މިޔަރުގެ ހަމަލާގައި ފައި ބުރިކޮށްލި އުމަރު، ދުނިޔޭގެ ރެކޯޑް ފޮތަށް

ކަނޑުގެ މަތީގައި ހިނގާ ހިތާމަވެރި ހާދިސާތަކުގެ ވާހަކައަކީ ހިތްދަތި ވާހަކަތަކެއް ނަމަވެސް، އެ ވާހަކަތަކުގައި އެތައް ބަޔަކަށް ޢިބުރަތްތަކެއް ވެއެވެ. މިސްރުގެ ޒުވާން އެތުލީޓު، އުމަރު އަބްދުލްގާދިރުގެ ދިރިއުޅުމުންވެސް ކިޔައިދެނީ ހަމަ އެފަދަ ވާހަކަތަކެކެވެ. މިޔަރުގެ ހަމަލާއަކަށްފަހު ފައި ބުރިކޮށްލަން ޖެހުން ވީ، އުމުރުން 29 އަހަރުގެ އުމަރުގެ ދިރިއުޅުން ބަދަލުކޮށްލި ހާދިސާއަކަށެވެ. ކުރިމަތިލާން ޖެހުނު މާޔޫސް ކަމުގެ ތެރެއިން ނުކުތުމަށް ޢުމަރު ގަދައަޅައި މަސައްކަތްކުރިއެވެ. އެ ހިތްދަތިކަމުން ސަލާމަތްވުމަށްޓަކައި، އުމަރު ޚިޔާރުކުރީ ކުޅިވަރުގެ މައިދާނެވެ.

މިސްރުގެ ރެޑް ސީގައި ފަތަމުން ދަނިކޮށް މިޔަރެއްގެ ޝިކާރައަކަށްވެ، އުމަރުގެ ވާތުފައި، ކަކުލު ހުޅުން މަތިން ބުރިކޮށްލީ މީގެ 7 އަހަރު ކުރިންނެވެ. އުމަރު ޖިމަށް ދާންފެށި ހިސާބަކީ އެއީއެވެ. ނަފްސާނީ އަދި ޖިސްމާނީ ފަރުވާއެއްގެ ގޮތުގައެވެ. އޭނާގެ ޖަޒުބާތުތަކާއި އިހުސާސްތަކަށް އުފާވެރިކަމެއް ހޯދުމުގެ ބޭނުމުގައެވެ.

އެތައް އަހަރެއްގެ ތަމްރީނުތަކަށްފަހު ވަރުގަދަ އަމާޒެއް ހާސިލުކުރުމަށް ޢުމަރު އަޒުމު ކަނޑައެޅިއެވެ. ގިނިސް އެލްއޭ1 ވަރލްޑް ރެކޯޑެއް ހަދަން ވާދަކުރަން ނިންމިއެވެ. މަތީގައި ހުރަހަށް އޮންނަ ދަގަނޑެއްގައި އެލިގެން، 1 ގަޑިއިރުގެ ތެރޭގައި އެންމެ ގިނަ ފަހަރަށް ހަށިގަނޑު މައްޗަށް އުފުލާލުމުގެ ރެކޯޑް ނުވަތަ މަސްލް-އަޕްސް ހެދުމަށް އަޒުމު ކަނޑައެޅިއެވެ. އެކަން އޭނާ ކާމިޔާބު ކުރިއެވެ. 1 ގަޑިއިރުގެ ތެރޭގައި 160 ފަހަރު މަސްލް-އަޕްސް ފުރިހަމަ ކޮށްގެންނެވެ.

ދުނިޔޭގެ ފެންވަރުގައި ހަދާ ރެކޯޑްތަކުގެ ކަންކަމާބެހޭ ގިނިސްގެ ކްލެސިފިކޭޝަންގައި އެލްއޭ1 އަކީ، އެއް ފައިގެ ކަކުލުން ހުޅުން ނުވަތަ ކަކުލު ހުޅަށްވުރެ މަތިން ބުރިކޮށްލާފައިވާ މީހުންނަށް ޚާއްސަ ގިންތިއެކެވެ.