ލޯނު އެއްބަސްވުމެއްގެ ދަށުން ޑޭވިޑް ރާޔާ އާސެނަލްއަށް

ލޯނު އެއްބަސްވުމެއްގެ ދަށުން, އާސެނަލްއަށް ބްރެންޓްފޯޑްގެ ކީޕަރު ޑޭވިޑް ރާޔާ ސޮއިކޮށްފިއެވެ.

ސްޕެއިންގެ ކީޕަރު އާސެނަލްއާ ގުޅުނީ މި ސީޒަނުގެ ނިޔަލަށެވެ. ނަމަވެސް، މި އެއްބަސްވުމުގެ ދަށުން ދާއިމީކޮށް އޭނާ ގެނައުމުގެ ފުރުސަތު އާސެނަލްއަށް ލިބޭނެއެވެ. އުމުރުން 27 އަހަރުގެ މި ކީޕަރު ގުޅުމާއެކު، އާސެނަލްގެ ކީޕަރު ރަމްސްޑޭލްއަށް ވާދަވެރިކަން އިތުރުވާނެއެވެ.

މިދިޔަ ސީޒަން ބްރެންޓްފޯޑުން ތާވަލުގެ ނުވަވަނާގައި ނިންމާލިއިރު، ރާޔާ ވަނީ ބައިކޮޅަށް ލަނޑެއް ވަނަނުދީ 11 މެޗު ފުރިހަމަކޮށްފައެވެ. އޭނާ ވަނީ ލީގުގެ ހުރިހާ މެޗެއްގައި އެ ޓީމުގެ ގޯލު ބަލަހައްޓާފައެވެ. 2019 ވަނަ އަހަރު ބްރެންޓްފޯޑާ ގުޅުމަށްފަހު އޭނާ ވަނީ ޖުމްލަ 161 މެޗު ކުޅެދީފައެވެ.

ރާޔާއަށް ވަނީ 2022 ވަނަ އަހަރު ސްޕެއިންގެ ގައުމީ ޓީމުންވެސް ޖާގަ ލިބިފައެވެ. މިދިޔަ އަހަރުގެ ވޯލްޑް ކަޕުގައި ސްޕެއިންގެ ޓީމުގައި ހިމެނުނުއިރު، އޭނާ ވަނީ މި އަހަރުގެ ނޭޝަންސް ލީގު، ސްޕެއިނާއެކު ކާމިޔާބުކޮށްފައެވެ. އާސެނަލްގެ ސްޕޯޓިންގ ޑިރެކްޓަރ އެޑޫ ބުނީ ރާޔާއަކީ މަތީ ފަންތީގައި ގިނަ ދުވަސްތަކެއް ވަންދެން ކުޅެފައިވާ މޮޅު ކީޕަރެއް ކަމަށެވެ.

މި ސީޒަނުގެ ފުރަތަމަ މެޗުގައި އާސެނަލްއިން ވަނީ ނޮޓިންހަމް ފޮރެސްޓުގެ މައްޗަށް ކުރިހޯދާފައެވެ. ދެވަނަ މެޗުގައި އަންގާރަ ދުވަހު އާސެނަލް ނިކުންނާނީ ކްރިސްޓަލް ޕެލެސްއާ ދެކޮޅަށެވެ.