އިބްތިޚާބު އޮބްޒާވްކޮށް، މޮނިޓަރ ކުރަން ބޭނުންވާ ފަރާތްތަކުން މާދަމާގެ 15:00 ކުރިން ފޯމް ހުށަހެޅުމަށް އިލްތިމާސްކޮށްފި
މޮނިޓަރުންނާއި އޮބްޒާވަރުންގެ ފޯމު އީސީ އަށް އީމެއިލް ވެސް ކުރެއްވޭނެ
އިންތިޚާބާއި ބެހޭ މަރުކަޒު
ރިޔާސީ އިބްތިޚާބު އޮބްޒާވްކޮށް، މޮނިޓަރ ކުރަން ބޭނުންވާ ފަރާތްތަކުން މާދަމާގެ މެންދުރުފަހު 3:00ގެ ކުރިން ފޯމް ހުށަހެޅުމަށް އިލެކްޝަން ކޮމިޝަން (އީސީ)އިން އިލްތިމާސްކޮށްފިއެވެ.
އިންތިޚާބު އޮބްޒާވްކުރުމާއި، މޮނިޓަރ ކުރުމާއި ގުޅޭގޮތުން އިލެކްޝަންސް ކޮމިޝަނުގެ ނައިބު ރައީސް އިސްމާއީލް ހަބީބު ވިދާޅުވީ ރިޔާސީ އިންތިޙާބު 2023 ގައި، ވޯޓު ނެގުމާއި، ގުނުމުގެ ކަންތައްތައް އޮބްޒާވުކުރުމަށާއި މޮނިޓަރ ކުރުމަށް ޝައުގުވެރިވާ ފަރާތްތަކަށް 2023 ޖުލައި 19 ގައި ހުޅުވާލި ފުރުސަތު 2023 އޮގަސްޓް 13 ވާ އާދިއްތަ ދުވަހުގެ 15:00 އާ ހަމަޔަށް ހަމަވާ ކަމަށެވެ.
އެހެންކަމުން ރިޔާސީ އިންތިޚާބު މޮނިޓަރ ކުރަން ބޭނުންފުޅުވާ ނޫސްވެރިންނާއި، އިންތިޚާބު އޮބްޒާވް ކުރަން ބޭނުންވާ މަދަނީ ޖަމިއްޔާތަކުގެ މީހުންނާއި، ޕާޓީތަކުގެ މީހުންނާއި، އަމިއްލަ ހައިސިއްޔަތުން އިންތިޚާބު އޮބްޒާވް ކުރަން ބޭނުންވާ މީހުން މިމަހުގެ 13 (އާދީއްތަ ދުވަހު) ގެ 15:00 ގެ ކުރީން، ފޯމު އަދި ފޯމާ އެކީގައި ހުށަހަޅަންޖެހޭ ތަކެއްޗާ އެކު އީސީ އަށް ހުށަހެޅުމަށް އެދޭ ކަމަށް ހަބީބު ވިދާޅުވިއެވެ. އަދި ވިދާޅުވީ މޮނިޓަރުންނާއި އޮބްޒާވަރުންގެ ފޯމު އީސީ އަށް އީމެއިލް ވެސް ކުރެއްވޭނެ ކަމަށެވެ.
ފޯމު އީސީގެ ވެބްސައިޓުން ޑައުންލޯޑް ކުރެވޭނެއެވެ.
އިންތިޚާބެއްގައި ވޯޓު ނަގާ ދުވަހު އޮބްޒާވަރެއް ނުވަތަ މޮނިޓަރެއް ނުވަތަ ކެންޑިޑޭޓުން އައްޔަނުކުރާ މަންދޫބެއްގެ ހައިސިއްޔަތުން ހަރަކާތްތެރިވުމަށް ހުށަހަޅާ މީހަކީ، އޮބްޒާވަރުންނާއި، މޮނިޓަރުންނާއި، ކެންޑިޑޭޓުން އައްޔަނުކުރާ މަންދޫބެއްގައި ހުރުން ލާޒިމްކުރާ ޝަރުޠުތައް ފުރިހަމަވާ މީހެއްކަމުގައި ވިޔަސް، އެ މީހަކީ އޭނާގެ މައްޗަށް އިންތިޚާބީ ކުށެއް ފާއިތުވި 5 (ފަހެއް) އަހަރުދުވަހުގެ ތެރޭގައި ސާބިތުވެފައިވާ މީހެއްނަމަ، ނުވަތަ އިންތިޚާބުގައި ޢަމަލުކުރަންޖެހޭ ސުލޫކީ މިންގަނޑާ ޚިލާފުވެފައިވާކަން އިލެކްޝަންސް ކޮމިޝަނަށް ސާބިތުވެފައިވާ މީހެއްނަމަ، އެ މީހަކަށް އިންތިޚާބުގައި އޮބްޒާވަރެއްގެ ގޮތުގައި، ނުވަތަ މޮނިޓަރެއްގެ ގޮތުގައި، ނުވަތަ ކެންޑިޑޭޓުންގެ މަންދޫބެއްގެ ގޮތުގައި ހަރަކާތްތެރިވުމުގެ ހުއްދަ ދޫނުކުރުމުގެ އިޚްތިޔާރު އީސީއަށް ލިބިގެންވެއެވެ.
ސެޕްޓެމްބަރު 09 ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބަށް ތައްޔާރުވުމުގެ މަސައްކަތްތައް އީސީން ކުރަމުންދާއިރު، މިއަހަރުގެ އިންތީޚާބުގައި 282،755 މީހުންނަށް ވޯޓުލުމުގެ ހައްގު ލިބިފައިވެއެވެ.
