އެކި ސަބަބުތަކާހުރެ ކްލިއަރ ކުރުން ލަސްވާ މުދާ ބާލާ ބެހެއްޓޭނެ ސްޓޯރޭޖް ފެސިލިޓީއެއް މޯލްޑިވްސް ޕޯޓްސް ލިމިޓެޑް (އެމްޕީއެލް)ން ގާއިމުކޮށްފިއެވެ.

އެމްޕީއެލުން މި ސްޓޯރޭޖު ފެސިލިޓީ ގާއިމުކުރީ މިމަހުގެ 5 ވަނަ ދުވަހުއެވެ. އެމްޕީއެލުން ބުނީ މި ސްޓޯރޭޖު ފެސިލިޓީއަށް ބަދަލުކުރާނީ ކޮންޓެއިނަރ ތަކުގެ ތެރެއިން 10 ދުވަހަށްވުރެ އިތުރު މުއްދަތަކަށް ކޮންޓެއިނަރ ގައި ހުންނަ މުދާކަމަށެވެ.

މި ފެސިލިޓީއާ ގުޅޭގޮތުން ނޫސްވެރިނަށް މައުލޫމާތު ދެއްވަމުން އެމްޕީއެލްގެ ސީއީއޯ ޝާހިދު އަލީ ވިދާޅުވީ، މިސްޓޯރޭޖް ފެސިލިޓީ ހެދީ ކުދި ވިޔަފާރިތަކަށް މުދާ ގެންނަ ފަރާތްތަކުގެ އެދުމުގެ މަތިން ކަމަށެވެ. ޝާހިދު ވިދާޅުވީ ކުދި ވިޔަފާރިކުރާ ފަރާތްތަކުން ގިނަ ވިޔަފާރިތައް އެކުވެ އެއް ކޮންޓެއިނަރުގައި މުދާ އެތެރެކުރާކަމަށެވެ. ނަމަވެސް އެއިން ވަކި މުދަލެއް ކްލިއަރ ކުރަން ލަސްވިނަމަވެސް، މުޅި ކޮންޓެއިނަރަށް ބޮޑު ފީ އެއް އިތުރަށް ދައްކަންޖެހޭކަމަށެވެ.

އަލަށް އިތުރުކުރި ސްޓޯރޭޖް ކެޕޭސިޓީއާއެކު، ކޮންޓެއިނަރުން އަވަހަށް މުދާ ހުސްކޮށް، ކޮންޓެއިނަރަށް ދަންކަންޖެހޭ ފީން ސަލާމާތްވާނެ ކަމަށް ޝާހިދު ވިދާޅުވިއެވެ. އަދި މިގޮތަށް ކޮންޓެއިނަރުތައް ހުސްނުވެ، ލަސްވުމަކީ ޝިޕިންލައިންތަކަށްވެސް އޭގެ ދަތިކަން ދިމާވާ ކަމެއްކަމަށް ޝާހިދު ވިދާޅުވިއެވެ.

މި ޚިދުމަތަކާއި ގުޅޭގޮތުން އެމްޕީއެލްގެ ޖެނެރަލް މެނޭޖަރ، ޠަލްޙަތު ސަޢީދު ވިދާޅުވީ މިހާރު ހުރި ކެޕޭސިޓީގައި 550 ކިއުބިކް މީޓަރު(ސީބީއެމް)ގެ މުދާ ބެހެއްޓޭނެކަމަށެވެ. އެއީ 16 ކޮންޓެއިނަރުގެ މުދަލެވެ. ތަލްހަތު ވިދާޅުވީ މުދާ ޕޯޓުން ނެރުމުގެ މަސައްކަތްތައް ކޮންމެ ދުވަހަކުވެސް ކުރިއަށްގެންދާތީ، ޖާގައިގެ މައްސަލަ މާބޮޑަށް ކުރިމަތިވާނެ ކަމަށް ނުބެލެވޭކަމަށެވެ.

އެމްޕީއެލުން ބުނީ ކެޕޭސިޓީގައި ދަތިކަމެއް ކުރިމަތިވޭތޯ ދެ މަސް ދުވަހަށް ބަލާނެކަށެވެ. އަދި އިތުރަށް ބަދަލެއް ގެންނަންޖެހޭނަމަ، ޕޯޓު ތެރެއިން ކޮންމެވެސް ވަރަކަށް އިތުރަށް ޖާގަ ލިބޭނެކަމަށެވެ.

ސަރުކާރުން ގުޅީފަޅުގައި މިހާރު ޕޯޓު ތަރައްޤީކުރަމުން އަންނައިރު މިފަދަ ޚިދުމަތްތަކަށް ޚާއްސަކޮށް ޖާގަ ކަނޑައަޅާނެކަމަށް އެޕްޕީއެލުން ބުނެއެވެ.

އެމްޕީއެލްގެ ޕޯޓަށް އެވަރެޖްކޮށް ދުވާލަކު 187 ކޮންޓެއިނަރުގެ މުދާ ހުސްކުރެއެވެ.