ފާއިތުވި އަހަރު ގެވެށި އަނިޔާގެ 796 މައްސަލަ ފެމިލީ ޕްރޮޓެކްޝަން އޮތޯރިޓީ، އެފްޕީއޭ އަށް ހުށަހަޅާފައިވާ ކަމަށް އެ އޮތޯރިޓީން ބުނެފިއެވެ.

ރާއްޖެޓީވީގެ ފަސްކާފު ޕްރޮގްރާމްގައި ފެމިލީ ޕްރޮޓެކްޝަން އޮތޯރިޓީގެ ފަރާތުން ބައިވެރިވެވަޑައިގެން ވާހަކަފުޅުދައްކަވަމުން ވަޖީހާ ޒަރީރު ވިދާޅުވީ ގެވެށި އަނިޔާ ލިބޭ މީހުންނަށް ފޯރުކޮށްދޭން ޖެހޭ ޤާނޫނީ އެހީތެރިކަން މިހާތަނަށް އެންމެ އެކަށީގެންވާ ގޮތުގައި ނުލިބުނު ނަމަވެސް، 1 އޮގަސްޓުން ފެށިގެން މިހާރު ގެވެށި އަނިޔާ ލިބޭ މީހުންނަށް ޤާނޫނީ އެހީތެރިކަން ފޯރުކޮށްދޭ ކަމަށެވެ. އަދި އެފަދަ މައްސަލަތައް އަހަރުން އަހަރަށް އިތުރުވަމުންދާކަން ފާހަގަކުރެވޭ ކަމަށް އޭނާ ވިދާޅުވިއެވެ.

ގެވެށި އަނިޔާގެ ސަބަބުން ޤާނޫނީ އެހީތެރިކަން ބޭނުންވާ މީހުންގެ ސީދާ އަަދަދު ދެނެގަނެވިފައިނުވާ ކަމަށާއި އެހެން ނަަމަވެސް ގެވެށި އަނިޔާއިން ރައްކާތެރިކޮށްދިނުމަށް 117 އަމުރު ނެރެދީފައިވާ ކަމަށް ވެސް އޭނާ ވިދާޅުވިއެވެ. އެކަމަށް ބަލާލުމުން ޚިދުމަތަށް ބޭނުންވާ ގިނަ ބަޔަކު ތިބިކަން އެނގޭ ކަމަށް އޭނާ ވިދާޅުވިއެވެ.

ރާއްޖެ ޓީވީގެ ފަސްކާފު ޕްރޮގްރާމްގައި، ފެމިލީ ޕްރޮޓެކްޝަން އޮތޯރިޓީގެ ލީގަލް އޮފިސަރު ނުޒްހަތު ވަހީދު ވިދާޅުވީ ގެވެށި އަނިޔާ ލިބޭ މީހުންނަށް ޤާނޫނީ އެހީތެރިކަން ފޯރުކޮށްދޭ ރައްކާތެރިކަމުގެ އަމުރަކަށް ބޭނުންވާ މީހުންނަށް، އަދުލު އިންސާފު ކަށަވަރުކޮށްދެވޭނެ ކަމަށެވެ.

ގެވެށި އަނިޔާ ލިބޭ ފަރާތްތަކަށް ދައުލަތުން ވަކީލުން ހަމަޖައްސާދޭން ފެށުމާއި ގުޅޭގޮތުން އޭނާ ވިދާޅުވީ މިހާތަނަށް އައި އިރު ގެވެށި އަނިޔާ ލިބޭ މީހުންނަށް ޤާނޫނީ އެހީތެރިކަން ފޯރުކޮށްދިނުމުގައި ގޮންޖެހުންތައް ހުރި ކަަމަށެވެ. އަދި އެފަދަ ވާހަކަތައް ސިއްރުކުރުމުގެ ސަޤާފަތެއް އޮތްކަމަށާއި އެކަމުގެ ސަބަބުން އެފަދަ ކުށްތައް ކުރާ މީހުން ވަރަށް ބޮޑަށް މުޖުތަމައުގެ ތެރެއަށް ދޫވެފައި ތިބި ކަމަށެވެ. ނުޒުހަތު ވިދާޅުވީ ގެވެށި އަނިޔާ ހުއްޓުވުމަށް ޤާނޫނީ ގޮތުން ހޯދަން ޖެހޭ ހައްލު ހޯދާ ގެވެށި އަނިޔާ ލިބޭ މީހުންނަށް އެހީތެރިކަން ހޯދާދިނުމަށް މިހާރު މަސައްކަތް ކުރަމުންދާ ކަަމަށެވެ.

މީގެ އިތުރުން ގެވެށި އަނިޔާއިން ރައްކާތެރިވުމުގެ ހައްޤު ކޮންމެ ޖިންސެއްގެ މީހަކަށް ވެސް ލިބިިގެންވާ ކަމަށް އޭނާ ވިދާޅުވިއެވެ.

ފެމިލީ ޕްރޮޓެކްޝަން އޮތޯރިޓީ އިން މުއައްސަސާތަކާއި ގުޅިގެން ގެވެށި އަނިޔާ ހުއްޓުވުމުގެ ޤާނޫނުގެ ދަށުން މަސައްކަތް ކުރަމުންދާ ކަމަށާއި، ޤާނޫނުގެ ދަށުން އެކުލަވާލަން ޖެހޭ ޤަވާއިދުތަކުގެ މަސައްކަތް ވެސް ކުރަމުންދާ ކަމަށް ނުޒުހަތު ވިދާޅުވިއެވެ.