އިންޑިޔާގެ އުއްތަރަޚާންދު ސްޓޭޓްގެ މައި ކޯރެއް ކައިރީގައި ގާއިމްކޮށްފައިވާ އިލެކްޓްރިސިޓީ ޓްރާންސްފޯމަރެއް ގޮވުމަށްފަހު ބްރިޖަށާއި ކޯރަށް ކަރަންޓު ލީކްވުމުގެ ސަބަބުން، ކަރަންޓުގައި ޖެހި 15 މީހުން މަރުވެ، އިތުރު 15 މީހުންނަށް ފަރުވާދެމުންދާކަމަށް ޚަބަރުލިބެއެވެ. ޗަމޯލީ ޑިސްޓްރިކްޓްގައި ހިގި މި ހާދިސާގައި މަރުވި މީހުންގެ ތެރޭގައި ފުލުހަކާއި ފަސް ސެކިއުރިޓީ ގާޑުންގެ އިތުރުން ދަނޑުވެރިންތަކެއް ހިމެނެއެވެ. މިހާދިސާ ހިނގި ގޮތެއް ބަލައި ތަހުގީގުކުރުމަށް އެ ސްޓޭޓުގެ ޗީފް މިނިސްޓަރު މިހާރު ވަނީ އަންގަވާފައެވެ.
ޗަމޯލީގެ ސުޕްރިންޓެންޑަންޓް އޮފް ޕޮލިސް ވިދާޅުވީ ރޭގެ ވަގުތެއްގައި ހިނގި މި ހާދިސާގެ ރިޕޯޓް ފުލުހުންނަށް ލިބިފައިވަނީ ބުދަދުވަހު ހެނދުނުކަމަށެވެ.
އެންޑީޓީވީއާ ހަވާލާ ދީ ލިބޭ ޚަބަރުތައްވެސް ބުނާގޮތުން ޓްރާންސްފޯމަރު ގޮވުމުގެ ސަބަބުން ފުރަތަމަ ކަރަންޓު އައިސްފައިވަނީ ކޯރު ހުރަސްކުރުމަށް އަޅާފައިވާ ބްރިޖަށެވެ. ކަރަންޓުގައި ޖެހިގެން ވޮޗްމޭންއެއް މަރުވެއްޖެކަމަށް ލިބުނު ރިޕޯޓަކާ ގުޅިގެން އެކަން ބަލަން ދިޔައިރު ތިރީހަކަށް މީހުން ވަރަށް ބޮޑަށް ކަރަންޓުގައި ޖެހިފައިވާކަން އެނގުނު ކަމަށް ޕޮލިސް ސުޕްރިންޓެންޑަންޓް ވިދާޅުވެފައި ވެއެވެ. މި އެންމެންވެސް ހޮސްޕިޓަލަށް ގެންދެވުނު ކަމަށާއި، 15 މީހުން މަރުވީ ހޮސްޕިޓަލުގައި ފަރުވާދެމުން ދަނިކޮށްކަން އޭނާ ހާމަކުރެއްވިއެވެ.
އިންޑިޔާގެ ރަށްފުށުގެ ބައެއް ހިސާބުތަކުގައި ކަރަންޓް ވިއުގަ ހުންނަންޖެހޭ ފެންވަރަށް ނުފެތުމާއި، ވަޔަރުކޮށްފައި ހުންނަ ގޮތުން މިފަދަ އެކްސިޑެންޓްތައް ހިނގުމަކީ އާންމު ކަމެކެވެ.
