ޢުމްރާނީ ބިނާވެށީގެ ހިތްގައިމު ކަމާއި ޒަމާނީ ޓެކްނޮލޮޖީގެ އިންގިލާބީ މަންޒަރުތަކެއް އެއް ތަނަކުން ފެނިގެންދާ އެއް މަންޒިލް ކަމަށްވާ ދުބާއީގައި ކޮންމެ ދުވަހަކުވެސް މެންދުރު 12:30ގައި ވަރުގަދަ އިއުލާނެއް ކުރެއެވެ. މެގަފޯން ހިފައިގެން ހުރި މީހާ ހަނދާންކޮށްދެމުން އެ ދަނީ ދުވަސް ދެބައިވާ ހިސާބުން ކޮންމެ ލޭބަރަކަށްވެސް ނަގަން ލާޒިމުވާ 3 ގަޑިއިރުގެ ހުސް ވަގުތުކޮޅު ނެގުމަށެވެ. މުޅި ކޮންސްޓްރަކްޝަން ސައިޓުގެ އެކި ހިސާބުތަކުން އެ އަޑު ގުގުމައެވެ. އިއުލާނުގެ އަޑު އިވުމާއެކު، މަސައްކަތުގައި އަވަދިނެތި އުޅެމުންދާ ލޭބަރުންތައް ހުރި ހިސާބަކަށް މަސައްކަތް ހުއްޓާލުމަށްފަހު އަރާމު ކުރުމާ ދިމާއަށް މިޞްރާބު ޖަހައެވެ. މެންދުރުގެ ގަދަ ހޫނުން ސަލާމަތްވުމަށް އަވަސްވެގަނެއެވެ.
ވައިގެ ތެތްކަން ނުވަތަ ހިއުމިޑިޓީ އިންތިހާއަށް މަތިވުމާއެކު ފިނިހޫނުމިންވެސް 44 ޑިގްރީ ސެލްސިއަސްއަށްވުރެ މައްޗަށް އަރައިގެންދާ ދުބާއީގައި އަރަމުންދާ އިމާރާތްތަކުގެ މަސައްކަތްތަކެއްވެސް ހުއްޓުމަކަށް ނާދެއެވެ. އާދަޔާ ޚިލާފަށް އުސް އިމާރާތްތަކަށް މަޝްހޫރު ދުބާއީގައި ހާމައަށް އޮންނަ ސަރަހައްދުތަކުގައި މަސައްކަތްކުރުން އޮންނަނީ މަނާކޮށްފައެވެ. އަދި މެންދުރު 12:30އާ މެންދުރުން އަނބުރާ 15:30އާ ދެމެދު، ސީދާ އަވީގައި މަސައްކަތްކުރުން ވެސް އޮންނަނީ މަނާކޮށްފައެވެ. މީ ޖޫން މަހުގެ މެދަކާ ހިސާބުން ފެށިގެން ސެޕްޓެމްބަރު މަހުގެ މެދަކާ ހިސާބަށް ތަންފީޒުކުރާ އުސޫލެކެވެ.
އެކުގައި މަސައްކަތްކުރާ މީހުންނާއެކު ހުސް ވަގުތުކޮޅަކަށް އިންސާފުކުރަމުން ދިޔަ އެކަކީ ސުނީލް ބުޖުބާލްއެވެ. ސްކެފޯލްޑަރެއްގެ ގޮތުގައި މަސައްކަތް ކުރަމުން ދާ ސުނީލްގެ ޒިންމާއަކީ، ހަދަމުން ދާ އިމާރާތުގައި ވަގުތީގޮތުން ޖަހާފައިވާ ދަގަނޑުތައް ނެއްޓުމެވެ.
ގަދަ އަވީގަ މަސައްކަތުގަ އުޅެފަ 12:30ގަ އަހަރެމެން ނަގަން ބޮޑު ބްރޭކެއް. އެއީ ވަރަށް ބޮޑު އެހީއެއް. ރަނގަޅަށް އަރާމުކޮށްލެވޭ އެގަޑީގަ. ހަށިގަނޑަށްވެސް ހަމަޖެހުން އިހުސާސްކުރެވޭ. މެންދުރުގެ ކެއުން ކައިގެން އަރާމުކޮށްލަނީ އެގަޑީގަ. ބައެއް ނިދާނެ، އަރާމުކޮށްލަން އޮންނަ ސަރަހައްދުގަ. އެއީ ހަށިގަނޑު ހަމަޖައްސާލަދީ، އިތުރަށް ބުންވަރާ ހަކަތަވެސް ގެނެސްދޭކަމެއް.ސުނީލް ބުޖުބާލް؛ ކޮންސްޓްރަކްޝަން ލޭބަރެއް
ޢުމުރުން 28 އަހަރުގެ މި ޒުވާނާ ކޮންމެ ދުވަހެއްގެ މަސައްކަތް ފަށަނީ ހެނދުނު 7 ޖަހާއިރުއެވެ. ސައިޓްގައި ރާވައި، ރޫޅާލަންޖެހޭ ދަގަނޑު ސްޓްރަކްޗަރތަކުގެ މަސައްކަތުގައި އަވަދިނެތި އުޅެނީ ގަދަ ހޫނުގައި، ދާހިއްލައި ފޯވެގެންނެވެ.
