ސެވިއްޔާ އަށް ކުޅެމުން އަންނަ މޮރޯކޯގެ ގޯލް ކީޕަރު ޔަސިން ބޯނޯ ހޯދުމުގެ ރޭހުން ޖަރުމަނުގެ ބަޔާން މިއުނިކް ނިކުމެއްޖެ އެވެ.

ބަޔާންގެ އެއް ވަނަ ގޯލް ކީޕަރު މެނުއަލް ނޯޔާ އަށް އަނިޔާވެ ކުޅުމާ ދުރަށް ދާން ޖެހުމުން އެ ކުލަބުން ގެނައީ ޔެން ސޮމާ އެވެ. ނަމަވެސް މި ސީޒަން ފެށުމުގެ ކުރިން އޭނާ ވަނީ އިޓާލިއަން ލީގުގެ އިންޓަ މިލާނަށް ބަދަލުވެފަ އެވެ. އެއާއެކު ބަޔާނުން އައީ ބަދަލު ކީޕަރެއް ހޯދުމުގެ މަސައްްކަތް ކުރަމުންނެވެ. ބަޔާނުން ގެންނަން ލިސްޓު ކުރި ކީޕަރުންގެ ކުރީގައި އޮތީ ބޯނޯ އެވެ. އޭނާ ހޯދުމުގެ މަޝްވަރާތައް ބަޔާނުން ސެވިއްޔާ އާއެކު ކުރަމުން ދަނިކޮށް، ބޯނޯ ހޯދުމުގެ ރޭހަށް ސައުދީ ޕްރޯ ލީގުގެ އަލް ހިލާލުން ވެސް ވަނީ ވަދެފަ އެވެ. އެހެންކަމުން ބޯނޯ ހޯދުމުގެ ރޭހުގައި އޮތީ ބަޔާން އާއި އަލް ހިލާލްގެ ވާދަވެރި ކަމެވެ.

އެހެން ނަމަވެސް، ބޯނޯ ހޯދުމުގެ ރޭހުން ބަޔާން ވަނީ އަންގާރަ ދުވަހު ނިކުމެފަ އެވެ. ބަޔާނުން އެ މަޝްވަރާތައް ހުއްޓާލީ ބޯނޯ ހޯދުމަށް އަލް ހިލާލުން ހުށަހަޅާ އަގު ބޮޑުވެ، ބަޔާނަށް އެ އަގާ ވާދަކުރެވެން ނެތިގެން ކަމަށް މީޑިއާ ތަކުން ބުނެ އެވެ. އެހެންކަމުން އަލް ހިލާލުން އަންނަނީ ބޯނޯ ހޯދުމުގެ ޑީލް ނިންމުމަކާ ކައިރިއަށް ޖެހެމުން ކަމަށް ވެސް ވަނީ ބުނެފަ އެވެ. އަލް ހިލާލުން ހުށަހަޅާ އަގާމެދު ސެވިއްޔާ އަށް ރުހޭ ކަމަށް ވެސް ބުނެފައިވެ އެވެ. ސެވިއްޔާ އާއެކު ބޯނޯ ސޮއި ކޮށްފައިވާ ހަތަރު އަހަރުގެ އެއްބަސްވުމުގެ މުއްދަތު ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ.

އުމުރުން 32 އަހަރުގެ ކީޕަރު ވިދާލީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތުންނެވެ. މޮރޮކޯ އިން މުބާރާތުގެ ސެމީ ފައިނަލާ ހަމައަށް ދިޔައިރު، ބޯނޯ ވަނީ އެ ޓީމުގެ ގޯލުގައި މޮޅު ކުޅުމެއް ދައްކައިފަ އެވެ. މުބާރާތުގެ ގަދަ 16 ވަނަ ބުރުގައި ބޯނޯ ވަނީ ސްޕެއިންގެ ދެ ޕެނަލްޓީ ހުއްޓުވައި، ސްޕެއިން މުބާރާތުން ކަޓުވާލައިފަ އެވެ. އޭގެ ފަހުން ކުއާޓާ ފައިނަލްގައި ޕޯޗުގަލާ ދެކޮޅަށް ވެސް ބޯނޯ ވަނީ މޮޅަށް ކުޅެފަ އެވެ. ބޯނޯ ވަނީ މިހާތަނަށް 141 މެޗުގައި ސެވިއްޔާގެ ގޯލު އިތުބާރާއެކު ބަލަހައްޓައިފަ އެވެ. ޤައުމީ ޓީމުގެ ގޯލު އޭނާ ވަނީ 54 މެޗުގައި ބަލަހައްޓައިފަ އެވެ.