ލޯނު އެއްބަސްވުމެއްގެ ދަށުން ޔޫނިއަން ބަރލިންއަށް ބަދަލުވެ، މި ސީޒަނުގައި ޗެލްސީ ދޫކޮށްލި އެންމެ ފަހުގެ ކުޅުންތެރިއަކަށް ޑޭވިޑް ޑެޓްރޯ ފޮފާނާ ވެއްޖެއެވެ.
މިދިޔަ އަހަރު ނޯވޭގެ ކުލަބަކުން 12 މިލިއަން ޔޫރޯއަށް ޗެލްސީއަށް ބަދަލުވުމަށްފަހު، 20 އަހަރުގެ ކުޅުންތެރިޔާ ޗެލްސީއަށް ކުޅެފައިވަނީ އެންމެ ތިން މެޗެވެ.
ފޮފާނާ ޔޫނިއަން ބަރލިންއަށް ބަދަލުވީ އެއް އަހަރު ދުވަހުގެ ލޯނު އެއްބަސްވުމެއްގެ ދަށުންނެވެ. އެ ޓީމު ވަނީ ކުރިޔަށް އޮތް ސީޒަނުގެ ޗެމްޕިއަންސް ލީގަށް ކޮލިފައިވެފައެވެ. ކުރިޔަށް އޮތް ސީޒަނުގައި ޖަރުމަނު ލީގުގައި ގިނަ ވަގުތު ކުޅެން އޭނާއަށް ފުރުސަތު ލިބޭނެކަމަށް ބެލެވެއެވެ.
ފޮފާނާއަކީ ޔޫނިއަން ބަރލިންއިން، ތިން ދުވަހުގެ ތެރޭގައި ސޮއިކުރި ދެވަނަ ކުޅުންތެރިޔާއެވެ. މިދިޔަ އާދިއްތަ ދުވަހު އެ ޓީމުން ވަނީ ލޯނު އެއްބަސްވުމެއްގެ ދަށުން ލީޑްސް ޔުނައިޓެޑުގެ ބްރެންޑަން އާރޮންސަންގެ ސޮއިވެސް ހޯދާފައެވެ.
2019 ވަނަ އަހަރު ޖަރުމަނު ލީގަށް އަލަށް ކޮލިފައިވި ޔޫނިއަން ބަރލިން، ޗެމްޕިއަންސް ލީގަށްވެސް ކޮލިފައިވެފައިވަނީ ފުރަތަމަ ފަހަރަށެވެ. އެ ޓީމު ޗެމްޕިއަންސް ލީގުގެ މެޗުތައް ކުޅޭނީ ހާތާ ބަރލިންގެ ސްޓޭޑިއަމް ކަމަށްވާ އޮލިމްޕިއާ ސްޓޭޑިއަމުގައެވެ.
