ޒޫމަލްއަށް ކުރާ ޓެރަރިޒަމާ ގުޅޭ ދައުވާގައި 3 ހެއްކެއްގެ ހެކިބަސް ނަގައިފި
ފޯނުތަކަކާއި، ޓެބްލެޓެއްގެ އިތުރުން ލެޕްޓޮޕް ފަދަ ބައެއް ތަކެއްޗަކީ ޒޫމަލްގެ ތަކެތިކަމަށް އޭނާ ބުނެފައިވޭ
ކްރިމިނަލް ކޯޓް
6 މެއި 2021 ގެ ޓެރަރިސްޓު ހަމަލާއާ ގުޅިގެން ހިންގި ތަހުގީގަށްފަހު ޓެރަރިޒަމާ ގުޅުންހުރި ދައުވާއެއް އުފުލާފައިވާ މުޙައްމަދު ޒޫމަލް ޒަރީރުގެ މައްސަލައިގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ހެކިބަސް ނެގުމަށް ބޭއްވި މި އަޑުއެހުމުގައި ފުރަތަމަ ހެކިވެރިއެއްގެ ގޮތުގައި ހާޒިރުކޮށްފައިވަނީ ދިވެހި ފުލުހުންގެ ޚިދުމަތުގެ ސްޕެޝަލް އޮޕަރޭޝަންގައި މަސައްކަތް ކުރާ ފުލުހެކެވެ.
ހެކިބަސް ދެއްވަމުން އޭނާ ވިދާޅުވީ، ކޯޓު އަމުރެއްގެ ދަށުން ޒޫމަލް ދިރިއުޅޭތަން ބަލައި ފާސްކުރުމަށް ދިޔަ ޓީމުގައި އޭނާ ހިމެނޭ ކަމަށެވެ. އެގޮތުން ބަލައިފާސްކޮށް ފޯނާއި ލެޕްޓޮޕާއި، ޓެބްލެޓަކާއި ހާޑް ޑްރައިވެއް ފުލުހުންގެ ބެލުމުގެ ދަށަށް ގެނެވިފައިވާކަމަށް ހެކިވެރިޔާ ވިދާޅުވިއެވެ.
ދެވަނައަށް ހާޒިރުކުރީ ދިވެހި ފުލުހުންގެ ޚިދުމަތުގެ ޑިޖިޓަލް އެވިޑެންސް ލެބޯޓަރީގައި ފޮރެންސިކް އެގްޒެމިނަރެއްގެ މަޤާމު ފުރުއްވަމުން ގެންދަވާ ފަރާތެކެވެ. އޭނާ ވަނީ ޑިޖިޓަލް އެވިޑެންސްތަކުގެ ރިޕޯޓު ތައްޔާރު ކުރައްވާފައެވެ.
ހެކިވެރިޔާ ވިދާޅުވީ، ޖިހާދަށް މީހުން ރެކްރޫޓު ކުރުމާއި، ޤައުމީ ސަލާމަތަށް ނުރައްކާވާ ޒާތުގެ މައުލޫމާތު ހުރިތޯ ބަލާފައިވާނެ ކަމަށާއި، އެފަދަ ޑޭޓާތައް ފެނިފައިވާކަމަށެވެ.
އަދި ނަގާފައިވާ ހެކިތަކުން ޑޮކިއުމަންޓުތަކަކާއި ފޮޓޯތަކެއް ފެނިފައިވާ ކަމަށް ހެކިވެރިޔާ ވިދާޅުވިއެވެ.
އެ ޑޭޓާތައް އެނަލައިޒްކޮށް ބެލިއިރު، ދީނީ ގޮތުން ހިޔާލު ތަފާތުވުން ފެތުރިދާނެ ފަދަ ޑޭޓާތަކާއި، ދީނީ އެއްބައިވަންތަކަން ނަގާލުމަށް މަގުފަހިވާ ޒާތުގެ ޑޭޓާ، އަދި ޓެރަރިސްޓު ޖަަމާއަތްތަކާއި ގުޅޭ ޑޭޓާތަކާއި، އައިސިސް ޖަމާއަތްތަކާ ގުޅުންހުރި މީހުންގެ ފޮޓޯއާއި ލޯގޯ ފެނިފައިވާކަމަށް ހެކިވެރިޔާ ވިދާޅުވިއެވެ.
އޭގެ އިތުރުންވެސް، ޓެރަރިސްޓު ޖަމާއަތްތަކުގެ ލިއެކިއުންތައް ޕަބްލިޝްކުރާ ޕަބްލިކޭޝަނަކުން ނެރިފައިވާ ލިއެކިއުންތަކެއްވެސް ހިމެނޭކަމަށް އެ ހެކިވެރިޔާ ވިދާޅުވިއެވެ.
ތިންވަނައަށް ހާޒިރުކޮށްފައިވަނީވެސް ދިވެހި ފުލުހުންގެ ޚިދުމަތުގައި މަސައްކަތް ކުރައްވަމުން ގެންދަވާ ފަރާތެކެވެ. އޭނާއަކީވެސް ޒޫމަލް ދިރިއުޅޭ އެޕާޓްމަންޓު ބަލައި ފާސްކުރުމަށް ދިޔަ ޓީމުގައި ހިމެނޭ ފަރާތެކެވެ. އޭނާ ވަނީ އެތަނުން މާއްދީ ހެކިތައް ނަގައި އެ ހެކިތައް ސީލްކޮށްފައެވެ.
ހެކިވެރިޔާ ވިދާޅުވީ، ފޯނުތަކަކާއި، ޓެބްލެޓެއްގެ އިތުރުން ލެޕްޓޮޕް ފަދަ ބައެއް ތަކެއްޗަކީ ޒޫމަލްގެ ތަކެތިކަމަށް އޭނާ ބުނެފައިވާ ކަމަށެވެ.
މީގެ އިތުރުންވެސް އިތުރު ހެކިންގެ ހެކިބަސް ނެގުން ކުރިއަށް ގެންގޮސްފައިވެއެވެ.
