ހުޅުމާލޭގައި ކުރިޔަށްދާ 10 ވަނަ އިންޓަ އޮފީސް ކެރަމް މުބާރާތުގެ ފިރިހެން ސިންގަލްސް ޗެމްޕިއަންކަން އެމްއޭސީއެލްގެ ޚާތިމް ޚަލީލް އަދި އަންހެން ސިންގަލްސް ޗެމްޕިއަންކަން ބީއެމްއެލްގެ ފާތިމަތު ޔުމްނާ ހޯދައިފިއެވެ.

ފިރިހެން ސިންގަލްސް ފައިނަލުގައި ޚާތިމް އާއެކު ވާދަކޮށްފައިވަނީ ހަމަ އެ އޮފީހުގެ އިބްރާހިމް ޝާހީން އެވެ. މި މެޗު ޚާތިމް ކާމިޔާބުކުރީ 25-16 ގެ ނަތީޖާއަކުންނެވެ. އަންހެން ސިންގަލްސް ފައިނަލުގައި ޔުމްނާ ނިކުތީ ބީއެމްއެލްގެ ނަސީފާ ސައީދާ ދެކޮޅަށެވެ. މި މެޗު ޔުމްނާ ކާމިޔާބުކުރީ 23-8 ގެ ނަތީޖާއަކުންނެވެ.

ފިރިހެން ސިންގަލްސްގެ ތިންވަނަ ލިބުނީ އެންމެ ފަހުގެ ޗެމްޕިއަން އެމްއޭސީއެލްގެ ނައުފަލް ޝަރީފަށެވެ. އޭނާ ވަނީ ތިންވަނަ ހޮވާ މެޗުގައި އެމްޕީއެލްގެ އުމަރު ޒިޔާދު 25-1 ގެ ނަތީޖާއަކުން ބަލިކޮށްފައެވެ. އަންހެން ތިންވަނަ ހޮވާ މެޗުގައި ވާދަކޮށްފައިވަނީ ކަސްޓަމްސް ރެކްރިއޭޝަން ކްލަބުގެ އުތުސިއްޔާ ތައުފީޤާއި މީރާގެ މަރިޔަމް ނުހާ އެވެ. މި މެޗު 25-5 ގެ ނަތީޖާއަކުން ކާމިޔާބުކުރީ އުތުސިއްޔާ އެވެ.

12 އޮފީހަކުން ބައިވެރިވެފައިވާ މި މުބާރާތުގެ ސިންގަލްސް ބައިގައި 100 އަށްވުރެ ގިނަ ކުޅުންތެރިން ވާދަކޮށްފައިވެއެވެ. މުބާރާތުގައި ދެން ކުރިޔަށް ދާނީ ޓީމް އިވެންޓުގެ މެޗުތަކެވެ.