ދަރަނީގެ މައްސަލައަކާއި ގުޅިގެން، ޕީއެސްއެމްގެ ބައެއް މާލީ މުއާމަލާތްތައް ހުއްޓާލަން ސިވިލް ކޯޓުގެ އަމުރެއް

ދަރަނީގެ މައްސަލައަކާއި ގުޅިގެން، ޕީއެސްއެމްގެ ބައެއް މާލީ މުއާމަލާތްތައް ހުއްޓާލަން ސިވިލް ކޯޓުން އަމުރުކޮށްފިއެވެ.

މިއީ އާރޓިސަން ޕްރައިވެޓް ލިމިޓެޑް ކިޔާ ކުންފުންޏަކަށް ޕީއެސްއެމްއިން ދައްކަންޖެހޭ 4.5 މިލިއަން ރުފިޔާ ހޯދުމަށް އެ ކުންފުނިން ޙުކުމް ތަންފީޒު ކޮށްދިނުން އެދި ހުށައެޅުމުން ކޯޓުން ނެރެފައިވާ އަމުރެކެވެ. އެގޮތުން އެ ފައިސާ ދެއްކުމަށް 2021 ވަނަ އަހަރު ޙުކުމްކޮށްފައިވީނަމަވެސް، މިހާތަނަށްވެސް ފައިސާ ދައްކާފައެއްނުވެއެވެ.

ޕީއެސްއެމް ހިންގުމަށް ކޮންމެ މަހަކު 8 މިލިއަން ރުފިޔާ ޚަރަދުވާކަމަށް ޕީއެސްއެމްއިން ވަނީ ކޯޓަށް އަންގާފައެވެ. ނަމަވެސް އެ މިންވަރާ ގާތްކުރާ އަދަދަކަށްވެސް ޕީއެސްއެމްގެ ބޭންކު އެކައުންޓުތަކުގައި ފައިސާ ހުރިކަން ކޯޓުން ހޯދި މައުލޫމާތުތަކުން އެނގޭކަށް ނެތެވެ.

ވުމާއެކު، ކޯޓުން ވަނީ އެ ޚަރަދުތައް ކުރުމަށް ޕީއެސްއެމްއަށް ފައިސާ ލިބެނީ ކޮން ފަރާތަކުންކަމާއި، އެ ފައިސާ ލިބެނީ ކޮން ވަސީލަތެއް މެދުވެރިކޮށް، ކޮން ގޮތަކުންކަން ކޯޓަށް އެންގުމަށް ދަންނަވާފައެވެ. އޭގެ ތެރޭގައި ޕީއެސްއެމްގެ މިލްކިއްޔާތުގައިވާ އުފުލޭ މުދަލާއި، ނުއުފުލޭ މުދަލާއި، ފައިސާއާއި، އަރަންޏާއި ދަރަނި ހިމެނޭގޮތުން ކުންފުނީގެ މާލީ ޙާލަތުގެ ތަފްސީލީ މައުލޫމާތުތައް ހޯދުމަށް ކޯޓުން އެދިފައިވެެއެވެ.

ސިވިލް ކޯޓުން ވަނީ އެ މައުލޫމާތުތައް ސާފު ކުރުމަށްފަހު 24 އޯގަސްޓުގެ 12:00 ގެ ކުރިން ކޯޓަށް ފޮނުވުމަށް ޕީއެސްއެމްއަށް އަމުރުކޮށްފައެވެ.

އަދި މި މައްސަލައިގައި ހިމެނޭ ދަރަނި ޚަލާސް ކުރެވެންދެން، ނުވަތަ ޝަރީއަތުން އެހެން ގޮތަކަށް އަންގަންދެން ޕީއެސްއެމްގެ މިލްކިއްޔާތުގައިވާ އެއްވެސް މުދަލެއް ޝަރީއަތުގެ ހުއްދަ ނެތި ނުވިއްކުމަށާއި، މުދާ އެހެން ފަރާތަކަށް ބަދަލުވާނެ ފަދަ އެއްވެސް މުއާމަލާތެއް ނުކުރުމަށް  ކޯޓުން ވަނީ އަމުރުކޮށްފައެވެ.