ޕާކިސްތާނުގެ ފަރުބަދަމަތީ ސަރަޙައްދެކެވެ. 8 މީހަކު ކޭބަލް ކާރުގައި ދަތުރު ފެށިއެވެ. ބޮޑު 2 މީހުންނާއި ކުޑަ 6 ކުދިންނެވެ. އެ ދަތުރަކީ ހިތްގައިމު މަންޒަރުތަކެއް ބަލާލަން ކޮށްލި ޗުއްޓީ ދަތުރެއް ނޫނެވެ. އެ ވާހަކަ ފަހުން ކިޔައިދޭނަމަވެ. ދަތުރުގެ ވަކި ހިސާބަކަށް ދެވުނު ތަނާ، ކޭބަލް ހަލާކުވެ، ވައިގެ ތެރޭގައި އެއް ފަރާތަކަށް ކާރު އެލުނެވެ. އެއީ ގަޑިން، ހެނދުނު 07:00 ޖަހާ ކަން ހާ އިރެވެ. ޚައިބަރު ޕަޚްތުންޚްވާ ޕްރޮވިންސްގެ ބައްޓަގްރާމް ޑިސްޓްރިކްޓްގެ ކޯރެއް މަތިން ދަތުރު ކުރަމުން ދިޔަ ކޭބަލް ކާރު، އެ ފުން ވާދީގެ ވައިގެ ތެރޭގައި އެލިފައި އޮތް ގޮތަށް އޮތީއެވެ. ފަސެންޖަރުންނާވެސް އެކީގައެވެ.
އަވަށުގެ ކަމާ ބެހޭ ފަރާތްތަކުގެ ސަމާލުކަމަށް އެކަން ގެނެސް، ކުއްލި ހާލަތެއް މެދުވެރިވެފައި ވާ ކަން އެނގުމަށްޓަކައި އާންމު ރައްޔިތުން ބޭނުން ކުރީ މިސްކިތުގެ ތާޅަފިއްޔެވެ. އިސާހިތަކު އެތައް ބަޔަކު އެ މަންޒަރު ފެންނަ ސަރަޙައްދަށް ޖަމާވިއެވެ. މީހުން ސަލާމަތް ކުރުމުގެ މަންޒަރުތައް ބަލާލުމަށެވެ.
މީހުން ސަލާމަތް ކުރުމަށް ހިންގި، ނޭވޭ ހިފަހައްޓާލަން ޖެހުނު އޮޕަރޭޝަން ކާމިޔާބު ކަމާއެކު ނިންމާލިއިރު ބަޠަލެއްގެ ގޮތުގައި އެތައް ބަޔަކު އިއްތިފާޤުވި މީހަކީ ސާހިބު ޚާންއެވެ. އަސްކަރި ހެލިކޮޕްޓަރުތަކާއި ރެސްކިއު މިޝަންތަކުގެ ޒަމާނީ ތަމްރީނުތައް ލިބިފައި ވާ މެންބަރުންގެ ޓީމުތަކުންވެސް ހަރަކާތްތެރިވި އެ އޮޕަރޭޝަންގައި ސާހިބު ޚާންއަށް ބަޠަލެއްގެ ދަރަޖަ ދެވުނީ ސަބަބެއް ނެތިއެއް ނޫނެވެ.
ގާތްގަނޑަކަށް 15 ގަޑިއިރަށް ވުރެ ގިނަ ވަޤުތަށް ދެމިގެންދިޔަ ނުތަނަވަސް ކަމަށް ފަހު ސާހިބު ޚާން ވަނީ މީޑިއާއާއި ވާހަކަދައްކާފައެވެ. ވެރިރަށް އިސްލާމްއާބާދުގެ ގާތްގަނޑަކަށް 200 ކިލޯމީޓަރު އުތުރުން އޮންނަ ބައްޓަގްރާމްގައި ހުރެ، އޭނާގެ ތަޖުރިބާތައް މީޑިއާއާއި ހިއްސާ ކުރަމުން ދިޔައިރުވެސް، ސާހިބު ޚާން ވަށާލައިގެން ތިބި މީހުންގެ ކަމަކަށް ވީ އޭނާއަށް ތަޢުރީފު ކުރުމެވެ. ސާބަސް ދިނުމެވެ. އަވަށުގެ ކަމުވޮށިގެންވާ މީހުންގެ އޭގެ ތެރޭގައި ހިމެނެއެވެ.
