މަސްތުވެގެން ކާރުދުއްވި މައްސަލައިގައި އިނގެރޭސިވިލާތުގެ ފުޓުބޯޅަ ޓީމުގެ ކުރީގެ ކެޕްޓަން، ވޭން ރޫނީ މައްޗަށް ކުރި ހުކުމާއި އެއްގޮތަށް އޭނާ އިޖުތިމާޢީ މަސައްކަތަށް ނުކުންނަން ފަށައިފިއެވެ.

100 ގަޑިއިރުގެ އިޖުތިމާޢީ މަސައްކަތް ކުރުމަށް ރޫނީގެ މައްޗަށް ޙުކުމް ކޮށްފާއިރު، އޭނާ މަސައްކަތް ކުރަމުންދަނީ އިނގެރޭސިވިލާތުގެ ޕްރެސްޓްބަރީގެ ކޮމިއުނިޓީ ގާޑަން ސެންޓަރުގައި ގަސްއިންދާ މީހެއްގެ ވަޒީފާގައެވެ. މީގެ އިތުރުން ލަކުޑީގެ ބައެއް މަސައްކަތްތަކާއި، ވަޑާމުގެ ބައެއް މަސައްކަތްވެސް ރޫނީއާއި ހަވާލުކޮށްފައިވެއެވެ. 100 ގަޑިއިރުގެ އިޖުތިމާއި މަސައްކަތުގެ އިތުރުން 2 އަހަރުވަންދެން އެއްވެސް އެއްގަމު އުޅަނދެއް ދުއްވުން އޭނާއަށް ވަނީ މަނާކޮށްފައެވެ.

ރޫނީގެ މައްޗަށް މަސައްކަތް ކުރުމަށް ޙުކުމް ކޮށްފައިވާ 100 ގަޑިއިރުގެ ތެރެއިން އޭނާ މިހާރު ވަނީ 18 ގަޑިއިރު މަސައްކަތް ކޮށްފައެވެ.

ސެޕްޓެމްބަރ 1 ވަނަ ދުވަހުގެރޭ ރޫނީ ހައްޔަރުކޮށްފައިވަނީ އޭނާ މަސްތުގެ ހާލަތުގައި ހުރެ ކާރު ދުއްވި ކަމުގެ ތުޙުމަތުގައެވެ. ކޯޓުގައި ހާމަވެފައިވާ ގޮތުގައި، ރޫނީ ހައްޔަރުކުރި އިރު އޭނާ ހުރީ ޤާނޫނުން ހުއްދަކުރާ މިންވަރަށްވުރެ 3 ގުނަ އިތުރަށް ރާ ބޮއެގެންނެވެ.

ރޫނީ ހައްޔަރުކުރި އިރު ވިހަން ގާތްވެފައިވާ އޭނާގެ އަންހެނުންނާއި، 3 ކުދިން ތިބީ ޗުއްޓީއަށް އިނގެރޭސިވިލާތުން ބޭރުގައެވެ. އޭނާ ހައްޔަރުކުރިއިރު، އޭނާ ދުއްވަމުންދިޔަ ކާރުގައި އޭނާ އާއި އެކު ހިލޭ އަންހެނެއްވެސް އިންކަން ހާމަވެފައިވާއިރު، ރިޕޯޓްތައް ބުނާ ގޮތުގައި އޭގެ ސަބަބުން ރޫނީ އާއި އޭނާގެ އަންހެނުން ކޮލީން އާއި ދެމެދު ބޮޑެތި މައްސަލަތަކެއް ވަނީ ޖެހިފައެވެ.

ރޫނީގެ ގާތް ބައެއް ރަޙުމަތްތެރިން ބުނެފައިވާގޮތުގައި ކުރެވުނު ކުށާއިމެދު ރޫނީ ވަރަށް ބޮޑަށް ހިތާމަ ކުރެއެވެ. އަދި ކޮންމެ ގޮތެއް ހަދައިގެން ނަމަވެސް އޭނާގެ އަންހެނުންނާއި ދެމެދު އުފެދިފައިވާ މައްސަލަ ހައްލުކުރުމަށް އޭނާ ބޭނުންވާ ކަމަށް ރޫނީގެ ރައްތެހިން ވަނީ ބުނެފައެވެ.