންޓު ލިބިފައިވާ ގޮތުގެ ވަގުތީ ލިސްޓާއި ގުޅޭގޮތުން ހުށަހެޅުނު ޝަކުވާތަކާއި ދައުލަތުގެ އިދާރާތަކުން ހޯދުނު މަޢުލޫމާތުތަކުގެ މައްޗަށް ބިނާކޮށް، ވަގުތީ ލިސްޓަށް ގެންނަންޖެހުނު ބަދަލުތައް ގެނައުމަށްފަހު، ޕޮއިންޓު ލިބިފައިވާ ގޮތުގެ ދާއިމީ ލިސްޓު އިޢުލާނުކުރާކަމަށެވެ.
މާފުށިން ދޫކުރަން ނިންމާފައިވަނީ 2000 އަކަފޫޓުގެ 308 ބަންޑާރަ ގޯއްޗެވެ. މާފުށި ހިއްކި ބިމުން ގޯއްޗަށް އެދުމުގެ ފުރުސަތު އެންމެ ފުރަތަމަ ހުޅުވާލީ މިދިޔަ މާޗު މަހުގެ 30 ވަނަ ދުވަހުއެވެ. އޭރު އާންމު ކުރި އުސޫލަށް ބަދަލުތަކެއް ގެނައުމާއެކު އަލުން އެ ފުރުސަތު އޭޕްރިލް މަހު ހުޅުވާލިއެވެ. އެންމެ ފުރަތަމަ ގޯއްޗަށް އެދުމުގެ ފުރުސަތު ހުޅުވާލިއިރު ކޮންމެ ރަށެއްގެ މީހަކަށް ވެސް ކުރިމަތިލެވޭ ގޮތަށް ކައުންސިލުން ފުރުސަތު ދިނެވެ. ނަމަވެސް ފަހުން މާފުށީގެ ރަށްވެހި ނޫން މީހެއްނަމަ 30 ޕޮއިންޓް އުނިކުރާ ގޮތަށް ގަވާއިދަށް އިސްލާހު ގެނައެވެ.
މާފުށިން ބަންޑާރަ ގޯތި ދޫކުރަނީ މާފުށީގައި އަލަށް ހިއްކާފައިވާ 25 ހެކްޓަރުގެ ބިމުންނެވެ. އެއީ މާފުއްޓާ ކައިރިން އެ ރަށު ފަޅުން ހިއްކި ބިމެކެވެ. މި ބިމާ މާފުއްޓާ ގުޅުވާލާނީ ކޯޒްވޭއަކުންނެވެ.
