ބާސެލޯނާގެ ސްޕޯޓިންގ ޑިރެކްޓަރަކަށް އެކްލަބްގެ ކުރީގެ މިޑްފީލްޑަރ ޑެކޯ ހަމަޖައްސައިފިއެވެ.
ޑެކޯއަކީ ބްރެޒިލްއަށް އުފަން ނަމަވެސް, ޕޯޗްގަލް ޤައުމީ ޓީމަށް ކުޅުނު ކުޅުންތެރިއެކެވެ. 45 އަހަރުގެ ޑެކޯ ބާސެލޯނާއާ އެކު ސޮއިކުރީ ތިން އަހަރުގެ އެއްބަސްވުމެއްގައެވެ. ޑެކޯ އެންމެ ފުރަތަމަ ބާސެލޯނާއާ ގުޅުނީ 2004 ވަނަ އަހަރު ޕޯޗްގަލްގެ ޕޯޓޯއިންނެވެ. ހަތަރު ސީޒަންގައި ބާސާއާ އެކު ލަލީގާ ދެ ފަހަރު ހޯދިއެވެ. 2006 ވަނަ އަހަރު ޗެމްޕިއަންސް ލީގުވެސް ހޯދިއެވެ. ހަތަރު އަހަރުން 161 މެޗު ކުޅެ ބާސާއަށް 20 ގޯލް ޖަހައިދިނެވެ.
ކޯޗު ޒަވީއާ ކޯޗިންގ ޓީމްގެ އެހެން މެންބަރުންނާއެކު ޑެކޯ ގާތުން މަސައްކަތް ކުރާނެކަމަށް ބާސެލޯނާއިން ބުންޏެވެ. ކްލަބުން ބުނީ ޑެކޯއާއެކު އަލުން ރީސްޓްރަކްޗަރ ކުރާނެކަމަށެވެ. ތަފްސީލްތައް ކުރިއަށް ހުރި ހަފްތާތަކުގައި އިއުލާން ކުރަމުންދާނެކަމަށް ވެސް ބާސާއިން ބުންޏެވެ.
ޑެކޯ ވަނީ ބާސެލޯނާގެ އިތުރުން ދެ ސީޒަން ޗެލްސީއަށް ވެސް ކުޅެފައެވެ. ކެރިއަރު ނިންމާލީ އުފަން ގައުމު ބްރެޒިލްގައެވެ.
