އާރުއާރުސީ އާއި ޕްރިޒަން ކްލަބް ގަދަ ސޯޅައަށް

ކުޅުނު ދެވަނަ މެޗުވެސް ކާމިޔާބުކޮށް ރޯޑް ރެކްރިއޭޝަން ކްލަބް (އާރުއާރުސީ) އާއި ޕްރިޒަން ކްލަބް ކްލަބް މޯލްޑިވްސް ކަޕްގެ ގަދަ ސޯޅައިން ޖާގަ ހޯދައިފިއެވެ.

އާރުއާރުސީ ދެވަނަ މެޗު ކާމިޔާބުކުރީ ޓީއެމްއޭއާ ވާދަކޮށް 7-2 ނެވެ. މެޗުގައި އާރުއާރުސީ އަށް ލީޑް ނަގައިދިނީ ހުސައިން ގައްސާން ލަބީބެވެ. ފަހު ދެ ލަނޑު ޖަހާ އޭނާ ހެޓްރިކް ހެދިއެވެ. ދެވަނަ ލަނޑު ޖެހީ އިބްރާހީމް އަސްވަދުއެވެ. ފުރަތަމަ ހާފްގައި ތިންވަނަ ލަނޑު ޖެހީ ހިސާމް ސަލީމެވެ. ދެވަނަ ހާފްގައި ހަތަރު ވަނަ ލަނޑު ޖެހީ އަބުދުالله ޔާމީނެވެ. ފަސްވަނަ ލަނޑު ޖެހީ އަބުދުالله މިދުހަތު ފަހުމީ (ބިޗަޑް) އެވެ. ޓީއެމްއޭގެ ދެ ލަނޑު ޖެހީ އުސައިރަމް މުޙައްމަދާއި, އަހުމަދު ވާފިރެވެ. އާރުއާރުސީ ވަނި ފުރަތަމަ މެޗުގައި ކަސްޓަމްސް ރެކްރިއޭޝަން ކްލަބް ބަލިކޮށްފައެވެ.

ގްރޫޕް އެފްއިން ޕްރިޒަން ކްލަބް ވަނީ ދެވަނަ މޮޅު ހޯދާފައެވެ. އެޓީމް ދެވަނަ މެޗު ކާމިޔާބުކުރީ ފެން ކްލަބާ ވާދަކޮށް 6-4 ނެވެ. މެޗުގައި ޕްރިޒަން ކްލަބްގެ ފުރަތަމަ ދެ ލަނޑު ޖެހީ މުޙައްމަދު ޝާއިން އެވެ. އެހެން ލަނޑުތައް ޖެހީ ޝަނާން ރަޝާދުއާއި, މުރުތަޖާ މުހައްމަދާއި, މެޗުގެ މޮޅު ކުޅުންތެރިޔާ އަހުމަދު ހުޝާމްއެވެ. ފެން ކްލަބްގެ ފުރަތަމަ ތިން ލަނޑު ފުރަތަމަ 17 މިނެޓުގެ ތެރޭގައި ޖެހީ އަހުމަދު މާޒިންއާއި, ރައްޒާން ޖައުފަރާއި, ސޮލާހު އަލީއެވެ. ހަތަރު ވަނަ ލަނޑު ޖެހީ އަހުމަދު ރައްޔާންއެވެ. ޕްރިޒަން ކްލަބުން މެޗު އަނބުރާލީ 3-0 ގެ ލީޑެއް ފެން ކްލަބުން ނަގާފައި ވަނިކޮށެވެ. ޕްރިޒަން ކްލަބް ވަނީ ފުރަތަމަ މެޗުގައި 4-3 ން ކްލަބް އާސަންދަ ބަލިކޮށްފައެވެ.

ޗެމްޕިއަން ފެނަކަ ފުރަތަމަ މެޗު އެއްވަރުވިޔަސް ދެވަނަ މެޗުގައި ވަނީ 8-1 ން މީޑިޔާނެޓް ބަލިކޮށްފައެވެ. މެޗުގެ މޮޅު ކުޅުންތެރިޔާ މަސްއޫދު މާޖިދު ފަލާހީ ފަސް ލަނޑު ޖެހިއެވެ. އަނެއް ތިން ލަނޑު ޖެހީ ހާޒިމް ފައުޒީއާއި މުހައްމަދު އިންޝާލްއާއި މުހައްމަދު އިޔާދު އަލީއެވެ. މީޑިޔާނެޓްގެ ހަމައެކަނި ލަނޑު ޖެހީ މުހައްމަދު ޝަމީހުއެވެ. ފެނަކަ އޮތީ ހަތަރު ޕޮއިންޓާއެކު ގްރޫޕްގެ އެއްވަނާގައެވެ.