2015 ވަނަ އަހަރު ތެރޭގައި އެމްއެމްޕީއާރްސީ މެދުވެރިކޮށް ރ. ފުއްގިރި ޓޫރިޒަމް ބޭނުމަށް ދޫކުރުމުގެ މުޢާމަލާތުގައި ރިޝްވަތު ހިފައި މަނީ ލޯންޑަރކުރި މައްސަލައިގައި ދަޢުވާލިބޭ, މއ.ކުރިކީލަހިޔާ, އަޙްމަދު ކްރިކް ރިޟާގެ މައްޗަށް ކުރި ދައުވާ ފަހުން ކޯޓަށް ހުށައެޅުމަށް، މިވަގުތަށް ދައުވާ އަނބުރާ ގެންދިއުމަށް ޕްރޮސެކިއުޓަރ ޖެނެރަލް އޮފީހުން ނިންމައިފިއެވެ.

އެކަމާ ގުޅޭގޮތުން ޕީޖީ އޮފީހުން ބުނީ، ކުރިކް ރިޟާގެ ފަރާތުން ހުށަހެޅި މެޑިކަލް ޑޮކިއުމަންޓް ތަކަކާ ގުޅިގެން އެ މައްސަލަ ކޯޓުގެ ތާވަލާ އެއްގޮތަށް ކުރިއަށް ގެންދެވިފައިނުވާ ކަމަށެވެ.

އަދި އަޙްމަދު ކުރިކް ރިޟާގެ ފަރާތުން ހުށަހެޅި ދިފާޢީ ހެކިތަކެއްގެ ޞައްޙަކަން ކަށަވަރުކުރުމަށްޓަކައި އިތުރަށް ބަލަންޖެހޭ ބެލުންތައް ފުލުހުން ބަލަމުންދާކަމަށްވެސް ދައުލަތުން ބުނެއެވެ.

ޕީޖީ އޮފީހުން ބުނީ، އަޙްމަދު ކުރިކް ރިޟާގެ ބައިގައި ދިމާވި މި ޙާލަތާ ގުޅިގެން އެބައި ވަކިން ކޯޓުގައި ކުރިއަށްގެންދެވޭނެ ގޮތެއް އޮތްތޯ ބެލިއިރު އެ މަގު ޤާނޫނީ ގޮތުން ބަންދުވެފައިވާކަމަށެވެ. އެގޮތުން ދެ ޚަސްމަކަށް އެއްކޮށް ދައުވާ ކޮށްފައި އޮންނަ ޙާލަތުގައި މައްސަލަ ވަކިން ކުރިއަށް ގެންދެވޭނީ ހަމައެކަނި އިބްތިދާއީ މަރުޙަލާގައި ކަމަށް ރާއްޖެއެމްވީން ސުވާލު ކުރުމުން ޕީޖީ އޮފީހުގެ އޮފިޝަލަކު ވިދާޅުވިއެވެ.

މި މައްސައަކީ ޢާންމު މަސްލަޙަތު މަތީ މިންވަރަކަށް އެކުލެވޭ މައްސަލައަކަށްވެފައި, މިފަދަ މައްސަލައެއްގައި ދަޢުވާލިބޭ އެކެއްގެ ބައިގައި ދިމާވި ޙާލަތަކާ ކޯޓުގެ ތާވަލާ އެއްގޮތަށް މައްސަލަ ކުރިއަށް ނުގެންދެވި ވުމަކީ ޢާންމު މަސްލަޙަތު އޮތް ގޮތް ކަމަށް ނުފެންނަކަމަށްވެސް ދައުލަތުން ބުނެއެވެ.

ވުމާއެކު، އަޙްމަދު ކުރިކް ރިޟާ ހުށަހެޅި ހެކިތަކާ ގުޅިގެން އިތުރަށް ބަލަންޖެހޭ ކަންކަން ބެލުމަށް, އަޙްމަދު ކުރިކް ރިޟާގެ މައްޗަށް ކޮށްފައިވާ ދަޢުވާތައް މި ވަގުތަށް މަޑުޖައްސާލުމަށްޓަކައި, އެ ދަޢުވާތައް ފަހުން ހުށަހަޅާ ގޮތަށް ކޯޓުން އަނބުރާ ފޮނުއްވައިދެއްވުމަށް ވަނީ ކޯޓުގައި އެދިފައެވެ.

ރާއްޖެއެމްވީއަށް އެނގިފައިވާ ގޮތުގައި ކްރިކް 31 ދުވަހުގެ މެޑިކަލްއެއް ހުށައަޅާފައިވާއިރު، އޭނާ ހުށައަޅާފައިވަނީ އައިޖީއެމްއެޗްގެ މެޑިކަލް ފޯމެކެވެ. އެގޮތުން އެ ފޯމުގައި އައިޖީއެމްއެޗްގެ ޑޮކްޓަރު ސޮއިކުރައްވާފައިވަނީ ސިއްޙީ ޚިދުމަތްދޭ އެހެން ތަނަކުން ހަދާފައިވާ ޓެސްޓުތަކަކާއި ގުޅޭ ލިޔުންތަކަކަށް ބެލުމަށްފަހުއެވެ. މިއީ އެންމެ އިތުބާރު ހިފޭ ގޮތް ނޫންކަމަށް އައިޖީއެމްއެޗުން ބުނެފައިވެއެވެ.

ދައުލަތުން މައުލޫމާތު ދޭ ގޮތުގައި އަލުން ހުށަހެޅުމަށްޓަކައި އަނބުރާ ގެންނައުމަށް އެދިފައިވާނީ އަޙްމަދު ކުރިކް ރިޟާގެ މައްޗަށް ކޮށްފައިވާ ދަޢުވާތައް އެކަންޏެވެ.

އެގޮތުން ދައުލަތުން އެދިފައިވަނީ އަލުން ހުށަހަޅާ ގޮތަށް އަނބުރާ ގެނައުމުގެ ހުއްދައަކަށެވެ. މި މަރުޙަލާގައި އޮތް ދަޢުވާއެއް މިފަދައިން އަނބުރާ ގެނެވޭނީ ކޯޓުން ހުއްދަ ދެއްވައިފިނަމައެވެ.