"އިންޑިއާ ސަރުކާރު ހޭލައްވާލަން އެބަޖެހޭ... މާދަމާއަށް މަޑުކޮށްފިނަމަ މާ ބޮޑަށްވެސް ލަސްވެދާނެ"

ގައުމެއްގެ އާބާދީއަށް ބަލާއިރު، ގިނަ ބަޔަކު އެ ބައްޔެއްގެ ވޭނާއި ތަކުލީފުތައް އުފުލަމުންދާ އެއް ބަޔަކީ ހަކުރު ބައްޔެވެ. ދުނިޔޭގެ އެންމެ ކުރިއަރާފައިވާ ގައުމުތަކާއި ތަރައްގީވަމުންދާ ގައުމުތަކުގައިވެސް މިކަން އޮތީ ހަމަ މި ގޮތަށެވެ. އަވައްޓެރި އިންޑިއާއަކީ މުޅި ދުނިޔޭގެ ނިސްބަތުން ބަލާއިރު، "ހަކުރު ބަލީގެ ވެރިރަށުގެ" ލައްގަނޑު ޖެހިފައި އޮތް ގައުމެވެ. އެފަދަ ހާލެއްގައި އޮތް އިންޑިއާއަށް އަނެއްކާވެސް މި ވަނީ ހަކުރު ބަލީގެ އިންޒާރުގެ ރަނގަބީލެއް އަޅާފައެވެ. އެންމެ ފަހުގެ ހޯދުންތައް ދައްކާގޮތުން، އިންޑިއާގެ އާބާދީގެ 10 ބައިކުޅަ 1 މީހުންނަކީ މިއަދު ހަކުރުބަލި ޖެހިފައިވާ މީހުންނެވެ. ދުނިޔޭގައި މި ވަގުތު އޮތް އެންމެ އާބާދީ ބޮޑު ގައުމަކީވެސް އިންޑިއާއެވެ.

ސިއްހީ ދާއިރާގައި ނުފޫޒުގަދަ މަޖައްލާއެއް ކަމަށްވާ ދަ ލޭންސެޓްގައި އާންމުކޮށްފައިވާ ދިރާސާއަށް ބަލާއިރު، އިންޑިއާގެ އާބާދީގެ 11.4 ޕަސެންޓް މީހުންނަކީ ހަކުރު ބައްޔަށް ޕޮޒިޓިވްވެފައިވާ މީހުންނެވެ. އެއީ ގާތްގަނޑަކަށް 101 މިލިއަނެއްހާ މީހުންނެވެ. މި ދިރާސާއަކީ، އިންޑިއަން ކައުންސިލް އޮފް މެޑިކަލް ރިސަރޗް (އައިސީއެމްއާރް)އިން ކުރިއަށް ގެންދިޔަ ދިރާސާއެކެވެ. 2019 ވަނަ އަހަރުގެ ތަފާސް ހިސާބުތަކަށް ބަލާއިރު، އިންޑިއާގެ އާބާދީއިން ހަކުރު ބައްޔަށް ޕޮޒިޓިވްވެފައިވަނީ 70 މިލިއަން މީހުންނެވެ.

އައިސީއެމްއާރްގެ ދިރާސާގެ އިތުރު ހޯދުންތަކަށް ބަލާއިރު، ހަކުރުބަލި ޖެހުމުގެ ކުރީ މަރުހަލާ ނުވަތަ ޕްރީ-ޑައެބީޓީޒް ސްޓޭޖުގައި އުޅޭ މީހުންގެ އަދަދު 136 މިލިއަނަށް އަރައެވެ. އެއީ ބައްޔަށް ޕޮޒިޓިވްވެފައިވާ މީހުންގެ އިތުރުންނެވެ. ދިރާސާގެ އެއް މުސައްނިފު ކަމަށްވާ ޑރ. ވީ މޯހާން ވިދާޅުވި ގޮތުގައި، ހަކުރުބަލީގެ ބަލިމަޑުކަން އަދި ނިމޭކަށް ނެތެވެ. ދެންވެސް އޮތީ އަދަދުތައް މައްޗަށް ދިއުމެވެ.

ހަކުރު ބަލީގެ ވައްތަރުތަކަށް ބަލާއިރު އިންޑިއާގައި އެންމެ އާންމުވެފައި ވަނީ ޓައިޕް ޓޫ ޑައެބީޓީޒްއެވެ. ރަށްފުށު ހިސާބުތަކަށްވުރެ ބޮޑަށް، ތަރައްގީވެފައިވާ ސަރަހައްދުތަކުގައި ހަކުރު ބަލީގެ މީހުންގެ އަދަދު ގިނަކަންވެސް ދިރާސާގެ ހޯދުންތަކުން ވަނީ ދައްކާފައެވެ.

ސިއްހަތަށް ގެއްލުންދެނިވި އާދަކާދައާ ދޯޅަވުމުގެ އިތުރުން، ހެލިފެލިވެއުޅުން މަޑުޖައްސާލުމަކީ ހަކުރު ބަލީގެ ކޭސްތައް އިތުރުވުމަށް މެދުވެރިވެފައިވާ އެންމެ ބޮޑެތި ސަބަބުތައްކަން ސިއްހީ ދާއިރާގެ ތަޖުރިބާކާރުން ފާހަގަ ކުރައްވައެވެ. އޮންޑޯކްރޮނޮލޮޖިސްޓް، ޑރ. ސުރެންދުރަ ކުމާރު ވަނީ، ޒަމާނީ ޙަޟާރާތުގެ ތަރައްގީގެ ނަޒަރިއްޔާއިން މިކަމުގެ މައްޗަށް އަލިއަޅުއްވާލައްވާފައެވެ.

ސިއްހީ ދާއިރާގައި މަސައްކަތްކުރައްވާ އެހެން ފަރާތްތަކުން ވަނީ، ހަކުރު ބަލީގެ ހުޅުގަނޑު ފަޅައިގެން ދިއުން ހުއްޓުވުމަށް ފިޔަވަޅުތަކެއް އެޅުމަށް، އޮފިޝަލުންނަށް ގޮވާލައްވާފައެވެ. ހަކުރު ބަލީގެ ޚާއްޞަ ތަޖުރިބާކާރެއް ކަމަށްވާ ޑރ. ރަޖީވް ޗޯލާ ވަނީ، ސަރުކާރު ހޭލަންވެއްޖެ ކަމަށް ވިދާޅުވެފައެވެ.

އިންޑިއާގެ އާބާދީގެ ބޮޑު ބައެއް މިއަދު އޮތީ ހިތުގެ ބަލިތައް ޖެހުމާއި، ހަށިގަނޑުގެ ގުނަވަންތަކަށް ޖެހޭ ދިގުމުއްދަތުގެ ބަލިތައް ޖެހުމުގެ ނުރައްކަލުގެ ތެރޭގައިކަންވެސް އައިސީއެމްއާރްގެ ދިރާސާގައި ވަނީ ފާހަގަކޮށްފައެވެ.

ދުނިޔޭގެ ނިސްބަތުން ބަލާއިރު ހަކުރު ބަލީގެ މީހުންގެ 17 ޕަސެންޓް ހިއްސާކުރަނީ އިންޑިއާއިންނެވެ. ހަކުރު ބައްޔާ ގުޅުންހުރި އެކި މައްސަލަތަކުގައި 2017 ވަނަ އަހަރާ 2021 ވަނަ އަހަރާ ދެމެދު އިންޑިއާއިން މަރުވި މީހުންގެ އަދަދު 14400ށްވުރެ މައްޗަށް އަރައެވެ.