ފުލަމް ކައިރިން ޕެނަލްޓީ ޖަހައިގެން ބަލިވެ، އިނގިރޭސި ލީގު ކަޕުން ޓޮޓެންހަމް ކަޓައިފިއެވެ.

އަންގާރަ ދުވަހު ލީގު ކަޕުގައި ކުޅުނު މެޗުގެ 19 ވަނަ މިނެޓުގައި ޓޮޓެންހަމްގެ މިކީ ވެން ޑި ވެން އަތުން ބައިކޮޅަށް ލަނޑެއް ވަދެ، ފުލަމް އަށް ވަނީ ކުރިލިބިފައެވެ. ކެނީ ޓެޓޭ ބޫޓު ބަދަލުކުރަން ޖެހުމުން ފުލަމް ޓީމު ވަގުތީ ގޮތުން 10 ކުޅުންތެރިންނަށް މަދުވި އިރު ރިޗާލިސަންގެ ލަނޑާއެކު ސްޕާސް އިން ވަނީ ފުރިހަމަ ފައިދާ ނަގައިފަ އެވެ.

މެޗުގެ ފުރަތަމަ ހާފުގައި މޮޅަށް ކުޅެފައިވަނީވެސް ފުލަމް އިންނެވެ. ފުރަތަމަ ހާފު ނިމެން ކައިރިވެފައިވަނިކޮށް ފުލަމް އަށް ވަނީ ރަނުގެ ފުރުސަތެއް ލިބިފައެވެ. ނަމަވެސް، ރޮޑްރިގޯ މުނިޒް ފޮނުވާލި ބޯޅަ، ޓޮޓެންހަމްގެ ކީޕަރު ފްރޭޒާ ފޯސްޓާ ވަނީ މަތަކޮށްފައެވެ.

މެޗުގެ ފުރިހަމަ ވަގުތު ހަމަވިއިރު ދެ ޓީމު ވަނީ 1-1- ގެ ނަތީޖާއަކުން އެއްވަރު ވެފައެވެ. ޓޮޓެންހަމްގެ ޑެވިންސަން ސަންޗޭޒް ޖެހި ޕެނަލްޓީ ވަނީ ނާކާމިޔާބުވެފައެވެ. ފުލަމް އިންވަނީ ޖެހި ފަސް ޕެނަލްޓީވެސް ކާމިޔާބުކޮށްފައެވެ. މެޗުން މޮޅުވިއިރު، ފުލަމްގެ ކޯޗު މެޗު ބަލަން ޖެހުނީ ސްޓޭންޑުންނެވެ. އެއި ލީގުގެ ފުރަތަމަ ތިން މެޗުގައި ތިން ރީންދޫ ކާޑު ދައްކާފައިވުމުންނެވެ.

މިއާއެކު ޓޮޓެންހަމް ވަނީ ލީގު ކަޕުގެ ދެވަނަ ބުރުން ކަޓާފައެވެ. ފުލަމްގެ އިތުރުން، ޕްރިމިއަރ ލީގުގެ ބޯންމައުތު، ލޫޓަން ޓައުން، ކްރިސްޓަލް ޕެލެސް، ވޮލްވްސް އަދި ބްރެންޓްފޯޑް ވަނީ ދެވަނަ ބުރުގެ މެޗުން މޮޅުވެފައެވެ.