އިލެކްޝަންސްގެ އިމާރާތްތަކާއި އިންވެގެން ހުންނަ މަގުތަކާއި ގޯޅިތަކުގައި ކެމްޕެއިނާ ގުޅުންހުރި އެއްޗެހި ނުދެމުމަށް އަންގައިފި

އިލެކްޝަންސް ކޮމިޝަން(އީސީ)ގެ އިމާރާތްތަކާއި އިންވެގެން ހުންނަ މަގުތަކާއި ގޯޅިތަކުގައި ކުރިޔަށް އޮތް ރިޔާސީ އިންތިޚާބުގައި ވާދަކުރާ ކެންޑިޑޭޓުންނާއި ގުޅުންހުރި ޕޯސްޓަރާއި ދިދަފަތި ނުދެމުމަށް ޕާޓީތަކަށް އެކޮމިޝަނުން އަންގައިފިއެވެ.

އީސީގެ ނާއިބު ރައީސް އިސްމާއީލު ހަބީބު ކުރެއްވި ޓްވީޓެއްގައި ވިދާޅުވީ އިންތިޚާބީ މައި މަރުކަޒު (ދަރުބާރުގެ) އަދި ޕޯޓް ކޮމްޕްލެކްސް އިމާރާތުގައި ހުންނަ، އިލެކްޝަންސް ކޮމިޝަނުގެ މައި އޮފީހުގެ ކުރިމައްޗަށްވާ ގޮތަށާއި، އިންވެގެންވާ މަގުތަކާއި، ގޯޅިތަކުގައި އެއްވެސް ޕާޓީއެއްގެ އަދި އެއްވެސް ކެންޑިޑޭޓެއްގެ ކެމްޕޭން ދިދައާއި ބެނާ ދެމުމާއި ޕޯސްޓަރު ހަރުކުރުން ފަދަ ކަންކަން ނުކުރުމަށް އިލެކްޝަންސް ކޮމިޝަނުން ހުރިހާ ޕާޓީތަކަށް އަންގާފައިވާކަމަށެވެ. އަދި މިހާރު ހަރުކުރެވިފައިވާ މިފަދަ ތަކެތި ވީހާ އަވަހަކަށް ނެގުމަށް ވެސް ވަނީ އަންގާފައިކަމަށް ހަބީބު ވިދާޅުވިއެވެ.

ޢާންމު ތަންތަނާއި، އަމިއްލަ މީހުންގެ ޢިމާރާތްތަކުގައި، ކެމްޕޭން މެޓީރިއަލްސް ދެމުން، ހަރުކުރުން ނުވަތަ ތަތްކުރުމުގެ ކުރިން ކައުންސިލްތަކުން ނުވަތަ އެ ޢިމާރާތެއްގެ ވެރިފަރާތުގެ ހުއްދަ ހޯއްދެވުމަށްވެސް އީސީ އިން ކެންޑިޑޭޓުންނަށާއި ޕާޓީތަކަށް އިލްތިމާސްކުރާކަމަށް ހަބީބު ވިދާޅުވިއެވެ.

އިންތިޚާބުގައި ވާދަކުރާ ކެންޑިޑޭޓުންގެ ވައުދުތަކާއި ކެންޑިޑޭޓުންގެ ޕޯސްޓަރުތަކާއި ޕާޓީތަކުގެ ދިދަތައް މާލޭގައި އަންނަނީ ފޯރިއަކާއެކު ދަމަމުންނެވެ. މީގެއިތުރުން އަތޮޅުތަކުގައިވެސް ކެމްޕެއިން ފޯރިވަނީ ވަރަށް ގަދަވެފައެވެ.