ސިކުނޑިއަކީ އިންސާނާގެ ހަށިގަނޑުގައި ވާ ގުނަވަންތަކުގެ ތެރެއިން އެންމެ މުހިންމު އެއް ގުނަވަނެވެ. ސިކުނޑީގެ ދުޅަހެޔޮކަން ކަށަވަރުކޮށް، ސިކުނޑީގެ ބަލިތަކަށް އެކަށީގެންވާ ފަރުވާ، ވީ އެންމެ އަވަހަކަށް ހޯދުންވެސް އެހާމެ މުހިންމެވެ. ސިކުނޑީގެ ބަލިތަކަށް ދެނެގަތުމަށް ތަފާތު އެކި ކަހަލަ ޓެސްޓުތައް ހަދައެވެ. ޒަމާނާއެކު ސައެންސްއާއި ޓެކްނޮލޮޖީއަށް އަންނަމުން ދާ ކުރިއެރުންތަކާއެކު، ސިކުނޑީގެ ބަލިތަކާއި ހާލަތު ދެނެގަންނާނެ އާ ގޮތެއް، ޖަރުމަނުވިލާތުގެ މިއުނިކްގައި ހުންނަ ހެއިމްހޯޓްޒް އިންސްޓިޓިއުޓްއިން ދާދި ފަހުން ވަނީ ހޯދާފައެވެ.
ހެއިމްހޯޓްޒް އިންސްޓިޓިއުޓްގެ އިންޤިލާބީ ހޯދުމަކީ، ސިކުނޑިއަށް ޖެހޭ އަލްޒައިމާޒްއާއި ސްޓްރޯކް ފަދަ ބަލިތައް ދެނެ ގަތުމަށް ބޭނުން ކުރެވިދާނެ ހޯދުމެކެވެ. ހެއިމްހޯޓްޒް އިންސްޓިޓިއުޓްއިން ބުނާ ގޮތުގައި މި ހޯދުމަކީ، ސިކުނޑީގެ ބަލިތަކުގެ ހާލަތު މޮނިޓަރ ކުރުމުގެ ކަންކަން މާ ފުރިހަމައަށް ކުރެވިގެން ދިއުމުގެ މަގު ފަހި ކުރުމުގެ ފުރުޞަތު އޮތް ހޯދުމެކެވެ. އަދި ބަލީގެ އާލާމާތްތައް ދުރާލާ ދެނަގަނެ، ސިކުނޑިއަށް ޖެހޭ ސީރިއަސް ބައްޔަކުން ރައްކާތެރިކަން ހޯދުމުގެ ފުރުޞަތުވެސް އޮތް ހޯދުމެއް ކަމަށް ހެއިމްހޯޓްޒް އިންސްޓިޓިއުޓްއިން ވަނީ ބުނެފައެވެ.
ވަރަށް ހައި ރެޒޮލޫޝަން ފޮޓޯތައް އަހަރަމެންނަށް އުފެއްދޭ. ބޮލުގެ ނާށިގަނޑާއި، ސިކުނޑިއާ، މިހެން ގޮސް ހުރިހާ ބައިތަކެއް އެއްކޮށް، ސެލްތައް ވަކިވަކީން އަހަރަމެންނަށް ބަލާލެވިދާނެ. އެއްކޮޅުން އަނެއް ކޮޅަށް. އެކަމުގެ ތެރެއިން އަހަރަމެންނަށް ފެނުނު އެއްޗަކީ، އިންސާނާގެ ބޮލުގެ ނާށިގަނޑާއި ސިކުނޑީގެ ސަތަހައާ ދެމެދު އޮތް ގުޅުންތައް. އެ ގުޅުންތަކުގެ ބޭނުން އަހަރަމެންނަށް މިހާރު ކުރެވޭނެ. ފުރަތަމަ ކަމަކީ، ސިކުނޑީގެ ބަލީތައް މޮނިޓަރ ކުރުން. ދެން، ސިކުނޑީގެ ބަލިތަކުގެ ފަރުވާއަށްވެސް މިކަން ބޭނުން ކުރެވިދާނެ.އާލީ އެރުތުކް؛ ހެއިމްހޯޓްޒް އިންސްޓިޓިއުޓް
