ސްޕެއިންގެ ސެވިއްޔާ އަށް ކުޅެމުން އަންނަ އާޖެންޓީނާގެ ޑިފެންޑަރު ގޮންޒާލޯ މޮންޓިއޭލް، ލޯނު އެއްބަސްވުމެއްގެ ދަށުން ނޮޓިންހަމް ފޮރެސްޓަށް ބަދަލުވެއްޖެ އެވެ.

އުމުރުން 26 އަހަރުގެ ކުޅުންތެރިޔާ ފޮރެސްޓަށް ބަދަލުވީ މިހާރު ކުރިއަށްދާ ސީޒަންގެ ނިޔަަލަށެވެ. ފޮރެސްޓުން އޭނާ ހޯދީ 11 މިލިއަން ޔޫރޯގެ ޑީލެއްގެ ދަށުންނެވެ. ފޮރެސްޓާއެކު މޮންޓިއޭލް އެއްބަސްވުމުގައި ސޮއިކޮށްފައިވާއިރު، އެ ކުލަބުން މިހާރު ވަނީ އެކަން ރަސްމީކޮށް އިއުލާން ވެސް ކޮށްފަ އެވެ. ފޮރެސްޓުގައި އޭނާ ބޭނުންކުރާނީ 29 ނަންބަރު ޖާޒީ އެވެ. މޮންޓިއޭލް ހޯދުމަށް އެންމެ ބޮޑަށް ބާރު އެޅީ ފޮރެސްޓުގެ ކޯޗު ސްޓީވް ކޫޕާ ކަމަށް މީޑިއާ ތަކުން ބުނެ އެވެ.

އާޖެންޓީނާގެ ރިވާ ޕްލޭޓުން ސީނިއާ ކެރިއަރު ފެށި މޮންޓިއޭލް ސެވިއްޔާ އަށް ބަދަލުވީ 2021 ވަނަ އަހަރު އެވެ. އޭގެ ކުރިން ރިވާ ޕްލޭޓުގައި ހޭދަ ކުރި ފަސް އަހަރުގެ ތެރޭގައި އޭނާ ވަނީ އެކުލަބަށް 139 މެޗު ކުޅެދީ ހަ ލަނޑު ޖަހައިފަ އެވެ. ސެވިއްޔާ އިން މޮންޓިއޭލް ހޯދީ ރިވާ ޕްލޭޓުގައި އޭނާ ދެއްކި ކުޅުމުގެ ސަބަބުންނެވެ. މިހާތަނަށް މޮންޓިއޭލް ވަނީ ސެވިއްޔާ އަށް ކުޅެދިން 72 މެޗުގައި ދެ ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ޔުއެފާ ޔޫރޮޕާ ލީގު ކާމިޔާބުކޮށްފަ އެވެ. މިއަހަރުގެ ޔުއެފާ ސުޕަ ކަޕްގެ ފައިނަލްގައި ވެސް މޮންޓިއޭލް ވަނީ ކުޅެފަ އެވެ.

މޮންޓިއޭލް އަށް އާޖެންޓީނާގެ ޤައުމީ ޓީމުން ވެސް ޖާގަ ލިބުނީ 2021 ވަނަ އަހަރު އެވެ. ޤައުމީ ޓީމަށް އޭނާ ވަނީ 23 މެޗު ކުޅެދީ އެއް ލަނޑު ޖަހައިފަ އެވެ. ޤައުމީ ޓީމާއެކު އޭނާ އެންމެ ފުރަތަމަ ކާމިޔާބު ކުރީ 2021 ވަނަ އަހަރު އޮތް ކޮޕަ އެމެރިކާ މުބާރާތެވެ. އޭގެ ފަހުން މިދިޔަ އަހަރު ވަނީ ބައްރުތަކުގެ ޗެމްޕިއަނުންގެ މެދުގައި ކުޅޭ ފައިނަލިސިމާ ކާމިޔާބުކޮށްފަ އެވެ. އެއަށްފަހު މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތް ވެސް އޭނާ ވަނީ އާޖެންޓީނާ އާއެކު ކާމިޔާބުކޮށްފަ އެވެ.