އަސްކަރީ ހެލިކޮޕްޓަރުގެ ބޭނުމެއް ނެތް. އެތެރޭގަ ތިބި މީހުން ބޭނުމެއް ނުވި އެއަށް ނަގާކަށް. އަސްކަރިއްޔާއިން ވަރަށް މަސައްކަތް ކުރި އެމީހުންނަށް ވިސްނައިދެވޭތޯ. ގަޑިއެއް ހާއިރު މަސައްކަތް ކުރި. ކޭބަލް ކާރުގެ މަތީގަ ހެލިކޮޕްޓަރު ދުއްވީ. ވާ އެއްލަމުން. އެކަމަކު، އެތެރޭގަ ތިބި މީހުން ދިޔައީ އަސްކަރިއްޔާއިން ދެއްކި ވާހަކަތަކަށް އިންކާރު ކުރަމުން. އެންމެ މީހަކު ފިޔަވާ. އޭނަ، އޭނަގެ ގައިގަ ވާގަނޑު އައްސައިގެން ހެލިކޮޕްޓަރުގަ ސަލާމަތްވި. އެހެން މީހުން އިންކާރު ކުރީ. އެހެންވީމަ އަސްކަރިއްޔާއަށް ކުރެވޭނެ އިތުރު ކަމެއް ނެތް.ޙަބީބް ރަޙުމާން؛ ޕާކިސްތާން ރައްޔިތެއް
ސާހިބު ޚާންއަކީ ޕާކިސްތާނުގައި އޮންނަ ކޯރުތަކާއި ފުން ވާދީތަކަށް ވެއްޓޭ އުޅަނދުތަކާއި، އެ ތަންތަނުގައި މަރުވެފައި ވާ މީހުންގެ ހަށިގަނޑުތައް ނެގުމަށް ހާއްސަވެފައި ވާ ކުންފުންޏެއްގައި މަސައްކަތް ކުރާ މީހެކެވެ. އާންމު ދިރިއުޅުމަށް ކުރާ މަސައްކަތުގެ ގޮތުން ލިބުނު ހިތްވަރާއެކު، ކޭބަލް ކާރުގައި ތާށިވެފައި ތިބި މީހުން ސަލާމަތް ކުރުމަށް ސާހިބު ޚާން ތެދުވީ އަމިއްލަ އިހުތިޔާރުގައެވެ. ދަރުމަވެރިއެއްގެ ގޮތުގައެވެ. އަރިއަކަށް އެލިފައި އޮތް ކޭބަލް ކާރު ތެރޭގައި ތާށިވެފައި ތިބި ކުދިން ސަލާމަތް ކުރުމަށް ސާހިބު ޚާން މަސައްކަތް ކުރަމުން ދިޔައީ ޒިޕްލައިން ބޭނުން ކޮށްގެންނެވެ.
