މީކާއީލު ވިދާޅުވީ އެކަން ބަދަލުކުރަން ބޭނުންވާނަމަ އެކަން ބަދަލު ވެގެންދާނީ އަނިޔާވެރިކަމަށް ކަމަށް
ގަލޮޅު ދެކުނު ދާއިރާގެ މެމްބަރު، މީކާއީލު އަހުމަދު ނަސީމް
ކޮންމެ ފަސް އަހަރެއް ނިމޭއިރު ރާއްޖޭގައި ވަރަށް ބޮޑަށް ބަދަލުގެ ރޫހު އާލާވަމުންދާތަން ފެންނަމުންދާކަމަށާއި، ނަމަވެސް ބޭނުންވާ ބަދަލު 2018ގައި ގެނެސް ނިންމާފައިވާކަމަށް، ގަލޮޅު ދެކުނު ދާއިރާގެ މެމްބަރު މީކާއީލް އަހުމަދު ނަސީމް ވިދާޅުވެއްޖެއެވެ.
ހުކުރު ދުވަހުގެ ރޭ ބޭއްވި އުފާވެރި މާލެ ޖަލްސާގައި ވާހަކަފުޅުދައްކަވަމުން މީކާއީލު ވިދާޅުވީ އެބަދަލު ބަދަލުކުރަން ބޭނުންވާނަމަ އެބަދަލުގެ ބަދަލު ވެގެންދާނީ އަނިޔާވެރިކަމަށްކަމަށެވެ. އެ ބަދަލު ބަދަލުވެގެންދާނީ ރާއްޖޭގައި އޮންނަ ސިޔާސީ މިނިވަންކަމާއި ފަރުދީ މިނިވަންކަމުގެ ނިމުމަށްކަމަށާއި، އެ ބަދަލު ބަދަލުކުރަން ބޭނުންނުވާކަމަށް މީކާއީލު ވިދާޅުވިއެވެ.
މީކާއީލު ދެން ވިދާޅުވެ ދެއްވީ ޅ. ހިންނަވަރު ނޫރާނީއާގެ އިބްރާހީމް މުހައްމަދު ސާލިހަށް ވޯޓު ދެއްވާނެ ސަބަބުތަކެވެ.
މީކާއީލު ވިދާޅުވީ މަތީ ތައުލީމުގެ ފުރުސަތު މިހާރު ޕްރައިމަރީގައި ކިޔަވަމުންދާ ދަރިވަރަށްވެސް ކަށަވަރުވެފައިވާކަމަށެވެ.
މީގެއިތުރުން ރާއްޖޭގެ ތާރީޚުގައިވެސް ކޯލިޝަން ސަރުކާރެއް ފަސް އަހަރަށް ދެމެހެއްޓުނު މިއީ ފުރަތަމަ ފަހަރުކަމަށާއި، ނަމަވެސް ރައީސް ސާލިހަށް ވޯޓު ދެއްވަނީ ކޯލިޝަން ހިފަހައްޓާފައިވާތީ ނޫންކަމަށެވެ. ނަމަވެސް އެމަނިކުފާނު ރައްޔިތުންނަށް ދެއްވި އިތުބާރާއި ބަސްފުޅުގެ އިތުބާރާއި ނަފުސުގެ އިތުބާރުގެ މައްޗަށް ކަމަށް މީކާއީލު ވިދާޅުވިއެވެ.
