ކާޑިޒް އަތުން ލިބުނީ މުހިންމު މޮޅެއް، ކުޅުންތެރިންގެ މަސައްކަތް ބަލައިގަންނަން: ޒަވީ

ސްޕެނިޝް ލީގުގައި ކާޑިޒްއާ ދެކޮޅަށް ކުޅުނު މެޗުން ލިބުނީ މުހިންމު މޮޅެއް ކަމަށާއި، ކުޅުންތެރިން ކުރި މަސައްކަތާއި، ދެއްކި ކުޅުން ބަލައިގަންނަ ކަމަށް ބާސެލޯނާގެ ކޯޗު ޒަވީ ހެނާންޑޭޒް ބުނެފި އެވެ.

ލީގުގައި ބާސެލޯނާ އިން ކުޅުނު ފުރަތަމަ މެޗުގައި ދެއްކު ރަތް ކާޑުގެ ސަބަބުން، ކާޑިޒް މެޗުގައި ޒަވީ އަށް ބެންޗުގައި ހުރެވޭ ގޮތެއް ނުވި އެވެ. އެ މެޗުގައި ބާސެލޯނާ އަށް ބެންޗުން އިރުޝާދި ދިނީ އެސިސްޓެންޓް ކޯޗު އޮސްކާ ހެނާންޑޭޒް އެވެ. ނަމަވެސް އެ މެޗަށްފަހު ޒަވީ ވަނީ ނޫސްވެރިންގެ ސުވާލުތަކަށް ޖަވާބު ދީފަ އެވެ.

ޒަވީ ބުނީ މެޗުގައި ދެ ޓީމުން ވެސް ދެއްކީ ވަރަށް ވާދަވެރި ކުޅުމެއް ކަމަށާއި، ބައެއް ފަހަރު ކާމިޔާބު ނުވާނެހެން ވެސް ހީވި ކަމަށެވެ. ނަމަވެސް ކުޅުންތެރިންގެ މަސައްކަތުގެ ފަހު ދިހަ މިނެޓުގެ ތެރޭގައި ލީޑު ނަގައި، ލީޑު ފުޅާ ކުރެވުން ކަމަށް އޭނާ ވަނީ ބުނެފަ އެވެ. ޒަވީ ބުނީ ކުޅުންތެރިންނަށް ޝުކުރު އަދާ ކުރާ ކަމަށާއި، މެޗުން މޮޅުވުން ގުޅިފައި އޮތީ ބާސެލޯނާ އިން ގެނައި ފަސް ބަދަލާ ކަމަށެވެ. އޭނާ ބުނީ ކުޅުންތެރިންގެ ކުޅުމާ މެދު ވެސް ހިތްހަމަ ޖެހޭ ކަމަށެވެ. އެއީ ބައެއް ގޮންޖެހުންތަކާއެކު ވެސް މެޗުން މޮޅުވުން މުހިންމުކަން ކުޅުންތެރިންނަށް އިހުސާސްވުމުން ކަމަށް އޭނާ ބުންޏެވެ. ޒަވީ ބުނީ ފުރަތަމަ ހާފާ ޚިލާފަށް ދެ ވަނަ ހާފުގައި ބާސެލޯނާ އިން ރަނގަޅަށް ކުޅުނު ކަމަށެވެ. ޚާއްސަކޮށް ގިނަ ހަމަލާތަކެއް އުފެއްދުމަށް މަސައްކަތް ކުރި ކަމަށާއި، ފަހަތުގައި ތިބެގެން ކުޅުމުގެ ބަދަލުގައި ކުރިއަށް ވެސްް ޖެހުނު ކަމަށެވެ.

މެޗުގައި ޕެޑްރީ ލަނޑު ޖެހުމަށް އިލްކާއި ގުންޑޮގާން ތަނަވަސްކޮށްދިން ފުރުސަތާ ގުޅޭ ގޮތުން ޒަވީ ބުނީ، މިދިޔަ ސީޒަނުގައި ނެތް ބަޔަކީ އެއީ ކަމަށެވެ. އޭނާ ބުނީ ގަވީ، ޕެޑްރީ އަދި އޯރިއޮލް ރޮމެއޫ ވެސް އެކަމަށް ޚާއްސަ މަސައްކަތްތަކެއް އަދިވެސް ކުރަން ޖެހޭ ކަމަށެވެ. އޭނާ ފާހަގަ ކުރި ގޮތުގައި ބާސެލޯނާ އިން ގުންޑޮގާން ހޯދަން ބޭނުންވީ ވެސް، އެކަހަލަ ކަންކަމަށް ވިސްނައިގެން ކަމަށާއި، މުޅި މެޗު އެނބުރު ޕާހަކީ ގުންޑޮގާންގެ ޕާސް ކަމަށެވެ. އެހެންކަމުން ބާސެލޯނާގައި ގުންޑޮގާން ދައްކާ ކުޅުމާ މެދު ހިތްހަމަ ޖެހޭ ކަމަށް ޒަވީ ވަނީ ބުނެފަ އެވެ. ބާސެލޯނާގެ ޕޮލެންޑު ފޯވާޑް ރޮބާޓް ލެވަންޑޯސްކީއާ ގުޅޭ ގޮތުން ޒަވީ ބުނީ، ކޮންމެ ފޯވާޑަކަށް ވެސް ބޭނުންވަނީ ލަނޑު ޖެހުން ކަމަށާއި، ލެވަންޑޯސްކީ އަށް ވެސް އެކަން ބޭނުންވާ ކަމަށެވެ. ނަމަވެސް ލެވަންޑޯސްކީ ކެތްތެރިވާން ޖެހޭނެ ކަމަށާއި، ވަގުތު ނަގައިގެން ކުޅުނު ވަރަކަށް އޭނާ އަށް ލަނޑު ޖެހެނޭ ކަމަށް ވެސް ޒަވީ ވަނީ ބުނެފަ އެވެ.

އިތުރަށް އޭނާ ބުނީ ރަނގަޅު ކުރަން ޖެހޭ ކަންކަން މެޗުން ފާހަގަވި ކަމަށާއި، ކުރިއަށް އޮތް މެޗަށް ކުރިމަތިލާންވާއިރަށް އެކަންކަމަށް ޚާއްސަ ސަމާލުކަމެއް ދީގެން މަސައްކަތް ކުރާނެ ކަމަށެވެ.