ސެޕްޓެމްބަރ މަހުގެ 9 ވަނަ ދުވަހު އޮންނަ ރިޔާސީ އިންތިހާބުގައި ވޯޓުލާމީހުންގެ ފައިނަލް ލިސްޓު ޕްރިންޓްކޮށް، ލިސްޓުގައި ކެންޑިޑޭޓުންގެ ފަރާތުން ސޮއިކުރުން އޮގަސްޓު 25ން 27 އަށް ދަރުބާރުގޭގައި އޮންނާނެކަމަށް އިލެކްޝަންސް ކޮމިޝަން (އީސީ)ގެ ނާއިބު ރައީސް އިސްމާއީލު ހަބީބު ވިދާޅުވެއްޖެއެވެ.

ހަބީބު ވިދާޅުވީ ކޮންމެ ކެންޑިޑޭޓެއްގެ ފަރާތުން 5 މަންދޫބަކަށް ސޮއިކުރުމުގެ ފުރުޞަތު އޮތްކަން ކެންޑިޑޭޓުންނަށް އަންގާފައިވާކަމަށެވެ. މައުލޫމާތުލިބިފައިވާ ގޮތުގައި ވޯޓާސް ލިސްޓްގައި އީސީގެ އޮފިޝަލުން ސޮއިކުރަންޖެހޭތީ އެކަން މިހާރު ވަނީ ފަށާފައެވެ.

ވޯޓާސް ލިސްޓްގައި ކެންޑިޑޭޓުން ސޮއިކުރަން ފަށާފައިވަނީ 2013 ވަނަ އަހަރުގެ އިންތިޚާބުގައި ހިނގާދިޔަ ކަންތައްތަކަށްފަހު އެއަހަރު ސްޕްރީމް ކޯޓުން ނެރެފައިވާ ގައިޑްލައިންގައިވާ ގޮތުގެ މަތިންނެވެ. އޭގެފަހުން ރިޔާސީ އިންތިޚާބުގެ ކަންކަން ކުރިޔަށްގެންދަނީ އެ ގައިޑްލައިނާ އެއްގޮތަށެވެ.

މިފަހަރުގެ އިންތިޚާބުގައި 8 ކެންޑިޑޭޓުން ވާދަކުރައްވާއިރު 3 ކެންޑިޑޭޓުން ވާދަކުރައްވަނީ އަމިއްލަ ގޮތުންނެވެ.

މީގެއިތުރުން ހަބީބު ވިދާޅުވީ މި ލިސްޓަކީ ފައިނަލް ލިސްޓު ކަމަށްވާތީ، މި ލިސްޓަށް ޝަރުޢީ ކޯޓަކުން އަމުރުކޮށްގެން ނޫންގޮތަކަށް ބަދަލެއް ނުގެނެވޭނެތީ، ޝަކުވާ އެއް އޮތްނަމަ އޮތީ ކޯޓު މަރުހަލާގެ ތެރެއިން ކަމަށެވެ. ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަފުޅުދައްކަވަމުން މީގެކުރިން ހަބީބު ވިދާޅުވެފައިވަނީ ވޯޓާސް ލިސްޓަށް މިހާރުވެސް ޝަކުވާ ލިބެމުންދާކަމަށެވެ. އީސީން ވަނީ ދާއިމީ ލިސްޓް އިއުލާންކޮށްފައެވެ. އެހެންކަމުން އެލިސްޓަށް ދެން ޝަކުވާ ހުށަހަޅައިގެން ބަދަލު ގެނައުމުގެ ފުރުސަތު ވަނީ ގެއްލިފައެވެ.

މިފަހަރުގެ އިންތިޚާބުގައި 282،395 މީހުންނަށް ވޯޓުލެވެއެވެ.