އައްޑޫ ސިޓީ މަރަދޫފޭދޫގައި ހިންގި މާރާމާރީގައި އަމިއްލަ ބޭބެ މަރާލި މައްސަލައިގައި ސ މަރަދޫފޭދޫ ބްލޫސްޓަރ ހުސައިން މަވާޒުގެ މައްޗަށް އުފުލާފައިވާ ދައުވާގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ދައުލަތުން ވަނީ ދައުވާ އިއްވައި ދައުވާ ސާފު ކޮށްދީފައެވެ. ބުރާސްފަތި ދުވަހު ކުރިއަށް ގެންގޮސްފައިވަނީ ދައުވާއަށް ޖަވާބުދާރީވުމެވެ.
މި އަޑުއެހުމުގައި ވާހަަކަ ދައްކަމުން އޭނާ ބުނީ، އޭނާ ދައުވާއަށް އިއުތިރާފުވާ ކަމަށާއި، އެދެނީ ވީހާވެސް ލުއި އަދަބެއް ދިނުމަށް ކަމަށެވެ.
އޭނާ ކުރިއަށްދާން ބޭނުންވަނީ ތަހުގީގުގައި ދީފައިވާ އިއުތިރާފު ބަޔާނާ އެއްގޮތަށް ކަމަށާއި، އެ ވާހަކަތައް މިހާރު ދައްކަން އުނދަގޫކަމަށްވެސް އޭނާ ބުންޏެވެ.
އޭނާގެ މައްޗަށް ކޮށްފައިވަނީ އެނގިހުރެ މީހަކު މެރުމުގެ ކުށުގެ ދައުވާއެވެ.
ގާޒީ ވަނީ އޭނާގެ އިއުތިރާފަކީ ސައްޚަ އިއުތިރާފެއްތޯ ކަށަވަރު ކުރުމަށް ކުރައްވަންޖެހޭ ސުވާލުތައް ކުރައްވާފައެވެ.
އެ ސުވާލުތަކުގެ ޖަވާބުގައި އޭނާ ވަނީ ކަން ހިނގާދިޔަ ގޮތް ރޮމުން ޝަރީއަތުގައި ކިޔާދީފައެވެ.
އޭނާ ބުނީ، މި ޙާދިސާއަކީ 31 މެއި 2023 ވަނަ ދުވަހުގެރޭ ހިނގާ ދިޔަ ޙާދިސާއެއް ކަމަށެވެ. އެރޭ ބޭބެއާ ރެސްޓޯރަންޓަކުން ދިމާވި ކަމަށާއި، އެތަނުން ބޭބެގެ ފޯނު ނަގައިގެން އޭނާ ދިޔައީކަމަށް ބުންޏެވެ.
އޭނާ ބުނީ، ގެއަށް ދިޔައީ މަސްތުވާއެއްޗެއް (ބޮގަރު) ބަލައި ކަމަށާއި، ގެއަށް އައުމުން ބޭބެ ސުވާލު ކުރި ކަމަށެވެ. ސުވާލު ކުރުމުން، ސިމާއެކު ބޭބެގެ ފޯނު ވިއްކާލިކަމަށް ބުނި ކަމަށާއި، އެހިސާބުން ހަމަނުޖެހުން އުފެދި މާރާމާރީ ހިނގަން މެދުވެރިވީކަމަށް އޭނާ ބުންޏެވެ.
އޭރު އޭނާ ހުރީ ރާބޮއިގެންކަމަށް އޭނާ ޝަރީއަތުގައި ބުންޏެވެ.
އޭނާ ބޭބެއަށް ޙަަމަލާދިނީ 3 އިންޗި ބައިގެ ތިލައެއް ހުރި ކަތުރަކުންކަމަށާއި، ޙަމަލާ އަމާޒުވީ ބޭބެގެ ވާއަތު ކަރާއި ދިމާލުން ތިރިއަށް މެއަށްކަމަށް އޭނާ ބުންޏެވެ.
އެކަންކަން އޭނާގެ ހަނދާނުގައި އެބަހުރިކަމަށް އޭނާ ޝަރީއަތުގައި ބުންޏެވެ.
މަންމަ އައިސް އަޅުގަނޑު ގައިގައި ތަޅަންވެސް ތެޅި، އަޅުގަނޑަށް ބިރެއް އިހުސާސް ކުރެވުނު އަޅުގަނޑަށް ކުރެވުނު ކަންތަކަށްސ މަރަދޫފޭދޫ ބްލޫސްޓަރ ހުސައިން މަވާޒު
ބޭބެ މަރުވިކަން އެނގުނީ ޖެހިގެން އައި ދުވަހު ހޮސްޕިޓަލަށް އޭނާގެ ދެބެންގެ ދެދަރި ކޮށްކޮއަކު ފޮނުވައިގެން ޚަބަރު ބެލުމުން ކަމަށާއި، ބޭބެއަށް ބޭނުންވާ ލޭ ހޯދުމަށްވެސް އޭނާ މަސައްކަތް ކުރިކަމަށް އޭނާ ބުންޏެވެ.
