ގަތަރު ވޯލްޑް ކަޕްގައި ޗެލްސީގެ ތަރި ރަހީމް ސްޓާލިންގެ ގެއަށް ވަދެ ވައްކަންކުރި މައްސަލައެއްގައި މީހެއްގެ މައްޗަށް ދައުވާކޮށްފި އެވެ.

ސްޓާލިން އިންގްލެންޑާއެކު ގަތަރުގައި ހުރިއިރު، ސަރީގެ އޮކްސްޝޮޓް ގައި ހުރި އޭނާގެ ގެއިން ތިން ލައްކަ ޕައުންޑުގެ ގަހަނާއާއި ގަޑިތަކެއް ވަގަށް ނަގާފައިވާ ކަމަށް ރިޕޯޓުތައް ބުނެއެވެ. މިކަން ހިނގުމާއެކު 3 ޑިސެމްބަރު 2022 ގައި ސްޓާލިން ވަނީ އިންގްލެންޑުގެ ވޯލްޑް ކަޕް ކޭމްޕް ދޫކޮށް އާއިލާ ކައިރިޔަށް ގޮސްފައެވެ.

ސަރީ ފުލުހުން ބުނީ ވައްކަން ކުރަން ރޭވުމުގެ 33 ދައުވާއެއް މީހެއްގެ މައްޗަށް އުފުލާފައިވާ ކަމަށެވެ. އެ ފޯސްގެ ތަރުޖަމާނަކު ވިދާޅުވީ އުމުރުން 23 އަހަރުގެ އެމިލިއާނޯ ކްރޮސީގެ މައްޗަށް ދައުވާކޮށް ބަންދުގައި ބަހައްޓަން އަމުރުކޮށްފައިވާ ކަމަށެވެ. އަދި ސެޕްޓެންބަރު މަހުގެ 21 ވަނަ ދުވަހު އޭނާ ކޯޓަށް ހާޒިރުކުރާނެ ކަމަށް ވަނީ ބުނެފައެވެ. ތަރުޖަމާނު އިތުރަށް ބުނީ، ކްރޮސީގެ މައްޗަށް އުފުލާފައިވާ ދައުވާތަކުގެ ތެރޭގައި، ޑިސެމްބަރު ތިންވަނަ ދުވަހު ސްޓާލިންގެ ގެއިން ވައްކަން ކުރި މައްސަލަ ހިމެނޭކަމަށެވެ.

މި މަހުގެ ކުރީކޮޅު ފުލުހުން ބުނީ އިންކުއަރީގެ ހުރިހާ ލައިންތަކެއް ކުރިއަށް ގެންގޮސްފައިވާ ކަމަށާއި އާ މައުލޫމާތެއް ލިބެންދެން އެ މައްސަލަ ފައިލްކޮށްފައި ބަހައްޓާނެ ކަމަށެވެ.