ރައީސް ޞާލިހު އާއެކުވެސް އުނދަގޫވަގުތުތަކެއް ދިޔަ، ނަމަވެސް މަޝްވަރާކޮށްގެން އެއްބަސްވެވޭ ހަމައަކަށް އާދެވޭ: ނަޒީރު

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އާއެކުވެސް އުނދަގޫ ވަގުތުތަކެއް ކަޑައްތުކުރިންކަމަށާއި ނަމަވެސް ތަފާތަކީ އެއިން ކޮންމެ ފަހަރަކުވެސް މަޝްވަރާކޮށްގެން އެއްބަސްވެވޭ ހައްލަކާ ހަމައަށް އާދެވުންކަމަށް އަދާލަތު ޕާޓީގެ އިސް ތަރުޖަމާން އަލީ ނަޒީރު ވިދާޅުވެއްޖެއެވެ.

ދ ކުޑަހުވަދޫގައި ކުރިޔަށްދިޔަ އުފާވެރި އަމާން ރާއްޖެ ޖަލްސާގައި ވާހަކަދައްކަވަމުން ނަޒީރު ވިދާޅުވީ އަދާލަތު ޕާޓީން ސަރުކާރުތަކާއެކު މަސައްކަތްކުރާއިރު ގެންގުޅޭ ހަމައަކާއި ހިފަހައްޓާ އުސޫލެއް އޮންނަކަމަށެވެ. މީގެކުރީގެ ހުރިހާ ސަރުކާރުތަކާއެކުވެސް މަސައްކަތްކޮށްފައިވާ އަދާލަތު ޕާޓީގެ އިސްތަރުޖަމާނު ވިދާޅުވީ ސަރުކާރެއްގެ ސިޔާސަތަކާ ދެކޮޅަށް މިވީހާތަނުގައި ފާޅުގައި އަދާލަތު ޕާޓީ ނިކުމެފައި އޮންނާނީ އިސްލާމް ދީނާއި ރާއްޖޭގެ ރައްޔިތުންނާއި ރާއްޖޭގެ މަސްލަހަތު އެކަމަކުން ގެއްލޭކަންކަމުގައި ކަމަށެވެ.

ނަމަވެސް ތަފާތަކީ ރައީސް ޞާލިހާއެކު މަޝްވަރާކޮށްގެން އެއްބަސްވެވޭ ހިސާބަކަށް އާދެވުން ކަމަށާއި އަދާލަތު ޕާޓީ ކުރިޔަށް އޮތް އިންތިޚާބުގައި ރައީސް ޞާލިހާއެކު ނިކުމެތިބީ އެސަބަބަށްޓަކައި ކަމަށެވެ.

ކުރީގެ ރައީސް އަބްދުﷲ ޔާމީންގެ ފަސް އަހަރުގެ ވެރިކަމަށް އަލިއަޅުވާލައްވާ ވާހަކަދައްކަވަމުން ނަޒީރު ވިދާޅުވީ އެއީ އަނިޔާވެރި ވެރިކަމެއްކަމަށެވެ. ސެޕްޓެމްބަރ މަހު ރައްޔިތުން ނިންމާ ނިންމުމުން ދާން މިއުޅެނީ އުފާވެރި އަމާން ރާއްޖެއަކަށްތޯ ނުވަތަ މިރާއްޖޭގެ މަޖިލީހުގެ މެމްބަރުން ފާރުމަތިން ނަގާ އުކާލާ ސްޕްރީމް ކޯޓުގެ ފުރާޅުން ޓިނު ނަގައިގެން ފަނޑިޔާރުން ދަމާ ކޫއްތާ ގެންދިޔަ ޒަމާން އަނބުރާ އިޔާދަކުރާނީތޯ އެނގިގެންދާނެކަމަށެވެ.

ނަޒީރު ވިދާޅުވީ ރައީސް ޞާލިހު ވަނީ އެތައް އަހަރެއްވަންދެން ރާއްޖޭގައި އޮތް ސިޔާސީ ހަމަނުޖެހުމާއި ހަލަބޮލިކަން ނިމުމަކަށް ގެންނަވާފައިކަމަށެވެ. ރައްޔިތުންނަށް ހަމަޖެހިލައިގެން ހަމަނޭވާ ލެވޭނެ ފުރުސަތު ފަހިކޮށްދެއްވާފައިކަމަށެވެ.