ދެފަރާތުގެ އެއްބަސްވުމާއެކު ގްރީންވުޑް، ޔުނައިޓެޑް ދޫކޮށްލަން ނިންމައިފި

ދެފަރާތުގެ އެއްބަސްވުމާއެކު، މެންޗެސްޓަރ ޔުނައިޓެޑުގެ ފޯވާޑް މޭސަން ގްރީންވުޑް އެ ޓީމު ދޫކޮށްލަން ނިންމައިފިއެވެ.

2022 ވަނަ އަހަރުގެ ޖެނުއަރީ މަހު ގްރީންވުޑް ހައްޔަރުކޮށްފައިވަނީ އޮންލައިންކޮށް ދައުރުވި ފޮޓޯއާއި ވީޑިއޯތަކަކާ ގުޅޭގޮތުން ކުރެވޭ ތުހުމަތުތަކާ ގުޅިގެންނެވެ. އުމުރުން 21 އަހަރުގެ އިންގްލެންޑް އިންޓަނޭޝަނަލް ކުޅުންތެރިޔާގެ މައްޗަށް އުފުލާފައިވާ ދައުވާތަކުގެ ތެރޭގައި ރޭޕްކުރަން އުޅުމާއި, މާރާމާރީ ހިންގުމުގެ ދައުވާތައް ހިމެނެއެވެ. އޭނާގެ މައްޗަށް އުފުލާފައިވާ ދައުވާތައް ބާތިލްކުރީ 2 ފެބްރުއަރީ 2023ގައެވެ. އެހެންނަމަވެސް، ކުލަބުން ވަނީ ހަމަސް ދުވަހުގެ ތަހުގީގެއް ކުރިޔަށްގެންގޮސްފައެވެ.

ކުލަބުން ނެރުނު ބަޔާނެއްގައި ބުނެފައިވަނީ މޭސަންގެ އިތުރުން ތަހުގީގުގައި ބައިވެރިވި އެންމެންވެސް މެންޗެސްޓަރ ޔުނައިޓެޑްގައި އޭނާގެ ކެރިއަރު އަލުން ފަށަން ދިމާވާ ދަތިތައް ފާހަގަކޮށްފައި ވާކަމަށެވެ. އަދި އޭނާއަށްވެސް އެންމެ ރަނގަޅުގޮތަކީ ޔުނައިޓެޑާ ވަކިން މަސައްކަތް ކުރުން ކަމުގައި ދެފަރާތުންވެސް އެއްބަސްވެފައި ވާކަމަށް ޔުނައިޓެޑުން ވަނީ ބުނެފައެވެ.

މިކަމާ ގުޅޭގޮތުން ގްރީންވުޑް ނެރުނު ބަޔާނެއްގައި އޭނާ ވަނީ ގޯސްތަކެއް ހެދުނުކަމަށް އެއްބަސްވެފައެވެ. އޭނާ އިތުރަށް ބުނީ ގޯސްތަކެއް ހެދިފައި ވީނަމަވެސް، ތުހުމަތުކޮށްފައިވާ ކަންކަމަކީ އޭނާ ނުކުރާ ކަމެއް ކަމަށެވެ. އަދި، ޔުނައިޓެޑު ދޫކޮށްލަން ނިންމީ، ކުލަބުގެ މެނޭޖްމެންޓާއި އޭނާގެ އާއިލާއާ މަޝްވަރާ ކުރުމަށްފަހު ކަމަށެވެ. ގްރީންވުޑް ވަނީ އޭނާ ޔުނައިޓެޑަށް ދިއުމަށްފަހު ކުލަބުން ވެދެއްވި އެހީތެރިކަން ފާހަގަކޮށް ޝުކުރު އަދާކޮށްފައެވެ.

އުމުރުން ހަތް އަހަރުގައި ގްރީންވުޑް ވަނީ ޔުނައިޓެޑުގެ އެކަޑަމީއާ ގުޅިފައެވެ. ޔުނައިޓެޑުގެ ސީނިއަރ ޓީމުން އޭނާއަށް ފުރުސަތު ލިބުނީ 2018 ވަނަ އަހަރުއެވެ. އެއަށްފަހު، އޭނާ ވަނީ ޔުނައިޓެޑަށް 83 މެޗު ކުޅެދީ، 22 ލަނޑު ޖަހާފައެވެ.