އަންނަ ދައުރުގައި އަނގޮޅިތީމު ބަނދަރުގެ މައްސަލަ ހައްލުކޮށްދެއްވައި، ރަށް ވަށައިގެން ދަތުރުކުރެވޭނެ މަގެއް ތަރައްގީކުރައްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
"އުފާވެރި އަމާންރާއްޖެ" ކެމްޕޭނަށް ރ. އަނގޮޅިތީމަށް ވަޑައިގެން ބޭއްވެވި ބަނދަރު ބައްދަލުވުމުގައި ވާހަކަފުޅުދައްކަވަމުން ރައީސް ވިދާޅުވީ، ޕާޓީތަކުގެ މެންބަރޝިޕަށް ބަލާއިރު މިހާރު އޮތީ އެންމެ ބޮޑު ކޯލިޝަން ކަމަށެވެ. އަދި އެއްބުރުން މި އިންތިޚާބު ކާމިޔާބުކުރެއްވޭނެ ކަމަށެވެ. ރައީސް ވިދާޅުވީ 90 އިންސައްތަ މީހުން ވޯޓު ލިޔަސް އެ ހުންނެވީ 130،000 ވޯޓު ޔަގީން ކުރައްވައިގެން ކަމަށެވެ.
ރައީސް ވިދާޅުވީ ސިޔާސަތުތައް ކުރިއަށް އޮތް ދައުރުގައި ތަންފީޒުވެގެން ދާއިރު އަނގޮޅިތީމަށް ބަދަލުތަކެއް އަންނާނޭ ކަަމަށެވެ. ލޯކަލް ޓުއަރިޒަމް ތަރައްގީވެގެން އަންނައިރު އެކަމަށް ބޭނުންވާ ފައިސާ ފަސޭހައިން ލިބޭނެ ގޮތް އަންނަ ދައުރުގައި ހަމަޖެހިގެން ދާނެކަމަށެވެ. ރައީސް ވަނީ ލޯކަލް ޓުއަރިޒަމް ފެށުމަށް ރައްޔިތުން ތައްޔާރަށް ތިބުމަށް އެދިވަޑައިގެންފައެވެ.
ރައީސް ވިދާޅުވީ ކުރިއަށް އޮތް ދައުރުގައި އަނގޮޅިތީމަށް ގެންނަން ބޭނުންވާ ތަރައްގީގެ މަސައްކަތްތަކެއް އެބަހުރި ކަމަށެވެ. އެގޮތުން ރަށުގެ ބަނދަރަށް ދިމާވެފައިވާ ނެރުގެ މައްސަލަ ރައްޔިތުން އެދޭގޮތަށް އިރުމައްޗަށް ބަދަލުކޮށް ޓީ ޖެޓީއަކާއެކު މަސައްކަތް ކޮށްދެއްވާނެކަމަށް ވިދާޅުވިއެވެ. އަދި އެއާއެކު މޫދަށް އެރޭނެ ސަރަހައްދަކާއި ގިރާ ސަރަހައްދު ތަރައްގީކުރުން ހިމެނޭކަމަށް ރައީސް ވިދާޅުވިއެވެ. މީގެ އިތުރުން ރަށުގެ ބޮޑު 3 މަގާއި ރަށް ވަށައިގެން މަގެއް ހެދިގެންދާނެ ކަމަށެވެ.
މީގެ އިތުރުން ޑަބްލިއުޑީސީގެ މެންބަރުންނަށް މަސައްކަތް ކުރެވޭނެ އިމާރާތަކާއި، ހޭންޑްބޯލް ކޯޓަކާއި، ޕޮލިސް ޕޯސްޓެއް ގާއިމްކުރެވިގެންދާނެ ކަމަށް ރައީސް ވިދާޅުވިއެވެ.
