ފުލުހުން މަޑުކުރަން ބުނުމުން މަޑުނުކޮށް ދިޔަ މީހަކު 21،000 ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ޙުކުމްކޮށްފިއެވެ.
މި މައްސަލައިގައި ދައުލަތުން ދައުވާކޮށްފައިވަނީ ޏ.ފުވައްމުލަކު ޒުވާނެއްގެ މައްޗަށެވެ.
އޭނާގެ މައްޗަށް ދައުލަތުން އުފުލާފައިވަނީ ޤާނޫނު ތަންފީޒުކުރާ މުވައްޒަފެއްގެ މަސައްކަތަށް ގަސްތުގައި ހުރަސް އެޅުމުގެ ކުށުގެ ދައުވާއެވެ.
އެ ދައުވާ އޭނާގެ މައްޗަށް ކޮށްފައިވަނީ 2020 ވަނަ އަހަރުގެ ޑިސެމްބަރު މަހު ފުލުހުން ޕެޓްރޯލް ކުރަމުންދަނިކޮށް އޭނާ ފެނިގެން މަޑުކުރަން ބުނުމުން، މަޑުނުކޮށް ގޮސްފައިވާތީއެވެ.
ޏ ފުވައްމުލަކު މެޖިސްޓްރޭޓު ކޯޓުގައި މި މައްސަލަ ކުރިއަށްދިޔައިރު، އިބްތިދާއީ މަރުޙަލާގައި އޭނާ ކުށަށް އިއުތިރާފުވެފައިވާތީ، އަވަސްނިޔާގެ އަޑުއެހުމެއް ކުރިއަށް ގެންދިއުމަށްޓަކައި މި މައްސަލަ ވަނީ ކްރިމިނަލް ކޯޓަށް ބަދަލުކޮށްފައެވެ.
އަވަސްނިޔާގެ އަޑުއެހުމުގައިވެސް އޭނާ އިއުތިރާފު ދަމަހައްޓާފައިވާތީ ޝަރީއަތުން ވަނީ އޭނާގެ އިއުތިރާފަކީ ސައްޙަ އިއުތިރާފެއްކަމަށް ކަނޑައަޅާފައެވެ.
އަދަބާ ގުޅޭގޮތުން ކޯޓުން ބުނީ، އޭނާގެ މައްޗަށް ކަނޑައެޅޭނެ އަދަބަކީ 3 މަހާއި 18 ދުވަހުގެ މުއްދަތަކަށް ޖަލަށްލުން ކަމަށެވެ.
އެހެންނަމަވެސް، އޭނާގެ ފަރާތުން ލުއި އަދަބެއް ދިނުމަށް އެދިފައިވާތީއާއި، ދައުލަތުންވެސް އޭނާގެ ޖަލު އަދަބު ޖޫރިމަނާ އަދަބަކަށް ބަދަލުކުރުމަށް އިއުތިރާޒުކޮށްފައިނުވާތީ، ޝަރީއަތުން ވަނީ އޭނާއަކީ ވަޒީފާއެއްގައި އުޅޭ ފަރާތެއްކަން އެނގޭނެ ލިއުމެއް ހުށައެޅުމަށް އަންގާފައެވެ.
އަދި އެ ލިޔުން އޭނާ ވަނީ ހުށަހަޅާފައެވެ.
ޝަރީއަތުން ވަނީ އޭނާގެ ޖަލު އަދަބު ޖޫރިމަނާ އަދަބަކަށް ބަދަލު ކުރެއްވުމަށް ނިންމަވައި، 21،000 ރުފިޔާއިން އޭނާ ޖޫރިމަނާކުރުމަށް ނިންމަވާފައެވެ.
އަދި އެ ފައިސާ 3 މަސް ދުވަހުގެ ތެރޭގައި މީރާއަށް ދެއްކުމަށް ޙުކުމުގައިވެއެވެ.
ކްރިމިނަލް ކޯޓުގައި މި މައްސަލަ ނިންމެވީ ގާޒީ ހުސައިން ފާއިޒް ރަޝާދެވެ.