ރައްޓެއްސަކު ބުނި ވަރަށް ކަޑައޭ، މަރުވެއްޖޭ، އަޅުގަނޑު 4 ފަހަރު ސުވާލު ކުރެވުނު، އަޅުގަނޑު ބުނިން އަޅުގަނޑު ދާނީ އަޅުގަނޑު އަމިއްލައަށް ހައްޔަރުވާށޭ، އޭރު ބައްޕަވެސް ގުޅާފައި ބުނި، އަޅުގަނޑަށް މާފު ކޮށްފީމޭ، އެނގެއޭ ގަސްތުގައި އަޅުގަނޑު ބޭބެ މަރާނުލާނެކަމަށް، ދެން އަޅުގަނޑު އަމިއްލައަށް ދިޔައީ ފުލުހަށްސ މަރަދޫފޭދޫ ބްލޫސްޓަރ ހުސައިން މަވާޒު
ދައުލަތުން ވަނީ މި މައްސަލައިގައި އޭނާއާއެކު ވެފައިވާ އިއުތިރާފު އެއްބަސްވުމެއް ކޯޓަށް ހުށައަޅާފައެވެ.
އޭނާގެ މައްޗަށް 2019 ވަނަ އަހަރު ކުރި ރޭޕްކުރުމުގެ ކުށުގެ ދައުވާއެއް ސާބިތުވާކަމަށް 13 އޯގަސްޓު 2023ގައިވެސް ވަނީ ކްރިމިނަލް ކޯޓުން ޙުކުމެއް އައިސްފައެވެ. އެކަމާ ގުޅިގެން އޭނާގެ އަދަބުގެ ދަރަޖަ މަތިކޮށްފައިވާއިރު، ދައުލަތުން ވަނީ އިއުތިރާފާއި، ކުށް ހިނގާދިޔަ ގޮތަށް ބަލާއިރު، އޭނާގެ މައްޗަށް ކަނޑައަޅަން ދައުލަތުން އެދޭ އަދަބާ ގުޅޭ ތަފްސީލުތައް ހިއްސާ ކުރައްވާފައެވެ.
އެގޮތުން ބަލާއިރު، އިއުތިރާފު އެއްބަސްވުން ބަލައިގަންނަ ޙާލަތުގައި އޭނާގެ މައްޗަށް އަންނާނީ 12 އަހަރާއި 6 މަސް ދުވަހުގެ ޖަލު ޙުކުމެއްކަމަށް ދައުލަތުގެ ވަކީލު ވިދާޅުވިއެވެ.
ދިފާއީ ވަކީލު ވިދާޅުވީ، އޭނާ އަމިއްލައަށް ފުލުހަށް ހާޒިރުވުމާއި، ތަހުގީގަށް އެއްބާރުލުން ދީފައިވުމާއި، އެކަންކަމަށް ބަލާއިރު، އޭނާއަށް ލުއި އަދަބެއް ދޭން ދިފާއުން އެދޭ ކަމަށެވެ.
ހެކި ހޯދުމަށްވެސް ފުލުހުންނަށް ފަސޭހަވެގެން ދިޔައީ އޭނާ ދިން އެއްބާރުލުމާއި އެކުގައިކަމަށާއި، ކަތުރު އޮތްތަންވެސް ދެއްކީ އޭނާކަމަށް ދިފާއީ ވަކީލު ވިދާޅުވިއެވެ.
ގާޒީ ވަނީ އިއުތިރާފު އެއްބަސްވުން ދަމަހައްޓަން ބޭނުންވޭތޯ މަވާޒު ގާތުގައި ސުވާލު ކުރައްވާފައެވެ. އެގޮތުން ގާޒީ ވިދާޅުވީ، އިއުތިރާފު އެއްބަސްވުމާއެކު ކުރިއަށްދާން ބޭނުންވާނަމަ، ކަނޑައެޅޭނީ އެ އެއްބަސްވުމުގައި އޮތް އަދަބެއް ކަމަށެވެ.
އެއަށްފަހު އަވަސްނިޔާގެ އަޑުއެހުމެއް ކުރިއަށް ގެންދަވައި ގާޒީ ވަނީ އޭނާ ވެފައިވާ އިއުތިރާފަކީ ސައްޙަ އިއުތިރާފެއްކަމަށް ކަނޑައަޅުއްވާފައެވެ. އަދި އޭނާގެ މައްޗަށް ކޮށްފައިވާ އެނގިހުރެ މީހަކު މެރުމުގެ ކުށުގެ ދައުވާ ސާބިތުވާކަމަށް ގާޒީ ވަނީ ނިންމަވާފައެވެ.
ގާޒީ ވިދާޅުވީ، އަދަބު ކަނޑައެޅުމަށްޓަކައި އިއުތިރާފު އެއްބަސްވުން ދަމަހައްޓަން ބޭނުންވާކަން ނުވަތަ ނޫންކަން ދެން އޮންނަ އަޑުއެހުމެއްގައި އަންގަންވާނެ ކަމަށާއި، އެއަށްފަހު އަދަބާ ގުޅޭގޮތުން ދައްކަން ހުރި ވާހަކައެއް ދެއްކެވުމަށް ފުރުސަތު ދެއްވުމަށްފަހު ޙުކުމް ކުރައްވާނެ ކަމަށެވެ.
ކްރިމިނަލް ކޯޓުގައި މި މައްސަލަ ބައްލަވަނީ އެކޯޓުގެ އިސްގާޒީ އާދަމް މުޙައްމަދެވެ.
