އިންޑިޔާ އަށް ޕާކިސްތާނު ޓީމު ފޮނުމުގެ ކުރިން ދަނޑުތައް ޗެކްކުރަނީ
31 ޖުލައި 2023 | ހޯމަ 09:11ޕާކިސްތާނުން ގޮތެއް ނިންމާނީ ސެކިއުރިޓީ ރިޕޯޓަށްފަހު
ބަބަރް އަޒަމް (ކ) އާއި ފަހްރުއްޒަމާން ޕާކިސްތާން މެޗުގައި ކުޅެނީ
ވޯލްޑްކަޕް ކުޅެން އިންޑިޔާ އަށް ޕާކިސްތާނުގެ ކްރިކެޓް ޓީމު ފޮނުމުގެ ކުރިން ދަނޑުތަކާއި ހޮޓާތައް ޗެކްކުރުމަށް ޕާކިސްތާނުގެ ސެކިއުރިޓީ ޓީމެއް އިންޑިޔާ އަށް ދާގޮތަށް ނިންމައިފި އެވެ.
ޕާކިސްތާނުން ބުނީ މިއީ އައުކަމެއްނޫން ކަމަށާއި އިންޑިޔާ މެޗުގެ ކުރިން އަބަދުވެސް ކުރާ ކަމެއް ކަމަށެވެ. ނަމަވެސް މިފަހަރު މިކަން ކުރަނީ ދެ ގައުމުގެ ގުޅުން ވަރަށް ބޮޑަށް ގޯސްވެ އެއްބަޔަކު އަނެއް ބަޔަކާއެކު ކުޅެން ބޭނުންވަނީ ނިއުޓްރަލް ދަނޑެއްގައި ކަމަށް ބުނުމަށްފަހު އެވެ.
ޕާކިސްތާނުގެ ސެކިއުރިޓީ ޓީމުން އިންޑިޔާގެ ފަސް ސަރަހައްދަކަށް ޒިޔާރަތްކުރާނެ އެވެ. އަދި ދަނޑުތައް ޗެކްކޮށް، ސަޕޯޓަރުންނާއި ނޫސްވެރިންނަށް ހުރި އިންތިޒާމްތައް ޗެކްކުރާނެ އެވެ. އެއަށްފަހު މި ރިޕޯޓް ޕާކިސްތާނުގެ ސަރުކާރާއި އިންޓަނޭޝަނަލް ކްރިކެޓް ކައުންސިލަށް ވެސް ހުށަހަޅާނެ އެވެ.
އަންނަ އޮކްޓޫބަރު މަހު އިންޑިޔާގައި ފަށާ ވޯލްޑްކަޕް ކުޅެން ޕާކިސްތާން ޓީމު ފޮނުވުމާމެދު ގޮތެއް ނިންމާނީ އޭގެ ފަހުންނެވެ. ޕާކިސްތާނުން ވަނީ މިކަން ނިންމުމަށް ބޭނުންވާ މަޝްވަރާތައް ކުރުމަށް 11 ވަޒީރުންގެ ކޮމިޓީއެއް ވެސް އެކުލަވާލައިފަ އެވެ.