ހާދިޘާ ހިނގީ 7 ޖަހާ، އެހާ ކަން ހާއިރު. އަހަރަމެންނަށް އާދެވުނީ 8 ނޫނީ 9 ޖެހި އިރު. ހެލިކޮޕްޓަރުތައް އޭރުވެސް އައިސްގޮސް ހަދާ. އެކަމަކު، ކޭބަލް ކާރު ތެރޭގައި ތާށިވެފައި ތިބި ކުދިން ސަލާމަތް ކުރަން މަސައްކަތް ކުރާކަށް އެމީހުން އޭރުވެސް އަހަރަމެންނަކަށް ހުއްދައެއް ނުދޭ. އެކަމަކު ރޭގަނޑުވީމަ، އަހަރަމެން ގާތުގަ ބުނީ ކަލޭމެން ކުރިޔަށް ގެންދާށޭ. އެމީހުން ސަލާމަތް ކުރި އެއް ކުއްޖަކު. 7 މީހަކު އޭރުވެސް ތިބީ އެތެރޭގައި. ދެން އަހަރަމެން އޮޕަރޭޝަން ފެށީ. ﷲ އަށް ޙަމްދު ހުރި. އެ 7 މީހުންވެސް އަހަރަމެން ސަލާމަތް ކުރީ. މާތް ﷲގެ ރަޙުމަތްފުޅުން، ހުރިހާ އެންމެންގެ ހާލުވެސް ރަނގަޅު.ސާހިބު ޚާން؛ ޕާކިސްތާން ރައްޔިތެއް
އެއްވެސް މީހެއްގެ ފުރާނައަށް ކަމެއް ނުވެ، ކާމިޔާބު ކަމާއެކު ރެސްކިއު މިޝަން ނިންމާލެވުމާއެކު މުޅި ޕާކިސްތާނުވެސް ހަމަޖެހުމުގެ ނޭވާއެއް ލީ ފަދައެވެ.
ކޭބަލް ކާރުގައި ތިބި ކުދިންނަކީ ބައްޓަންގީ ޕަޝްޓޯ ހައި ސްކޫލުގައި ކިޔަވަމުން ދާ ދަރިވަރުންތަކެކެވެ. ފަރުބަދަމަތީ ސަރަޙައްދުގައި ހުންނަ އެ ސްކޫލަށް އައިސް-ގޮސް ހެދުމަކީ މާ ފަސޭހަ ކަމެއް ނޫނެވެ. ސްކޫލަށް ދިއުމަށްޓަކައި ހުރަސް ކުރާނެ ރައްކާތެރި ރާސްތާއެއްވެސް ނޯވެއެވެ. އެހެން ކަމުން، ކޭބަލް ކާރު ވެފައި އޮންނަނީ، ސްކޫލަށް ދާ އެތައް ކުދިންނަކަށް އޮތް ހަމަ އެކަނި ފުރުޞަތަށެވެ. ނަމަވެސް، ކޭބަލް ކާރު ޚިދުމަތުގެ މެއިންޓަނަންސް ކަންކަން ރަނގަޅަށް ބަލަހައްޓަމުން ނުދިއުމުގެ ސަބަބުން، ކޮންމެ އަހަރަކުވެސް ހިތާމަވެރި އެތައް ހާދިޘާއެއް ހިނގައެވެ. އެތައް ބަޔަކު މަރުވެ، އެތައް ބަޔަކަށް އެކި ވަރުގެ ޒަޚަމަތްތައްވެސް ލިބިފައި އެބަހުއްޓެވެ.
އޯގަސްޓް 22 ވަނަ ދުވަހުގެ ހާދިޘާއާއި ގުޅިގެން ޕާކިސްތާނުގެ ރައީސް އާރިފް އާލްވީ ވަނީ، ޕާކިސްތާނުގެ ހުރިހާ ހިސާބެއްގައި ހުރި ކޭބަލް ކާރުތަކެއްގެ ފުރިހަމަ ސަރވޭއެއް ކުރިއަށް ގެންދިއުމަށް، ކަމާ ބެހޭ ފަރާތްތަކަށް ގޮވާލައްވާފައެވެ. ކޮންމެ ގޮތަކަށް ކަން އޮތް ކަމުގައި ވީ ނަމަވެސް، ސާހިބު ޚާން ފަދަ ފަހުލަވާނުންނަށް ސާބަސް ޙައްޤު ނޫންތޯއެވެ؟