މަށަކީ ސްކެފޯލްޑަރެއް. އަހަންނަށް މުޅިންވެސް މަސައްކަތް ކުރަން ޖެހެނީ އަވީގަ. ކޮންމެ އެއް ގަޑިއިރަކުން، 5 މިނެޓާ 7 މިނެޓާ ދޭތެރޭގެ ހުސް ވަގުތުކޮޅެއް ނަގަން އަހަރެމެންނަށް މަޖުބޫރުކޮށްފަ އޮންނަނީ. އެއީ ފިނިފެން ފޮދަކާ، ލުނބޯ ފަނި ފޮދެއް ބޯލާ ހަދާލަން. ފިނި ބުއިންތައް ހަމަޖައްސައިދެނީ ކުންފުނިން.ސުނީލް ބުޖުބާލް؛ ކޮންސްޓްރަކްޝަން ލޭބަރެއް
ކޮންސްޓްރަކްޝަން ސައިޓުގައި މަސައްކަތްކުރާ ލޭބަރުންގެ މަސައްކަތު ގަޑިތައް ރާވާފައި އޮންނަނީ ގަދަ ހޫނުގެ ސަބަބުން ފުރާނައަށް ކުރިމަތިވެދާނެ ނުރައްކާތައް ވީހާވެސް ކުޑަވާނެ ގޮތްތަކަށް ބަލައިގެންނެވެ. 11 ގަޑިއިރުގެ ޝިފްޓެއްގައި މަސައްކަތްކުރާއިރު، ކޮންމެ 1 ގަޑިއިރަކުން 5 މިނެޓްގެ ހުސް ވަގުތުކޮޅެއް ނަގަން ލާޒިމުވެއެވެ. އެއީ ހަށިގަނޑަށް ބޭނުންވާ ފެން ނުވަތަ ދިޔާ މާއްދާތައް ހަމަކޮށް، ހަށިގަނޑުން ފެން މަދުވިޔަ ނުދިނުމަށް ދޭ ވަގުތުކޮޅެކެވެ.
ދަގަނޑުތައް ނެއްޓުމުގެ މަސައްކަތުގަ މިހެން އުޅޭއިރު ބޮލަށް އެނބުރުން އަރާ، ވެއްޓުމުގެ ފުރުސަތު އޮވޭ. ގަދަ އަވީގަ މަސައްކަތްކުރުމަކީ ވަރަށް ހޫނުވާ ކަމެއް. އަހަރެމެން ކަހަލަ މީހުން އަނބުރައިގަތުމުގެ ޗާންސް ވަރަށް ބޮޑު. މަސައްކަތަށް ބޭނުންވާ އާލާތްތައް ނަގާ ހަދާއިރުވެސް އަހަރެމެން ޖެހޭ ވަރަށް ސަމާލުވާން. އިރުގެ އަވިން، އެ ސާމާނުތައްވެސް ހުންނާނީ ދޮންވެފަ. އަތްލެވޭ ގޮތަކުންވެސް އަހަރެމެން ފިހިދާނެ. އެއީ އަހަރެމެންނަށް ކުރިމަތިލާންޖެހޭ މައްސަލަތަކަކީ.ސުނީލް ބުޖުބާލް؛ ކޮންސްޓްރަކްޝަން ލޭބަރެއް
މަސައްކަތުގެ ވެށީގައި ކުރިމަތިވާ ސިއްހީ ނުރައްކާތައް ވީހާވެސް ކުޑަ ކުރުމުގެ ޒިންމާ ކޮނޑު އަޅައިގެން ހުރި އޮކިއުޕޭޝަނަލް ހެލްތު އެންޑް ސޭފްޓީ އިންޖިނޭރު، ސްރަވާން މަނޯހަރަން ފާހަގަކުރިގޮތުގައި، މާ ގަދައަށް މަސައްކަތްކުރަން މަޖުބޫރު ނުކުރުމަށްވެސް އިރުޝާދުތަކުގައި ބަޔާންކޮށްފައި ވާނެއެވެ.
މާ ގަދައަށް، މާ ބުރަކޮށް މަސައްކަތް ނުކުރުވަން އޮންނަނީ. ވަރުބަލިވެގެން އަރާމުކޮށްލަން ބޭނުންވެގެން މީހަކު ބުނެފިއްޔާ، 10 މިނެޓާ 15 މިނެޓާ ދޭތެރޭގެ ހުސް ވަގުތުކޮޅެއްވެސް ދޭން ޖެހޭ. އެއީ އަހަރެމެންގެ ސުޕަވައިޒަރުންގެ ޓީމުން އިރުޝާދު ދީފަ އޮންނަ ގޮތް. އެކަން އެގޮތަށް ހިނގަމުން ދަނީ. ތެދު ތެދަށް ބުނަންޏާ، ބައެއް ދުވަސްދުވަހަށް ވަރަދަ ހޫނު ގަދަވޭ. ވައިގެ ތެތްކަންވެސް އިތުރުވޭ. ބައެއް ދުވަސް ދުވަހު، ހެނދުނު 8 ޖަހާއިރުވެސް އަހަރެމެން އެބަޖެހޭ ބޭރު ތެރޭގަ ކުރާ މަސައްކަތްތައް ހުއްޓާލަން.ސްރަވާން މަނޯހަރަން؛ އޮކިއުޕޭޝަނަލް ހެލްތު އެންޑް ސޭފްޓީ އިންޖިނޭރު
މި ދުވަސްވަރަކީ ދުނިޔޭގެ އެކި ހިސާބުތަކަށް އާދަޔާ ޚިލާފަށް ހޫނު ގަދަވަމުންދާ ދުވަސްވަރެކެވެ. ޒަމާނުއްސުރެ ހޫނު ސަރަހައްދެއްގެ ގޮތުގައި ސިފަކުރާ ގަލްފުގެ ގައުމުތަކަށްވެސް، މި ދުވަސްވަރަކީ އާދަޔާ ޚިލާފަށް ހޫނުގަދަ ދުވަސްވަރެކެވެ.
