ލޯނު އެއްބަސްވުމެއްގެ ދަށުން ގޮންޒާލޯ މޮންޓިއޭލް ނޮޓިންހަމް ފޮރެސްޓަށް

ސްޕެއިންގެ ސެވިއްޔާ އަށް ކުޅެމުން އަންނަ އާޖެންޓީނާގެ ޑިފެންޑަރު ގޮންޒާލޯ މޮންޓިއޭލް، ލޯނު އެއްބަސްވުމެއްގެ ދަށުން ނޮޓިންހަމް ފޮރެސްޓަށް ބަދަލުވާން ނިންމައިފި އެވެ.

އުމުރުން 26 އަހަރުގެ ކުޅުންތެރިޔާ އިނގިރޭސި ޕްރިމިއާ ލީގުގެ ފޮރެސްޓަށް ބަދަލުވަނީ މިހާރު ކުރިއަށްދާ ސީޒަންގެ ނިޔަލަށެވެ. ފޮރެސްޓަށް އޭނާ ބަދަލުވަނީ 11 މިލިއަން ޔުރޯގެ ޑީލެއްގެ ދަށުންނެވެ. ފޮރެސްޓަށް ބަދަލުވުމުގެ ގޮތުން ފުރިހަމަ ކުރަން ޖެހޭ މެޑިކަލްގެ ކަންކަން މޮންޓިއޭލް މިހާރު ފުރިހަމަ ކޮށްފައިވާ ކަމަށް މީޑިއާތަކުން ބުނެ އެވެ. ކުރިއަށް އޮތް ދުވަސްތަކުގެ ތެރޭގައި ފޮރެސްޓުން މޮންޓިއޭލް އެކުލަބާ ގުޅުނުކަން ރަސްމީކޮށް އިއުލާން ކުރާނެ ކަމަށް ވެސް ރިޕޯޓުތައް ބުނެ އެވެ.

އާޖެންޓީނާގެ ރިވާ ޕްލޭޓުން ސީނިއާ ކެރިއަރު ފެށި މޮންޓިއޭލް ސެވިއްޔާ އަށް ބަދަލުވީ 2021 ވަނަ އަހަރު އެވެ. އޭގެ ކުރިން ރިވާ ޕްލޭޓުގައި ހޭދަ ކުރި ފަސް އަހަރުގެ ތެރޭގައި އޭނާ ވަނީ އެކުލަބަށް 139 މެޗު ކުޅެދީ ހަ ލަނޑު ޖަހައިފަ އެވެ. ސެވިއްޔާ އިން މޮންޓިއޭލް ހޯދީ ރިވާ ޕްލޭޓުގައި އޭނާ ދެއްކި ކުޅުމުގެ ސަބަބުންނެވެ. މިހާތަނަށް މޮންޓިއޭލް ވަނީ ސެވިއްޔާ އަށް ކުޅެދިން 72 މެޗުގައި ދެ ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ޔުއެފާ ޔޫރޮޕާ ލީގު ކާމިޔާބުކޮށްފަ އެވެ. މިއަހަރުގެ ޔުއެފާ ސުޕަ ކަޕްގެ ފައިނަލްގައި ވެސް މޮންޓިއޭލް ވަނީ ކުޅެފަ އެވެ.

މޮންޓިއޭލް އަށް އާޖެންޓީނާގެ ޤައުމީ ޓީމުން ވެސް ޖާގަ ލިބުނީ 2021 ވަނަ އަހަރު އެވެ. ޤައުމީ ޓީމަށް އޭނާ ވަނީ 23 މެޗު ކުޅެދީ އެއް ލަނޑު ޖަހައިފަ އެވެ. ޤައުމީ ޓީމާއެކު އޭނާ އެންމެ ފުރަތަމަ ކާމިޔާބު ކުރީ 2021 ވަނަ އަހަރު އޮތް ކޮޕަ އެމެރިކާ މުބާރާތެވެ. އޭގެ ފަހުން މިދިޔަ އަހަރު ވަނީ ބައްރުތަކުގެ ޗެމްޕިއަނުންގެ މެދުގައި ކުޅޭ ފައިނަލިސިމާ ކާމިޔާބުކޮށްފަ އެވެ. އެއަށްފަހު މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތް ވެސް އޭނާ ވަނީ އާޖެންޓީނާ އާއެކު ކާމިޔާބުކޮށްފަ އެވެ.