މޭޔަރު އަދި މާލޭސިޓީ ކައުންސިލަރުންގެ ބައި-އިލެކްޝަންގެ ކެމްޕޭނުގެ ހަރަކާތްތައް ނިންމާލުމުގައި ވެސް ސުލޫކީ މިންގަނޑު ދަމަހަައްޓަންޖެހޭ: ހަބީބު
ހުކުރު ދުވަހުގެ އިރުއޮއްސި 6:00ގެ ފަހުން ކެމްޕޭން ކުރުމަކީ މަނާކަމެއް
އިލެކްޝަންސް ކޮމިޝަންގެ ނައިބު ރައީސް އިސްމާއިލް ހަބީބު
މާލޭސިޓީ މޭޔަރު އަދި މާލޭސިޓީ ކައުންސިލަރުންގެ ބައި-އިލެކްޝަންގެ ކެމްޕޭނުގެ ހަރަކާތްތައް ނިންމާލުމުގައި ވެސް ސުލޫކީ މިންގަނޑު ދަމަހަައްޓަންޖެހޭ ކަމަށް އިލެކްޝަންސް ކޮމިޝަނުގެ ނައިބު ރައީސް އިސްމާއީލް ހަބީބު ވިދާޅުވެއްޖެއެވެ.
ހުކުރު ދުވަހު ހަބީބު ވިދާޅުވީ މާލޭސިޓީ މޭޔަރު އަދި މާލޭސިޓީ ކައުންސިލަރުންގެ ބައި-އިލެކްޝަން ގައި ބައިވެރިވެ ވަޑައިގެންނަވާ ކެންޑިޑޭޓުންގެ ހައްގަށް އުނިކަން އަންނަ ފަދަ، އިންތިޚާބުތަކާބެހޭ އާންމު ގާނޫނުން ކުރުން މަނާ ކަންތައްތައް އެއްވެސް ފަރާތަކުން ނުކުރުމަށް އެދޭ ކަމަށެވެ. ޚާއްސަ ގޮތެއްގައި ބްރޯޑްކާސްޓަރުން މިކަމަށް ސަމާލުކަން ދިނުމަށް ހަބީބު އިލްތިމާސްކުރެއްވިއެވެ.
ހަބީބު ވިދާޅުވީ ހުކުރު ދުވަހުގެ އިރުއޮއްސި 6:00ގެ ފަހުން ކެމްޕޭން ކުރުމަކީ މަނާކަމެއް ކަމަށެވެ. އޭގެ ކުރިން ކެމްޕޭނުގެ ހަރަކާތްތައް ނިންމާލުމުގައިވެސް، ސިޔާސީ ޕާޓީތަކުންނާއި، ކެންޑިޑޭޓުންނާއި، ސަޕޯޓަރުން، ސުލޫކީ މިންގަނޑު ދަމަހައްޓައި ހިތްގައިމު، ސަޅި ކެމްޕޭނަކުން ވޯޓުލުމުގެ ހައްގު ލިބިފައިވާ މީހުންގެ ހިތް ފަތަހަ ކުރުމަށް އެދޭ ކަމަށެވެ.
މާލޭ ސިޓީގެ ހުސްވެފައިވާ މޭޔަރުގެ މަގާމާއި، މެންބަރުން ހޮވުމަށް ބާއްވާ ބައި-އިލެކްޝަން 13 ޖެނުއަރީ ވާ ހޮނިހިރު ދުވަހު ބޭއްވުމަށް ވަނީ ނިންމާފައެވެ. މި އިންތިޚާބުގެ ރަސްމީ ނަތީޖާ އިއުލާނު ކުރާނީ ޖެނުއަރީ މަހުގެ 15 ދުވަހުއެވެ.
މާލެ ސިޓީ ކައުންސިލްގެ ބައި-އިލެކްޝަންގައި ވޯޓުލާ މަރުކަޒުތަކުގައި ގިނަ އަދަދެއްގެ އޮފިޝަލުން ހަރަކާތްތެރިވަމުން ގެންދާނެއެވެ. އަމާންކަމާ ރައްކާތެރިކަން ކަށަވަރު ކުރުމަށް ފުލުހުން ވެސް ހަރަކާތްތެރިވަމުންދާނެއެވެ. މި އިންތިޚާބު ވެސް އަމާންކަމާއެކު ކުރިއަށް ގެންދިއުމަށް ރައްޔިތުންގެ ފުރިހަމަ އެއްބާރުލުން ބޭނުންވާ ކަމަށް އިލެކްޝަން ކޮމިޝަނުން ބުނެއެވެ.
