އިންތިޚާބާއި ގުޅިގެން 7 މައްސަލަ ހުށަހަޅާފައިވޭ، ނަތީޖާއަށް އަސަރުކުރާ ފަދަ މައްސަލައެއް ނެތް: ހަބީބު

މާލޭސިޓީ މޭޔަރު އަދި މާލޭސިޓީ ކައުންސިލަރުންގެ ބައި-އިލެކްޝަންގެ ނަތީޖާއަށް އަސަރުކުރާ ފަދަ މައްސަލައެއް ހުށަހަޅާފައިނުވާ ކަމަށް އިލެކްޝަން ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވެއްޖެއެވެ.

ރާއްޖެއެމްވީއަށް ހަބީބު ވިދާޅުވީ ހޮނިހިރު ދުވަހު ބޭއްވިގެން ދިޔަ އިންތިޚާބުގެ އިންތިޒާމުތަކާއި މެދު ހިތްހަމަޖެހޭ ކަމަށާއި، ދެފުށް ފެންނަ ނިޒާމެއްގެ ތެރެއިން ވަރަށް އިންސާފުވެރިކަމާއެކު ކުރިއަށް ގެންދެވުނު ކަމަށެވެ. ގިނަބައެއްގެ އެއްބާރުލުމާއެކު އިންތިޚާބުގެ ހުރިހާ ކަމެއް ވެސް އަމާންކަމާއި ސުލްހަވެރިކަމާއެކު ކުރިއަށްދިޔަކަން ހަބީބު ފާހަގަކުރެއްވިއެވެ.

ހުށަހެޅިފައިވާ މައްސަތަކައް އިޝާރާތް ކުރައްވައި ހަބީބު ވިދާޅުވީ ޖުމްލަ 7 މައްސަލައެއް ހުށަހަޅާފައިވާ ކަމަށާއި، އެމައްސަލަތައް ކޮމިޝަންގެ ބިއުރޯއިން ބަލަމުންދާ ކަމަށެވެ.

ހަބީބު ވިދާޅުވީ ހުށަހަޅާފައިވަނީ އެންޓި-ކެންޕޭން ކުރުމާއި، މަނާވަގުތު ކެންޕޭން ކުރުމާއި ގުޅޭ މައްސަލަތަކެއް ކަމަށެވެ. ރިޝްވަތުދިން ކަމުގެ ތުހުމަތުގައި ހުށަހަޅާފައިވާ މައްސަލައެއް، ކިޔު ބަންދުކުރި ފަހުން ވޯޓުލާން އައި މީހަކަށް ވޯޓު ނުލެވުނު މައްސަލައެއް ކަމަށް ވެސް ހުށަހަޅާފައިވާ ކަމަށް އޭނާ ވިދާޅުވިއެވެ. އަދި ވިދާޅުވީ އިންތިޚާބުގެ ނަތީޖާއަށް އަސަރުކުރާ ފަދަ މައްސަލައެއް ހުށަހަޅާފައިނުވާ ކަމަށެވެ.

މީގެ އިތުރުން ހަބީބު ވިދާޅުވީ ކައުންސިލް އިންތިޚާބުތަކާއި، ބައި-އިލެކްޝަންތަކުގައި ވޯޓުލާން ނުކުންނަ މީހުންގެ އަދަދު ނިސްބަތުން މަދު ކަމަށެވެ. އަޅާކިޔާ ކަމަށްވާނަމަ ހޮނިހިރު ދުވަހު ބޭއްވިގެން ދިޔަ މި އިންތިޚާބުގައި ވޯޓުލާން ނުކުތް މީހުންގެ އަދަދު ގޯސް ނޫން ކަމަށް އޭނާ ވިދާޅުވިއެވެ.

މިފަހުން ރާއްޖޭގައި ބާއްވާ އިންތިޚާބުތަކުގައި ވޯޓުލާން ނުކުންނަ މީހުންގެ ނިސްބަތް ދަނީ ދަށްވަމުންނެވެ. މިމައްސަލައާ ގުޅިގެން މީގެ ކުރިން އިލެކްޝަން ކޮމިޝަނުން ވަނީ ކަންބޮޑުވުންފާޅު ކޮށްފައެވެ. އެގޮތުން ވޯޓުލާ މީހުންގެ އަދަދު މަދުވާ ސަބަބު ދެނެގަތުމަށް ކަމާގުޅުންހުރި އިދާރާތަކުން މަސައްކަތްކޮށް، ދިރާސާއެއް ހަދަންޖެހޭ ކަމަށް ކޮމިޝަނުން ބުނެފައިވެއެވެ.