ޖަރުމަނުގައި ޗޮކްލެޓް ކާރުހާނާއެއް ބަންޑުންވެ ޗޮކްލެޓުން މަގުމަތި ފުރިއްޖެ!
މިހާދިސާ ހިނގީ ޗޮކްލެޓް ރައްކާކުރެވިފައި ހުންނަ ޓޭންކެއް ފުރި ބަންޑުން ވެގެން
ޗޮކްލެޓްތައް މަގުގެ 108 ވަރަކަށް ފޫޓް ދުރަށް ފެތުރިގެން ގޮސްފައިވޭ
ޖަރުމަނުވިލާތުގައި ޗޮކްލެޓް ކާރުޚާނާއެއް ޓޭންކެއް ފުރި ބަންޑުންވެ ދިޔައި ޗޮކްލެޓްތައް މަގުމައްޗަށް ބޭރުވެއްޖެއެވެ.
މީގެ ކުރިން މިފަދަ ވާހަކަތައް އަޑު އިވެނީ ކުޑަކުދިންގެ ވާހަކަ ފޮތްތަކުން ނަމަވެސް ހޯމަ ދުވަހު ޖަރުމަނުގައި ހިނގި މި ހާދިސާއަށް އެތައް ބައެއްގެ ސަމާލުކަން ހުއްޓިގެން ދިޔައެވެ.
ވެސްޓޮނެން އަވަށުގައި ހިނގި މި ހާދިސާގައި "ޑްރެއިމެއިސްޓާ" ޗޮކްލެޓް ކާރުޚާނާއިން ޓަނެއްހާ ދިޔާ މިލްކް ޗޮކްލެޓް މަގުމައްޗަށް ވަނީ ބޭރުވި އެވެ.
މިހާދިސާ ހިނގީ ޗޮކްލެޓް ރައްކާކުރެވިފައި ހުންނަ ޓޭންކެއް ފުރި ބަންޑުން ވެގެންކަމަށް ރިޕޯޓްތައް ބުނާއިރު ޖަރުމަނުގެ ބައެއް ނޫސްތަކުން ބުނީ އެކަން ހިނގީ "ޓެކްނިކަލް ފޯލްޓަކުން" ކަމަށެވެ.
ޗޮކްލެޓްތައް ސާފްކުރުމަށް ހަރަކާތްތެރިވަނީ
"ޑްރެއިމެއިސްޓާ" ޗޮކްލެޓް ކާރުޚާނާއިން ބޭރުވި ޗޮކްލެޓްތައް މަގުގެ 108 ވަރަކަށް ފޫޓް ދުރަށް ފެތުރިގެން ގޮސްފައިވެއެވެ. ޗޮކްލެޓްތައް ސާފްކޮށްފައިވަނީ ދެ ގަޑިއެއްހާއިރަށް މަގު ބަންދުކޮށް، ބޮޑެތި ފަކީރާތައް ބޭނުންކޮށްގެންނެވެ.
ކާރުޚާނާގެ އިސްފަރާތަކުން ބުނެފައިވަނީ، އެކަމުގެ ސަބަބުން ތަނުގެ އޮޕަރޭޝަނަށް މާ ބޮޑު ގެއްލުމެއް ލިބިފައި ނުވާކަަމަށާއި ބުދަ ދުވަހު ތަން އާއްމު ހާލަތަކަށް ގެނެވި މަސައްކަތް ފަށާފައިވާކަމަށެވެ.
