ޕޮލިސް ކްލަބް ބަލިކޮށް، އެއިޓީން ތާޓީގެ ޗެމްޕިއަންކަން ޓީމް ފެނަކަ އަށް

ފައިނަލުގައި ޕޮލިސް ކްލަބް ބަލިކޮށް، އެއިޓީން ތާޓީގެ ޗެމްޕިއަންކަން ޓީމް ފެނަކަ ހޯދައިފިއެވެ.

ފައިނަލް މެޗު ޓީމް ފެނަކައިން ކާމިޔާބުކުރީ 3-1 ގެ ނަތީޖާއަކުންނެވެ. މެޗުގެ 16 ވަނަ މިނެޓުގައި ފެނަކައަށް ކުރިހޯދަދިނީ މަރިޔަމް މިރްފަތު އެވެ. ފެނަކައިން ފުރަތަމަ ހާފު ނިންމާލީ އެއް ލަނޑުގެ ފަރަގަކާއެކުއެވެ.

ދެވަނަ ހާފު ފެށިގެން ހަތް ވަނަ މިނެޓުގައި ފެނަކައިގެ މަރިޔަމް ނޫރާ ވަނީ ލަނޑެއް ޖަހައި، ލީޑު ފުޅާކޮށްދީފައެވެ. ނަމަވެސް އޭގެ ތިން މިނެޓު ފަހުން ޕޮލިސް ކްލަބުގެ ރާނިޔާ އިބްރާހިމް ވަނީ ލަނޑެއް ޖަހައި ފަރަގު ކުޑަކޮށްފައެވެ. ޕޮލިސް ކްލަބުން ލަނޑުޖެހިތާ ތިން މިނެޓުފަހުން ފެނަކައިން ވަނީ ތިންވަނަ ލަނޑު ޖަހާފައެވެ. އެ ލަނޑު ޖަހައިދިނީ ފާތިމަތު އިނާޝާ އާދަމް އެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ ފެނަކައަށް ފުރަތަމަ ލަނޑު ޖަހައިދިން މަރިޔަމް މިރްފަތު އެވެ.

މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނިފައިވަނީ ޓީމް ފެނަކައިގެ ކީޕަރު ޚަދީޖާ އިބްރާހިމް އާއި ޝަހުލާ ތައުފީގާއި މަރިޔަމް ނޫރާގެ އިތުރުން ސިފައިންގެ ކްލަބުގެ މައީޝާ އަބްދުލް ހަންނާން އާއި ޕޮލިސް ކްލަބުގެ ފަދުވާ ޒާހިރު އެވެ.

މިއަހަރުގެ މުބާރާތުގައި ވާދަކޮށްފައިވަނީ ޕޮލިސް ކްލަބާއި ޓީމް ފެނަކައިގެ އިތުރުން ދިވެހި ސިފައިންގެ ކްލަބެވެ. ލީގު އުސޫލުން ކޮންމެ ޓީމަކާ ދެފަހަރު ކުޅުމަށްފަހު، ފައިނަލަށް ގޮސްފައިވަނީ އެއްވަނަ ޓީމާއި ދެވަނަ ޓީމެވެ. ތިން ޓީމަށްވެސް ހަ ޕޮއިންޓު ލިބި، ފެނަކަ އާއި ޕޮލިހަށް ފައިނަލުން ޖާގަ ލިބުނީ ފައިދާ ގޯލުގެ ތަފާތުންނެވެ. ފެނަކަ އާއި ޕޮލިސް ބައްދަލުކުރި ފުރަތަމަ މެޗު 1-0 ން ކާމިޔާބުކުރީ ޕޮލިހެވެ. ދެވަނަ މެޗު 3-2 ން ކާމިޔާބުކުރީ ފެނަކަ އެވެ.

ބުދަ ދުވަހުގެރޭ ކުޅުމަށް ހަމަޖެހިފައިވަނީ 18/30 ކްލެސިކްގެ ފައިނަލް މެޗެވެ. މި މެޗުގައި ވާދަކުރާނީ ވެމްކޯ އާއި އެމްއޭސީއެލް އެވެ.