ހެއިމްހޯޓްޒް އިންސްޓިޓިއުޓްގެ ދިރާސާ ޓީމުން ހޯދި ހޯދުންތަކުން، ބޮލުގެ ނާށިގަނޑުގެ ބޯން މެރޯއާއި، ސިކުނޑީގެ ސަތަހައާއި ދެމެދު ސީދާ ގުޅުންތަކެއް ވާ ކަން ވަނީ ދެނެގަނެވިފައެވެ. މިއީ މީގެ ކުރިން ސައެންސްގެ އަލީގައި ހޯދިފައި އޮތް ކަމެއް ނޫން ކަމަށް ޚަބަރު ލިބެއެވެ. ދިރާސާ ކުރުމުގައި އިސްކޮށް ހުންނެވީ ހެއިމްހޯޓްޒް އިންސްޓިޓިއުޓްގެ އިންސްޓިޓިއުޓް ފޮރ ޓިޝޫ އިންޖިނޭރިންގް އެންޑް ރިޖެނެރޭޓިވް މެޑިސިންގެ އިސްވެރިޔާ އާލީ އެރްތުކްއެވެ. ޓިޝޫ ޓްރާންސްޕޭރަންސީއާއި ތުރީޑީ އިމޭޖިންގް ޓެކްނޮލޮޖީ ބޭނުން ކޮށްގެން އެރުތުކްއާއި އޭނާގެ ޓީމުން ހޯދި ހޯދުންތަކުން، ބޮލުގެ ނާށިގަނޑަކީ، މީގެ ކުރިން އެނގިފައި ނުވާ މިންވަރަށް، ސިކުނޑީގެ ބަލިތަކުގެ މަޢުލޫމާތު އެކުލެވިގެންވާ ބައެއްކަން ވަނީ ހާމަ ވެފައެވެ.
ވިސްނަންވީ ކިރު ތައްޓަކާއި ފެން ތައްޓެއްގެ ތެރެއިން ބަލާނެ ގޮތަށް. އަހަރަމެން މި ކުރާ ކަމަކީ، ކިރު، ފެނަށް ބަދަލު ކުރުން. އެކަމަށް ބަޔޯކެމިކަލް ޕްރޮސެސްއެއް ބޭނުންވާނެ. އަހަރަމެން މި ވަކިކޮށްގެން ނަގަނީ ކިރުގަ ހުންނަ ހުދު ބައިތައް. އެރުން މިސާފުވާނެތާ. ދެފުށް ފެންނާނެ. އެހާ ހިސާބުން، މީގެ ތެރެއިން އައްޔަށް ދަތުރު ކުރެވޭނެ. އެތެރޭގެ ކަންކަން ހުރި ގޮތް ބަލާލެވޭނެ... ގުނަވަންތައް މަސައްކަތް ކުރާ ގޮތް ބަލާލެވޭނެ، ހަލާކުކޮށް ނުލާ.އާލީ އެރުތުކް؛ ހެއިމްހޯޓްޒް އިންސްޓިޓިއުޓް
އެރުތުކްއާއި އޭނާގެ 30 މެންބަރުންގެ ޓީމުން 4 އަހަރަށް ވުރެ ގިނަ ދުވަސް ވަންދެން ކުރި މަސައްކަތުން ވަނީ ހަށިގަނޑުގެ ގުނަވަންތަކާއި ކަށިތަކުން ދެފުށް ފެންނާނެ ގޮތެއް ތަރައްޤީ ކޮށްފައެވެ. ނުވަތަ ގުނަވަންތަކާއި ކަށިތައް 'ޓްރާންސްޕޭރަންޓް' ވާނެ ގޮތެއް ތަރައްޤީ ކޮށްފައެވެ. އެއާއެކު ބޮލުގެ ނާށިގަނޑުގެ އިންތިހާ ގާތުން ބަލާލުމަށްޓަކާ، ސެލްތައް އެތުރިފައި ވާ ގޮތުގެ މާ ސާފު މަންޒަރެއް ފެނިގެން ދެއެވެ. ސެލްތައް ވަކިވަކީން ބަލާލެވެއެވެ. އެއްކޮޅުން އަނެއް ކޮޅަށެވެ.
