އެމްޑަބްލިޔުއެސްސީ ދިވެހި ޕްރިމިއަރ ލީގުގައި ހުކުރު ދުވަހު ހަވީރު ކްލަބް ގްރީން ސްޓްރީޓްސް ކައިރިން އެއްވަރުކޮށް، ކްލަބް ވެލެންސިއާއިން މި ސީޒަނުގައި ފުރަތަމަ ފަހަރަށް ޕޮއިންޓެއް ހޯދައިފިއެވެ.

ގްރީން ސްޓްރީޓްސް އާއި ވެލެންސިއާ ބައްދަލުކުރި މެޗު އެއްވަރުވީ 1-1 ގެ ނަތީޖާއަކުންނެވެ. މެޗުގައި ގިނަ ވަގުތު ބޯޅަ ހިފަހައްޓައިގެން މޮޅަށް ކުޅެފައިވަނީ ވެލެންސިއާ އިންނެވެ. އެ ޓީމުން ވަނީ ގިނަ ހަމަލާތަކެއް ގޯލަށް ފޮނުވައި، ލަނޑު ޖަހާން ގިނަ ފުރުސަތުތަކެއް ފަހިކޮށްފައެވެ. ނަމަވެސް މެޗުގައި ފުރަތަމަ ކުރިހޯަދާފައިވަނީ ގްރީން ސްޓްރީޓްސް އިންނެވެ. ވެލެންސިއާގެ ހާފުގެ މެދާ ހަމައިން ލިބުނު ހިލޭ ޖެހުމެއް ގޯލުގެ ތެރެއަށް ވައްދާލީ ގްރީންގެ ޖާޒީ ނަންބަރު 2، އިބްރާހިމް ހަސީބެވެ. ހަސީބު ފޮނުވާލި ބާރު ބޯޅައަށް، ވެލެންސިއާގެ ކީޕަރަށް ރަނގަޅަށް ތައްޔާރު ނުވެވެއެވެ.

ދެވަނަ ހާފު ފެށިގެންވެސް ވެލެންސިއާއިން ވަނީ ލަނޑެއް ޖެހުމަށް ގިނަ މަސައްކަތްތަކެއް ކޮށްފައެވެ. ވެލެންސިއާއަށް 86 ވަނަ މިނެޓުގައި ނަތީޖާ ހަމަހަމަކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ޔޫސުފް އަޔާން އާމިރެވެ. ޔާމީން އޭރިއާ ތެރެއަށް ވަދެ ތަނަވަސްކޮށްދިން ފުރުސަތުގައި އަޔާން ވަނީ ތިރިތިރިން ގޯލުގެ ތެރެއަށް ފޮނުވާލާފައެވެ. އަޔާން އަކީ އެންމެ ފަހުން ބޭއްވި އިންޓަރ ސްކޫލް މުބާރާތުގައި އިސްކަންދަރު ސްކޫލް ޓީމުގެ ކެޕްޓަނެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ ވެލެންސިއާގެ އަހުމަދު ސިޒާން އެވެ.

ވެލެންސިއާ އަތުން ލިބުނު ޕޮއިންޓާއެކު ގްރީން ސްޓްރީޓްސް ވަނީ ހަވަނައަށް ޖެހިލާފައެވެ. އެ ޓީމަށް ހަތް މެޗުން ލިބިފައިވަނީ ހަތަރު ޕޮއިންޓެވެ. ތާވަލުގެ އެންމެ ފަހަތުން ވެލެންސިއާއަށް ލިބިފައިވަނީ އެއް ޕޮއިންޓެވެ.