އެޑްވާންޓޭޖް އޮތީ އީގަލްސްއަކަށް ނޫން: އަބަހާނީ
ދެ ޓީމަކީ ވެސް ވަރަށް ހަމަހަމަ ދެ ޓީމު: ލެމޯސް
އީގަލްސް ޓީމު ބަންގްލަދޭޝްގައި ފަރިތަކުރަނީ
އޭއެފްސީ ކަޕް ފުޓްބޯޅަ މުބާރާތުގެ ޕްރިލިމިނަރީ ބުރުގައި ރާއްޖޭގެ ކުލަބު އީގަލްސްއާ ދެކޮޅަށް ކުޅޭ މެޗުގައި އެޑްވާންޓޭޖް އޮތީ ބަންގަލްދޭޝްގެ އަބަހާނީ ލިމޓެޑަށް ކަމަށް އެ ޓީމުން ބުނެފި އެވެ.
އަންނަ ބުދަ ދުވަހު ކުޅޭ މެޗަށް އީގަލްސް މިހާރު ވަނީ ބަންގްލަދޭޝްގައި ފަރިތަކުރަން ފަށައިފަ އެވެ.
ނަމަވެސް އަބަހާނީގެ ކޯޗު މާރިއޯ ލެމޯސް ބުނީ އަމިއްލަ ދަނޑުގައި ކުޅޭތީވެ އޭނާގެ ޓީމަށް މެޗު ކާމިޔާބު ކުރުމުގެ ފުރުސަތު ބޮޑު ކަމަށެވެ.
އޭނާ ބުނީ މި މެޗަށް ބިދޭސީ ފަސް ކުޅުންތެރިއަކު ގެނެސް ޓީމު ވަރުގަދަ ކުރުމަށް ނިންމީ އޭނާގެ ޓީމުގައި ތިބި ބިދޭސީ ކުޅުންތެރިންގެ ކުރިމަގު މަކިގޮތަކަށް ނިމިފައިނުވާތީ ކަމަށެވެ.
ޓީމަށް އަލަށް ގެނެސްފައިވަނީ ޗިޓަގޮން އަބަނާނީ އަށް ކުޅުނު މިސުރުގެ މިޑްފީލްޑަރަކާއި ނައިޖީރިއާގެ ފޯވަޑަކާއި މުހައްމަދަން ސްޕޯޓިން އަށް ކުޅުނު އުޒްބަކިސްތާނުގެ މިޑްފީލްޑަރަކާއި ފޯޓިސް އެފްސީ އަށް ކުޅޭ ބްރެޒިލްގެ ޑިފެންޑަރަކާއި ޝައިހް ޖަމާލް ދަންމޮންޑީއަށް ކުޅޭ ސެއިން ވިންސެންޓްގެ ފޯވަޑް ކޯނެލިއަސް ސްޓެވާޓެވެ. މީގެ ތެރެއިން ސްޓެވާޓަކީ ރާއްޖޭގެ މާޒިޔާ އާއި ޓީސީ އަށް ކުރިން ކުޅެ ގިނަ ގޯލުތަކެއް ޖަހާފައިވާ ކުޅުންތެރިއެކެވެ.
