"އިންޖެކްޝަން ޖަހަން ދެކޮޅުހަދައި ބަސް ނޭހި ކުއްޖެއްގެ ކަރުގައި މާވިން ދެފަހަރެއްގެ މަތިން ހިފިތަން ދުށިން": ހެކިވެރިޔާ
މޭރީ ގެނައިރުވެސް ވިންދެއް ނެތް، އަތާއި މޫނު ހުރީ ނޫކުލަ އަރާފައި
މޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސް
އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގައި، އޭނާގެ ފިރިމީހާ މާވިން އެސްވައި ވާރގަސް އާއި އޭނާގެ ލޯބިވެރިޔާ ހަލީމަތު ލަމްހާގެ މައްޗަށް ހިންގާ ޝަރީއަތުގެ ހެކިބަސް ނެގުމުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ހޯމަ ދުވަހުގެ އަޑުއެހުމުގައި ވަނީ އައިޖީއެމްއެޗްގެ އީއާރްގައި ނަރުހެއްގެ ވަޒީފާގައި އުޅޭ ފަރާތެއްގެ ހެކިބަސް ނަގާފައެވެ.
އޭނާ ބުނީ، ޙާދިސާ ހިނގި ދުވަހު އޭނާ ހުރީ އައިޖީއެމްއެޗްގެ އީއާރްގައި ކަމަށެވެ. އެ ދުވަހު މޭރީގެ ހަށިގަނޑު ހޮސްޕިޓަލަށް ގެނައިރު އޭނާ ހުރީ ޑިއުޓީގައިކަން ފާހަގަކޮށް އޭނާ ވަނީ އެ ދުވަހު ކަން ހިނގާ ދިޔަ ގޮތާ ގުޅޭގޮތުން ހެކިބަސް ދީފައެވެ.
ހެކިވެރިޔާ ބުނީ، މޭރީ ގެނައިރުވެސް ވިންދެއް ނެތް ކަމަށާއި، އަތާއި މޫނު ހުރީ ނޫކުލަ އަރާފައި ކަމަށެވެ.
އޭނާ ވަނީ މޭރީއަށް ދެވިފައިވާ ފަރުވާތައް ޝަރީއަތުގައި ކިޔާދީފައެވެ.
ހެކިވެރިޔާ ބުނީ، މާވިން ފުރަތަމަ ބުނެފައިވަނީ މޭރީ މަރުވީ ގެނބިގެން ކަމަށެވެ. ނަމަވެސް ފަހުން މާވިިން ބުނީ މޭރީ އަމިއްލައަށް ދަންޖެހުނީކަމަށެވެ.
މޭރީގެ ހަށިގަނޑުން ދަން ޖެހިފައިވާކަމުގެ ނިޝާނެއް ނުފެންނަކަމަށް ހެކިވެރިޔާ ބުންޏެވެ. އެގޮތުން ދަންޖެހިފައިވާ މީހެއްނަމަ، ކަރުން އެކަމުގެ ނިޝާން ފެންނަން ހުންނާނެ ކަމަށް ހެކިވެރިޔާ ބުންޏެވެ.
ހެކިވެރިޔާ ވަނީ އިތުރު ބައެއް ކަންކަންވެސް ހިއްސާކޮށްފައެވެ.
ހެކިވެރިޔާ ބުނީ، އެއް ދުވަހަކު މާވިން ކުޑަ ކުއްޖަކު ކަރުގައި ހިފައި މޭޒަކާއި ދިމާލަށް ޖެހި މަންޒަރު ފެނުނުކަމަށެވެ.
އެއީ 14 އަހަރުގެ ފިރިހެން ކުއްޖެއް ކަމަށާއި، އިންޖެކްޝަން ޖަހަން އުޅުމުގެ ތެރޭގައި އެކުއްޖާ ދެކޮޅުހަދައި ބަސް ނޭހުމުން ދެފަހަރެއްގެ މަތިން އެކުއްޖާގެ ކަރުގައި ހިފައި ޖެހި މަންޒަރު ލޮލުން ދެކެފައިވާކަމަށް ހެކިވެރިޔާ ބުންޏެވެ.
އެ މަންޒަރު ފެނުމުން އެ ދުވަހު ނުހަނު ހައިރާންވިކަމަށްވެސް ހެކިވެރިޔާ ބުންޏެވެ. ނަމަވެސް އެކަމާ ގުޅޭގޮތުން ފަހުން ވާހަކަ ދައްކާފައިނުވާނެކަމަށްވެސް އެ ހެކިވެރިޔާ ބުންޏެވެ.
އެކަން ރިޕޯޓު ނުކުރީ ކީއްވެތޯ ސުވާލު ކުރުމުން ހެކިވެރިޔާ ބުނީ، އެކަމާ އިތުރަށް އުޅެފައިނުވާނެކަމަށެވެ. އެކަން އައިޖީއެމްއެޗުން ތަހުގީގުކޮށްފައި ނުވާނެކަމަށްވެސް ހެކިވެރިޔާ ބުންޏެވެ.
އެކުއްޖާއަކީ ސައިކޭޓްރިކް ޕޭޝަންޓެއް ކަމަށާއި، އެއީ ޑޮކްޓަރަކު ކަންކޮށްގެންވާނެ ގޮތެއް ނޫންކަމަށްވެސް ހެކިވެރިޔާ ބުންޏެވެ.
ދިފާއީ ވަކީލުން ވަނީ ކުޑަކުއްޖަކާމެދު އެފަދަ ކަމެއް ހިނގާދިޔައިރު، އެކަން ވެރިންނަށް ރިޕޯޓު ނުކުރީ ކީއްވެތޯ ތަކުރާރު ކުރައްވާފައެވެ.
އެކަމާ ގުޅޭގޮތުން ދައުލަތުގެ ވަކީލު ވިދާޅުވީ، މާވިން އޭނާގެ "ގުޑް ކެރެކްޓަރ" ބަޔާންކޮށްދިނުމަށް ހެކި ހުށައަޅާފައިވާ ކަމަށާއި، ވުމާއެކު އެކަން ނަފީކުރުމަށް ދައުލަތުން ހުށައެޅި ހެކީގެ ތެރޭގައި މި ހެކިވެރިޔާވެސް ހިމެނޭ ކަމަށެވެ.