އަހަރަމެންނަށް މިހާރު މި ފާހަގަ ކުރެވުނީ، ހަމަ ސިކުނޑިންވެސް ދޭނެ ސިގުނަލް. ބޮލުގެ ނާށިގަނޑުންވެސް ހަމަ އެ ތަސްވީރު ކުރެހިދާނެ އަހަރަމެންނަށް. ލޯގަނޑެއް ކަހަލަ އެއްޗެއް މީ. ދަށުގަ ހިނގާ ކަންކަމުގެ ނަކަލު އެ ފެންނަނީ. އެމްއާރްއައި އާއި ޕެޓް ސްކޭން މެޝިންތަކަކީ ފިސާރި ބޮޑެތި މެޝިންތަކެއް. ނޫންތަ؟ ނާށިގަނޑަކީ ބޭރު ފަށަލަތާ، އެހެންވީމަ، އެމްއާރްއައި މެޝިންތަކަށް ކޮންމެހެން މީހުން ލާން ނުޖެހޭނެ ގޮތް ވުން އަހަރަމެންގެ ތަޞައްވުރަކީ. ސްމަރޓް ގަޑި، ނޫނީ ކުދި ޑިޓެކްޓަރުތައް ބޭނުންކޮށްގެން އެކަންކަން ކޮށްލެވުން. ނާށިގަނޑުގެ ބެރު ފަށަލައިގަ އެ ހަރުކުރާނީ. އޭރުން، ސިކުނޑީގަ ހުރި ބައްޔެއް ވިއްޔާ ދައްކާނެ.އާލީ އެރުތުކް؛ ހެއިމްހޯޓްޒް އިންސްޓިޓިއުޓް
ދިރާސާ ޓީމުގެ ހޯދުންތަކަށް ބަލާއިރު ބޮލުގެ ނާށިގަނޑުގައިވާ މައުލޫމާތަކީ، މޫނު ބަލާ ލޯގަނޑެއް ފަދައިން ސިކުނޑިން ނަކަލު ކޮށްފައި ވާ މައުލޫމާތުކަން ވަނީ ދެނެގަނެވިފައެވެ. އަދުގެ ދުނިޔޭގައިވެސް ސިކުނޑީގެ ބަލިތައް ދެނެގަތުމަކީ މާ ފަސޭހަ ކަމެއް ނޫނެވެ. ސިކުނޑިއާ ހިސާބަށް ވާސިލުވުމަކީ ދަތިކަމަކަށް ވާތީއެވެ. ހެއިމްހޯޓްޒް އިންސްޓިޓިއުޓްގެ ހޯދުންތަކަށް ރިޢާޔަތް ކުރާ އިރު، ސިކުނޑީގެ ބަލިތައް ދެނެގަތުމަށް މިހާރު ބޭނުން ކުރާ އަލްޓްރާސައުންޑާއި އެނޫންވެސް ޓެކްނޮލޮޖީތައް އިތުރަށް ތަރައްޤީ ކުރުމުގެ ފުރުޞަތު ހުޅުވިގެން ދާނެއެވެ. އެގޮތުން، ނާށިގަނޑުގެ ސްކޭނެއްކޮށްގެން ހާލަތު ދެނެގަނެވޭ މިންވަރަށް ޞިއްޚީ ދާއިރާގެ ކަންކަން ތަރައްޤީ ކުރުމުގެ ފުރުޞަތު ހުޅުވިގެންދާނެއެވެ.
ވަކި މުއްދަތަކުން ޤަވައިދުން ހަދަން ޖެހޭ އެމްއާރްއައި ޕެޓް ސްކޭންތަކުގެ ބަދަލުގައި، ދާއިމީ ގޮތެއްގައި ބޮލުގައި ހަރުކުރާ ކުދިކުދި ޑިޓެކްޓަރުތަކެއްގެ އެހީގައި، މަޢުލޫމާތު އެއްކުރެވިގެން ދިއުމުގެ ފުރުޞަތުވެސް މިކަމުގެ ތެރެއިން ފަހިވެގެންދާނެ ކަމަށް އެރުތުކް ޤަބޫލު ކުރައްވައެވެ.
